АСАБИКВА РГВБАЙАРА ГІАНАРШIЫХИТI

Черкесск город асаби библиотекакви акнига тйыртакви ркІарышвтаква «Детские смешинки» зхьзу книга хвыцкІ гІахвынгылтІ. Ауи йкъальам йгІахъыцІтІ ажурналист, агІвгІвы, КъарчаЧеркесла йгьи Россияла гІатгара зму акультура анхагІвы КЪАНТЕМЫР Тырквби ГІазиз йпа. «Нартиздат» гІвырагІацІщтырта апны йыздынхалыз акнига асурат чІарачІаквала йбайапІ, йафыру ахІвсса йгьи ачкІвынчва хвыцква ракІвпІ. «АуагІахъа рхІаль асабиква рыбызшвала рахІа бзита йгІасгвынгІвитІ. Асабиква йыззхъвыцуа йхътІыта йырхІвитІ», – йылгІвытІ Барто Агния. Къантемыр Тырквби йгІацІищтыз акнига апны амшыркъвараква, айчважвараква щардапІ. Ауат асабиква йрымаджьащахъвазлуштІ. Ан-абачва, асабигІзартаква рынхагІвчва, арыпхьагІвчва, акультури азъазари йырпщылу, асабиква йрыдынхалуа зымгІва рыхъазла уызгІвымсхыз цхърагІагапІ. Йапхъахауа абгъьыц угІалагата асабиква йгІакІвзыршауа адуней шырбауала, агІаншараква шрылархІвауала, йшджьарщауала, рджьауапквала удырхъыччитІ. Абар ауи апш гІвыра хвыцкІ: «Анзор хвыц апахь дджвылцІырныс тшадигалитІ. Йан ауи дйыщтацІыруа йылхІвитІ: «учрыкъвква ахъауымцІан, хІвынчІвы гьаъахым». ЙджвылцІыз ачкІвын дакъикъакІла дкьахвта, дцІыруа дгІаххылхтІ. «Мама, мама, ласылас счрыкъвква гІасыт, сара хІвынчІвы гІасаутІ!». Акнига апны йкъычІру бжьагажвакІгьи угьанйум. Унашх гІащтІызхуа аъащаква, асабиква дара райчважвараква, ран-рабачви рарыпхьагІвчви йадымрыхьдзакІва хъыччахъвата йрархІвуа ажва джьащахъваква ракІвпІ уызпхьауа. Ачважвага суратква, амшыркъвара гІвыра айшысква ухъыркъьалитІ, уанрыпхьауа зынла йугвнукІылитІ. «Азоопарк апны ачкІвын маджьан хвыц ддырдаритІ: «Асльан атара уадымгылын, хъарата угыл». Ауи джьауапта йгІайтхитІ: «ШвымгвыргІван, сара ауи гвымхаракІгьи гьазысхушым…» МшигІадза узынйауа агІаншараква агІвгІвы йгІайрысабапуа ажва, йфырква ртурасква урыздырхъвыцитІ, рхІальква, ртшдырра узыгІахъыртІитІ. Абар ауи апш айчважваракІ: «АпхьагІвчва аурам апны асы нырхуан. Сульман хъатакІла дгылата ауат дырпшуан. «Уара ачІвыйа уызнымхауа?», – дицІгІатІ ауи арыпхьагІв. «Сара датша мгІвапІ сызланыкъвауа», – йджьауапхатІ ачкІвын. Йутахъы-йутахъымызтынгьи, уазхъвыцпІ: ауи йапшу акъральгІв Россия ауачІвымш дазгылуашма? – Амшыркъвараква сквшщарда руацІа йазскІкІытІ. Ауат райхІара черкес бызшвала агазет йгьи Нальчик апны йгІацІцІуа «Нур» саби журнал йрыншвалтІ, – йхІвитІ акнига автор. – Сызцынхуз агвып ауат рахІагьи уагІа щардагІв шрыхагІвазуш апшта урышв бызшвала йатаскІырныс саквдыргвышхватІ. Ймайрам ауи ауысла дгІасцхърагІатІ сквшшвбжакІ урышв бызшвала арыпхьагІвта йынхаз схъапщыла. УахьчІвала ауи лакІвпІ сгІвыраква йырцІбацІбагІву. ЙшылхІвауала, ауат рпны ажвала асуратква, агІаншараква, айчважвараква рызджьакІ асабиква ргвтаракви рлахІваракви абгата йыгьгІахъыртІуам, ачеркес бызшва агвацчпара пшдзара дрыдзитІ. Бызшвипхьадза закІгьи йузашІмырпшуаш йара акъдзыра амапІ. Аурышв бызшва рахІагьи йбайазтІхІва ахІарыф быжьгаща датшапІ. «Асаби литература шпаъазлара атахъыйа?» – дазцІгІитІ агІвгІвы Михалков Сергей йгьи йара джьауапта йайтхитІ: «Ауи асаби йтшдырра йадсылра, йгвынгІвыразара, йджьащахъвазара, йцІабыргызара атахъыпІ». Арат алкІгІараква зымгІва «Детские смешинки» книга йалубгІитІ. Ажва аламкІва, ауи йгІадзынгылуа абанпара рбжьара йацхърагІуштІ. Узырхъыччауа, гвщтІыхра гІауылазцІауа ауи акнига автор аразыра ажваква йквнагапІ. Ауи адахІвраква йымазтІ, хвыцгьи дугьи йрысабапхуш ужвыгьи гІвыра шІыц щарда ргІаныршара къару азйымазтІ.