«САБИ ЧIЫДА ГЬАЪАМ…»

Январь а 20 КЧР Ажвлара палата алачIвара апны хвуыскI йрылапштI. Айззара йалан КЧР а-Хъада йгьи а-Правительства р-Администрация знапIыцIу йапхъахауа йзаместитель СЕМЕНОВ Ахмат, наукала, арыпхьарала, культурала, спортла, чкIвыныргIа руысквала йгьи туризмла КЧР АуагIа Айззара (а-Парламент) акомитет апредседатель ГАНШИН Алексей, экономика политикала йгьи ахIаракьатчпара уысквала КЧР АуагIа Айззара (а-Парламент) акомитет апредседатель йзаместитель ГВАНА Игорь, згIвадарахчарали социальна политикали КЧР АуагIа Айззара (а-Парламент) акомитет апредседатель ХВБИ ХIасан, КЧР Ажвлара палата апредседатель ЛЯШОВА Елена, КЧР апрофсоюз организацияква радкIылара апредседатель АЙБАЗОВА Раиса, арыпхьарали наукали КЧР аминистр лзаместитель АТАЕВА Лейла, асаби йхвитнагIаквала КЧР а-Уполномоченна БОНДАРЕНКО Наталья, Россия а-Президент йпны йгIаныршу ауагIа млыкврхIара йгьи акъральыгIва къвырльыкъвхара ракадемия СКФО-ла аинститут адиректор, РФ Ажвлара палата йалу ТЛЬЫС Азамат, КЧР Ажвлара палата йалу АТАБИЕВА Мария, ауагIахъа жвлара организацияква рунашвачпагIвчва. ЗымгIва йрапхъата хIреспублика ахабзалыхра атшауацIыхра, акъральгIвчва рхвитнагIаква хчара къару алазцIауа, ажвлара-политика уысква джьгарта йрылу, ауагIахъаква райгвара рыбагъьара гвхътIыла йазынхауа йгьи КЧР Ажвлара палата йахъыцIыз ажвасквша йазынархата артшхъвагаква рквнадыргатI. Ганшин Алексей КЧР АуагIа Айззара (а-Парламент) а-Председатель Иванов Александр йгьи адепутатква рыхьызла йгIайззаз тшырзынайырхатI. – ХIреспублика апны ажвлара-политика уысква бзита йгIазгвынгIвуа, ари ауысла адепутатква цхърагIара гIахIызрадзауа, ауагIахъаква, адиннкъвгагIвчва аргваныта йрыцынхауа швгIапсара хвы азыгIбитI. Швари хIари апхъахьылагьи аргваныта хIацынхуштI, – йгIаликIгIатI Ганшин Алексей. Ауи ареспублика ахабзалыхра атшауацIыхра къару ъаларцIауа ахъазла КЧР апрофсоюз организацияква радкIылара апредседатель Айбазова Раиса йгьи «Русь» жвлара организация аунашвачпагIв Жедяев Евгений КЧР АуагIа Айззара (а-Парламент) а-Президиум а-ЧIахIра грамотаква риттI. Семенов Ахмат КЧР Ажвлара палата ажвасквшала йгIайззаз драйхIвахIвтI, акъральгIвчва ргIальаматраква хчара йазынхауа КЧР Ажвлара палата йалу аъачIвагIагIвчва КЧР а-Правительства а-ЧIахIра грамотаква риттI. Ари артшхъвагала йгIалыркIгIатI ажвлара-политика уыснкъвгагIвчва Айбазова ФатIима, Барков Анатолий, Гвана Игорь, Гончарова Юлия, Староконь Анастасия, Тоторкулов Шагабан, Хабов Руслан, Хасанов Ханафи, Щербина Елена. Ляшова Елена йагIвсыз асквш РФ а-КъральыгIва Дума адепутатква ралхрала анапIщтIыхраква радгалри ракIвыршари йацхърагIаз аъачIвагIагIвчва, ажурналистква драйхIвахIвтI, аразыра швъаква рылттI. Абаза районгьи рылата КЧР амуниципальна районква зымгIва, «Абазашта» газет аредакция, нхарали социальна тшауацIыхрали КЧР а-Министерства, згIвадарахчарала КЧР а-Министерства КЧР Ажвлара палата артшхъвага рквнадыргатI. Асквш 2021 йакIвшаз «Повышение эффективности социальной рекламы в 15 регионах России» федеральна проект апкъ йтата хIреспублика ащтийыгIвчва йлырхыз «В папахе» социальна проект гIалыркIгIатI. Ауи йадынхалыз агвып йрыуата «Эксперт социальной рекламы» хьзы гIарквнадыргатI Фоменко Дарья, Калмыков Дмитрий, Халитова Аксана. Афедеральна арыпхьара проект апкъ йата рдырраква йъарыладырхIаз ахъазла асертификатква гIарырттI Гедегушева Мадина, Атабиева Мария, Чотчаева Малика. Айззара апны «Къарча-Черкес Республика Ажвлара палата ауысла» КЧР ахабза апкъ йтата КЧР Ажвлара палата йалу руысгьи йалапштI. Къарча-Черкес къральыгIва университет аректор Узденов Таусолтан Къарча город а-Дума дадепутатта дъалырхыз ахъазла КЧР Ажвлара палата дгIалырщтхтI, Тоторкулов Ибрагим чкIвыныргIа рполитикала КЧР а-Министерства даунашвачпагIвта дъадыргылыз йгIалцIла КЧР Ажвлара палата апны йхъвдаквцIараква щтIайцIатI. АлачIвара йалаз «Институт семьи, попечительства и усыновления, как основа Государственной политики» нархарала йгIачважватI. Къарча-Черкес апны аны, аба змам, хъпшылыгIвдъа йгIанхаз асабиква зылапш йыцIу аорганква рынхара хъпшылра ахъцIара дгIаквчважватI арыпхьарали наукали КЧР аминистр лзаместитель Атаева Лейла. Ареспублика а-Перинатальна Квта анхара йгIаквчважваз «Центр планирования семьи» аунашвачпагIв Байчорова Руфина коронавирус згIва ангIаджвыквыл угIалагата а-Перинатальна Квта шынхауа, ауаъа йгIаныршу акъральыгIва цхърагIара квпшыраква гIалхIватI. ЗгIвадарахчарали социальна политикали КЧР АуагIа Айззара (а-Парламент) акъральыгIва акомитет апредседатель Хвби ХIасан КЧР апны аны-аба змам, хъпшылыгIвдъа йгIанхаз асабиква зылапш йыцIу аорганква рынхара ауысла ахабза псахра алацIара атахъызтын, КЧР Ажвлара палата йалугьи ражванахъаква гIархIварнысла тшырзынайырхатI. Ауи йшгIаликIгIазла, асаби-йыбаква атгIачваква йрытра ауыс йъалапшуаш айззараква ажвлара гIадымрайгвауата йгьакIвдыршушым. – ЗгIвадарахчарали социальна политикали КЧР АуагIа Айззара (а-Парламент) акомитет, наукала, арыпхьарала, культурала, спортла, чкIвыныргIа руысквала йгьи туризмла КЧР АуагIа Айззара (а-Парламент) акомитет йгьи КЧР Ажвлара палата йрылу тшадхIкIылта асаби-йыбаква руысла ахабза хIадынхалырныс ажванахъа гIазгитI, – йхIватI Хвби ХIасан. Асабиква рхвитнагIаква хчара, ари ауыс йахъпшылуа акъвырльыкъвхартаква рынхара адгалра апны ацынхара магIны шаму гIалылкIгIатI Бондаренко Наталья. Асабиква рхвитнагIаква хчара ауысла аъачIвагIагIвчва йгIалыркIгIаз архъйачIвква, ажванахъаква алачIвара ацIыхъва йнарахвыз арезолюция апны йгIарбапI. Ашвъа аны-аба змам, йыбата йгIанхаз асабиква зылапш йыцIу авласть органква йырзырщтиуаштI.