АСАБИКВА РГIАДЗНЫРГЫЛРА ДАЗЫНХИТI

АгIвычIвгIвыс йбжьара ащата ъагIаджвыквылуа йсабихъа агIан акIвпI. Асаби йылауцIауа ахIаль пшдзаква ракIвпI йбзазара мгIва апны йгIайыхъвахуа. Ан-абачва йырхъазымкIва асабигIзарта анхагIвчвагьи асаби йыгIзара къару щарда аларцIитI. Къвбина кыт йаныргIалу «Амара» сабигIзарта абжьагIвы ГIВАТ Елизавета ЗамахIщари йпхIа сабита лнапIы йгIарыцIцIыз жвабапхьадзара йнадзитI. Лиза асквш 1959 агIан Къвбина кыт дйытI. АтгIачва хвгIвысабичва йнадзун. Ауат раба ЕмгIвыкъва ЗамахIщари асквш 1968 агIан адуней йхIваджьтI. Асабиква рани рандуи йрыгIзатI. Абадъа хвгIвысабичва гIадзынуыргылырныс гьмайрам. Ан Лида швабыжта дгIапсун, щардагьи лчхIатI, ага ауаса йаъазтынгьи, лгIариква зымгIва ртахъы налырхъауа йлыгIзатI. – ХIан рыцхIа зымгIвагьи хIщапIы хIхвынлыргылтI. ДзачIвызлакIгьи ъачIвагIа шхIымазлуш апшта хIалрыпхьатI, хIызрыпшдзуш, ауагIа хвы злахIыквырцIуш ахIальква хIырзылбжьатI. Ауи асквш 2013 агIан адуней лхIваджьтI. ХIанхща Райагьи хIынхвыцыз уалагата адуней лхIваджьындзыкIьара дгIахIцхърагIатI. Ахратла АлахI йыртынчтI, – лхIвитI Лиза. Лиза апхьарта бзита дапхьун. Ауи дангIалга асквш 1974 агIан Черкесск йаныргIалу педагогика училища дыцIалтI. Асквш 1978 агIан Важна квтанай апхьарта апычIв классква рпны арыпхьагIвта далагатI. Дызлашваз агвып гвапата йгIалпылтI, ларгьи ласдза тшрылалыргIващан, лынхара джвыквылцIатI. Лиза ансищымта Къвбина кыт дтыцIуамцара нхара дцун. Ауаса заманкI дынхан, йъахъараз йгIалцIла дгIакъвыцIхын, Джьгваты йаныргIалу апхьарта далагатI. Асквш 1979 агIан Лизи ГIват АхIмади унагIвара гIандыршатI. Асквш 1984 агIан Къвбина йтагылу «Амара» сабигIзарта апны лынхара джвыквылцIан, ужвы йъагIадзазгьи ауаъа дынхитI. – Сара съачIвагIа швабыжта бзи йызбитI. БжьагIвыта уынхарныс гьмайрам. Ансищымта ан-абачва рсаби дуызхъарцIата дануызгIардра, ауи йан лапшта уихъарпазларныс уборчпI. ЧхIара уымазтын, асабиква зымгIва йацапшыта бзи йузыбузтын, пхата уырзаъазтын, дзачIвсабийызлакIгьи ушйачважвуш удыруазтын, даргьи йухIвауа рыларкIуазтын бжьагIвыта узынхуштI. Сара асабигIзарта хIкыт йауата щардагIв ыцIсщттI. Йапхъахауа агвыпква йрыуаз ахIвсси ачкIвынчви дара ргIариквагьи ужвы асабигIзарта йсызгIардитI, – лхIвитI зъачIвагIа сквшщарда йазцIабыргу апхIвыс. ЙанакIвызлакIгьи нхартакI уаналагара уызлашваз агвып магIын ду рымапI. – ХIгвып абагвынгIвыра, ацIагылара, ангIалра, нбжьагIвыгIара хIызбжьата хIынхитI. АсабигIзарта аунашвачпагIв ПIаз Аминат Дмитрий йпхIа йгьи агвып зымгIва швабыжта сырзыразпI, – лхIвитI Лиза. Ауи дызцынхауа агвып ракIвымкIвагьи агвлачвагьи дрынгIалуа дбзазитI. – Лиза дгIвычIвгIвыс лашарата, дгвыцкьата, дпшката акIвпI дшаъу. ЦхърагIара йазыбжу йпны зымгIва рапхъа лара днадзитI. Ауи уыскIла акIвымкIвагьи айъазара хIназыбжугьи тшылзынахIырхалитI. Лиза ланду йгIалшIылкIгIаз ахъацIсра йгьи атамакъыдза рчытIарала дъазапI, – рхIвитI агвлачва хвы лыквырцIауата. Лизи лхъапщыла АхIмади рпщгIвысабичва ъачIвагIа рауырныс ахъазла йрылшуз закIгьи гьгIанырымжьтI. Ани аби ргIариква шви пхи рыквта, йгвапата, руыс нардзата, ражва йазцIабыргта йгIадзындыргылтI. АпщыгIвгьи унагIвапI, йынхата йчахуа йрыуапI. АтгIачва раба дрыгхищтара сынчI