ЗПСАДГЬЫЛ ЙАЗЦIАБЫРГУ АРТИСТ

Къарча-Черкес Республика а-Хъада ТЕМРЕЗОВ Рашид СССР ауагIа рартист, «Спасибо за верность, потомки!» жвлара организация аунашвачпагIв, «Бессмертный полк России» жвлара мгIвайсра аунашвачпагIвчва йрылу ЛАНОВОЙ Василий дйынйатI. Анйара апны артист Абашта айсра Ду йазынарху ауысква йбзазара апны гыларта ду зрыму, йгIадзынгылуа чкIвыныргIагьи йауацIыхта йахаргIвазара затахъу йауацIыхта даквгIашIастI. Темрезов Рашид йшихIвазла, Лановой Василий аспектаклькви акинокви рпны йгIанйыршаз атурасква зымгIвагьи патриотрала йпсыпнкъвгитI. Ауи ахIатырла артист йыршIыйара тшахазыргIвазауа йанакIвызлакIгьи гвалагIваласра гIарыланацIитI. Къарча-Черкес Республика абзазагIвчва зымгIва рыхьызла Темрезов Рашид Лановой Василий разыра ажва щарда йзынайырхатI йгьи «КъарчаЧеркес Республикала гIатгара зму артист» ЧIахIра хьзы шиквнайыргауа гIаликIгIатI. – Уара ршIыйарала угIатгараква рыхъазла рыцIагьи щарда уквнагапI. «Офицеры» фильм апны йгIануыршаз атурасы анцIрала совет кино атурых йгIалахатI. ХIапхъахьылагьи уыршIыйара гIатгараквала хIшуыргвыргъьуш кьангьашра гьазгIазгуам, – йхIватI Темрезов Рашид. Лановой Василий Черкесск город акультура Тдзы апны йакIвйыршаз амоноспектакль йапшыз заджвгьи гвалымста дгьгIаннамжьтI. Артист ду йгIачважвара далагара апхъала дызлаз афильм бергьыльква ршIчIвараква гIадырбатI. Капитан Грэй, Корчагин Павел, Курагин Анатолий, Вронский Алексей ртурасква бзидздзата йшгIахъитIыз, «Офицеры» фильм апны Варрава Иван дшгIайырбаз апшыгIвчва анцIрала ргвы йгIатахатI. Лановой Василий атеатр апны йгIанйыршаз атурасква 60 йнадзитI, акино апны – 80. Артист йквпшыра, йгвалымсра, йпатриотра арежиссерква йанакIвызлакIгьи дахIврала йгIадрысабапуан йгьи йгIадрысабапитI. Ауи афильмква рпны йхIвуз «На безымянной высоте», «Бери шинель, пошли домой», «А мы с тобой, брат, из пехоты», «Белорусский вокзал» ашваквагьи быжьгатI, апшыгIвчвагьи пшдзата йацырхIватI. Лановой Василий дацIарпххата, дхIагIата, дгватшныта асцена дангIаквыл, азал йыгIвназ напIасра дула йпылтI. Ауи йгIачважвара апны сквш 61 цIуата Вахтангов Евгений йыхьыз зхъу атеатр апны дъанхауа йхъа шаладухауа гIаликIгIатI. Артист асквш 2019 январь йысквш 85 йыртлапIуштI. Ага ауаса йаъазтынгьи, йъачIвагIа хъвдаквцIараква йырхъазымкIва ажвлара уысквагьи джьгарта дрылапI. Асквш 1979 агIан ауи ашвъаквала йалу «Великая Отечественная» фильм бжьы ацIайцIатI йгьи Ленин йсогIа гIайквнадыргатI. Ауи «Армия и культура» Фонд дапредседательтI. Артист «Бессмертный полк» мгIвайсра адгалагIвчвагьи дрылапI, адунейла къраль 80 ъагIацIанадыркIызгьи щтадъа йшгIанымхуш йазхъайцIитI. Аконцерт амщтахь Лановой Василий ареспублика хабарргагаква злаз пресс-конференция акIвйыршатI, ажурналистква разцIгIараква джьауап риттI.