АуагIаква рацзакIыра
а-Мш йадахIвуата Россия
Федерация асубъектква
зымгIва рпны йызкьазууыз
«Большой этнографический
диктант» акция
акIвшатI.
Къарча-Черкес Республика
а-Хъада ТЕМРЕЗОВ
Рашид Къарча
город йаныргIалу й-3-хауа
квтанай апхьарта апны
йакIвшаз «Большой этнографический
диктант»
акция далан. Ауи йацыркIтI
РФ а-Федеральна Айззара
а-Федерация а-Совет
йалу САЛПАГАРОВ
Ахмат, Къарча-Черкес
Республика АуагIа Айззара
(а-Парламент) а-Председатель
ИВАНОВ Александр,
ауагIахъа уысквала,
ажвлара коммуникацияквала
йгьи печатьла
КЧР аминистр ХАПИШТОВ
Мурат, арыпхьарали
наукали КЧР аминистр
КРАВЧЕНКО Инна,
Къарча город амэр
ДИНАЕВ Алик, агород
абзазагIвчва, апхьагIвчва,
астудентква.
Адиктант джвыкврымцIаскIва
адепортация йаладзыз
акъарча уагIахъа
рхъмаштылра дакъикъа
йгылтI. УадыргIвана азцIгIара
30 зныз ашвъабыгъьква
зымгIвагьи йрыларшатI.
АзцIгIараква
йрыуата а 20 Россия Федерация
ауагIахъаква
рцIасква, ркультура, рэтнография,
а 10 КъарчаЧеркес
Республика абзазагIвчва
рылкIгIараква
йырзынархан.
ЙакIвшаз акция йалаз
зымгIвагьи рылшаракви
рдырракви рырхъвыхра
йацхърагIатI. Къарча-Черкес
Республика а-Хъада
Темрезов Рашид адиктант
йаналга ауи йалаз
тшырзынайырхатI:
– «Большой этнографический
диктант» Россияла
асквш 2016 йгIашIарышвта
йакIвшитI. Ауи
хIхаквлагIвчва йырхъазымкIва,
агIвымакъральква
рбзазагIвчвагьи гIалалитI,
рдырраква дырхъвыхитI.
Россия йабайара
хъаду абзазагIвчва
ракIвпI. УагIахъипхьадза
ркультура, рцIасква, рылкIгIара
джьащахъваква
рхчара магIын ду амапI.
АзцIгIараква зымгIвагьи
джьащахъван, ймайратагьи
гьузымхIвушызтI, – йгIаликIгIатI
Темрезов Рашид.
Къарча-Черкес Республикала
«Большой этнографический
диктант»
13 шIыпIакI рпны йакIвшитI.
Хысквша цIуата
Черкесск йаныргIалу Никулин
Сергей йыхьыз
зхъу асаби библиотека
здырраква зырхъвыхырныс
зтахъу хIхаквлагIвчва
рыхъазла ашвква атIитI.
ХIреспублика аквта йаныргIалу
аквтанай апхьартаква
рапхьагIвчва,
арыпхьагIвчва, йапшым
аъачIвагIагIвчва акция
йацыркIтI. ЙгIвысквшахауата
ауи далалитI Черкесск
й-3-хауа апхьарта
й-9-хауа акласс апхьагIв
КРЕТАЛОВА Екатерина.
АпхIвыспа йшылхIвазла,
йагIвсыз асквшгьи азцIгIараква
30 йнадзун. Ауат
йрыуата 23 джьауап рылттI.
– ХIызту асквш йгIахIыртыз
азцIгIараквагьи
джьащахъвапI. Россия
абзазагIвчва рэтнография,
рхабзаква, ркультура
цIолата йссырдырра
ахъазла книга щарда
срыпхьитI. Адиктант агIарбараква
а-Конституция
а-Мш, декабрь а 12 йадахIвуата
йгIарпхьадзахуаштI,
– йгIалылкIгIатI Екатерина.
«Большой этнографический
диктант» акция
Абаза районлагьи йацыркIтI.
Къвбина квтанай
апхьарта апны арайон абзазагIвчва
йрыуата 50-гIвы
рдырраква дырхъвыхтI.
«Большой этнографический
диктант» акция
акIвыршара цIас пшдзата
йалтI, ауи йацызкIуа
рпхьадзарагьи ансисквша
йалахIитI. ЙагIвсыз
асквш хIреспублика йабзазагIвчвата
ауи 400-гIв
ракIвызтын йалаз, хIызту
асквш гIванла йгIарылахIатI.
Получайте свежие новости на электронную почту
Комментарии