АЗГIВАДАРАХЧАРА ЙХЪАДУ НАРХАРАЗЛУШТI

Къарча-Черкес Республика а-Хъада ТЕМРЕЗОВ Рашид йгIаджвыквцIарала йгьи згIвадарахчарала РФ аминистр СКВОРЦОВА Вероника лцхърагIарала Москва апны хIыштала амедицина уысква рагъьчIвра йазынарху алачIвара адыргалтI. Ауи акIвлыршатI згIвадарахчарала РФ аминистр лзаместитель ЯКОВЛЕВА Татьяна. АлачIвара йалан КЧР ахьызла Россия а-Федерация а-Совет йалу САЛПАГАРОВ Ахмат, КЧР а-Правительства а-Председатель йзаместительква СУЮНОВ Джанибек, ГВАГВ Мадина, згIвадарахчарала КЧР аминистр ШАМАНОВ Казим, КЧР-ла ащацага Квта аунашвачпагIв ТЕМРЕЗОВ Марат. Айззара апны Россия Федерацияла згIвадарахчарала а-Министерства йаланакIуа адепартаментква рунашвачпагIвчва КъарчаЧеркес апны амедицина атшауацIыхра амгIва йштагылу гIалыркIгIатI, «ЗгIвадарахчара» йгьи «Демография» уагIахъа проектква рырхъйарала йаъу абаргвыраквагьи йрыквгIашIастI. Яковлева Татьяна йшылхIвазла, асквш ацIыхъвадза КЧР зланамкIыз анархараквала ахIвара швъаква рщтийырныс рылшуштI. Ауи ареспублика медицина нхартаква рырчIаджьра, ргIаршIыцхра, Черкесск йачвыхъару акытква рпны айъазартаква медицина транспорт рзалхра датшагьи анархараквала йчпачIву гIалырбатI, КЧР а-Хъада йахIвара йацыркIуата йгьи Къарча-Черкес асквшы 100 йадахIвуата хIышта апны ачымазагIвтара шIыцква шыруыхвуш лхIватI. – УахьчIва йакIвшаз алачIвара амагIны дута йспхьадзитI, – йхIватI Темрезов Рашид. – ХIышта апны йгIайуа ахысквша руацIа амедицина тшауацIыхрала йхIырхъйуш ахачIвква ацлыхIхтI. «ЗгIвадарахчара» уагIахъа проект апкъ йтата йхIырхъйуш ауысква агIвычIвгIвыс йыхъазла рыцIа йхъаду – йынцIра йгьи йызгIвадара рхчара йырпщылапI. Яковлева Татьяна хIреспублика а-Хъада йгIаджвыквцIарала йакIвдыршаз алачIвара сабапра шалу гIалылкIгIатI. – Россия йаланакIуа анахьанат аштаква рыхъазла ари анйара швапха бзипI, – лхIватI ауи. – РФ а-Президент Путин Владимир йтшазынархара апны йгIаликIгIаз ахачIв хъадаква – агIвычIвгIвыс йгIаницIуа аныбыжь щтIыхра, азгIваква ргIашIакIрала амальква рымчра хIырзынхуштI.