2015 гъэм жэпуэгъуэм (октябрым) и 25-р Къэбэрдей-Балъкъэрым хыхьэ Зеикъуэ (ХьэтIохъущыкъуей Ипщэ) къуажэм и тхыдэ къулейм Iуэхугъуэ гукъинэжхэмкIэ гъэнщIа махуэ угъурлыуэ хыхьэнущ. А махуэм Iэтауэ ягъэлъэпIащ жылэр илъэс щиплI зэрырикъур. Я щхьэм, я блэкIам пщIэ зэрыхуащIыжым, я къэкIуэнум зэрегупсысым и щыхьэту, жьыуэ хузэщIэтэджат зеикъуэдэсхэр я гуфIэгъуэм. Дунейр уфауэ нэху къекIами, цIыхухэр нэжэгужэт, инми цIыкIуми зыкърахт, къапэплъэ Iуэхухэм хуэжыджэрт. Къэрэшей-Черкесым икIа хьэщIэхэри махуэщIым еблэгъащ. Апхуэдэу, гуфIэгъуэ пшыхьым хэтащ Къэрэшей-Черкесым и Iэтащхьэмрэ и Правителствэмрэ я Администрацэм и тхьэмадэм и къуэдзэ Астэжь Франческэ, КъЧР-м и ЦIыхубэ ЗэIущIэм (Парламентым) промышленностымкIэ, транспортымкIэ, ухуэныгъэхэмкIэ, энергетикэмрэ связымрэкIэ и комитетым и унафэщI Къэзанокъуэ Кърым, республикэм и районхэм я лIыкIуэхэр, жылагъуэ лэжьакIуэхэр, творческэ гупхэр. Къуажэм и дыхьэпIэм деж абыхэм къапежьащ хьэгъэрейхэр, адыгэм зэрихабзэу, Iэнэр узэдауэ, махъсымэр бжьэшхуэм иту яIыгъыу. Сэлам гуапэ зэраха, зэщIэупщIа нэужь, ахэр екIуэлIащ дауэдапщэр здекIуэкIыну щIыпIэм. Шафий Хьэчим и цIэр зезыхьэ курыт еджапIэм ныбжьыщIэхэр куэду щызэхэтт, абы къыщыхалъхьэну конференцым хэтыну хьэщIэхэр кърагъэблагъэт, къуажэм къыдэкIа еджагъэшхуэхэм, тхакIуэхэм я IэдакъэщIэкIхэр, я цIыху цIэрыIуэхэм ятеухуа тхыгъэхэр щызэхуэхьэса гъэлъэгъуэныгъэм ирагъэплът. — Мы гъэм, жэпуэгъуэм (октябрым) и 10-м Къэрэшей-Черкесыр зыгъэбжьыфIэ, ди хэгъуэгум пщIэрэ щIыхьрэ щызиIэ Зеикъуэ къуажэм, Къэзэнокъуэ лъэпкъым я лъэIукIэ, къахуеблэгъауэ щытащ Къэбэрдей щIыналъэм я къуажэ тхьэмадэу къалъытэ Зеикъуэ къуажэшхуэм и лIыкIуэхэр. Махуэ псом гуфIэгъуэкIэ зэхэтауэ, хьэщIэхэр щыдгъэкIуэтэжым, Къэбэрдейм хыхьэ Зеикъуэм — ХьэтIохъущыкъуейм и Iэтащхьэ Къармокъуэ Гъумар зыкъытхуигъазэри къыджиIащ жэпуэгъуэм и 25-м къуажэр илъэс 4
00 зэрырикъур зэрагъэлъэпIэнур, икIи гуфIэгъуэ дауэдапщэм дыхэтыну дригъэблэгъащ. МахуэщIыр къыщынэсым, ди хэгъуэгум икIа лIыкIуэ гуп къуэш республикэм дыкIуащ, — дыхегъэдаIуэ лIыкIуэхэм яхэта Къэзэнокъуэ Хьэсэмбий. Япэ щIыкIэ конференц зэхашащ. Ар иригъэкIуэкIащ «Адыгэ псалъэ» газетым и редактор нэхъыщхьэ, Къэбэрдей Адыгэ Хасэм и тхьэмадэ ХьэфIыцIэ Мухьэмэд. ТхакIуэ Къэрмокъуэ Хьэмид, КъБкъУ-м и профессорхэу Унэж Чэшиф, Шурдым Барэсбий сымэ ХьэтIохъущыкъуей Ипщэм и тхыдэм зэпкърыхауэ къытеувыIащ, цIыхубэм IэфIу ягу къинэжа, зи фэеплъхэм дапщэщи пщIэ хуащI нэхъыжьыфIхэу зэман жыжьэм икIи хъыжьэм щхьэмыгъазэу лъэпкъым хуэлэжьахэм, я пщIэмрэ я щIыхьымрэ зыхъумахэм я шыфэлIыфэу щытар, ягъэхъахэр зэхуэсахэм хуаIуэтащ. Зытраухуа пIалъэр къыщысым, Зеикъуэм и илъэс щиплIым хуагъэхьэзыра нэгузыужь Iуэхугъуэхэр, лъэр щIэзыгъэкI макъамэхэм щIэту, щэнхабзэмкIэ Унэм и пщIантIэшхуэм щызэхаублащ. ГуфIэгъуэр даIэтыну къуажэдэсхэм къахуеблэгъат Къэбэрдей-Балъкъэрым и премьер-министрМусуков Алий, Бахъсэн муниципалнэ щIыналъэм и щIыпIэ администрацэм и Iэтащхьэ Сыжажэ Хьэсэн, КъБР-м и Парламентым хабзэкъэгъэщIымкIэ, къэрал ухуэкIэмрэ щIыпIэ унафэр зегъэкIуэнымрэкIэ и комитетым и унафэщI Мэлбахъуэ Борис, нэгъуэщIхэри. Къуажэ администрацэм и Iэтащхьэм и къуэдзэ ХьэцIыкIу Заур махуэшхуэ зэхыхьэр къызэIуиха нэужь, Мусуков Алий къызэхуэсахэм фIэхъус псалъэкIэ захуигъэзащ. — ПщIэ зыхуэтщI зеикъуэдэсхэ, хьэщIэ лъапIэхэ! Къэбэрдей-Балъкъэрым и Iэтащхьэмрэ и Правителствэмрэ я цIэкIэ республикэм дежкIэ мыхьэнэшхуэ зиIэ нобэрей гуфIэгъуэ Iуэхугъуэм хэт псоми сэлам гуапэ фызох, Зеикъуэ къуажэр илъэс щиплI зэрырикъумкIэ сывохъуэхъу. Фи жылэм и тхыдэ хьэлэмэтыр зэман жыжьэм къуэпс быдэкIэ зэрапыщIар мы зэхыхьэм къегъэлъагъуэ. Ижь-ижьыж лъандэрэ фи адэжьхэр мы щIыпIэм щыпсэуащ. Абыхэм къадекIуэкIа, ди нобэм къынахьэса хабзэхэм, ину фригушхуэ хъунущ. Апхуэдэщ тхакIуэ, щIэныгъэлI, артист, спортсмен цIэрыIуэхэр, къэрал лэжьакIуэхэр. Нобэрей фи щIэблэр абыхэм я щапхъэм зэрытетыр, а хабзэ гъуэзэджэхэр зэрахъумэр, зэрагъэбагъуэр гуапэщ. Къэрал дамыгъэ лъапIэхэр зыхуагъэфэща лэжьакIуэфIхэр фи мащIэкъым. КъинэмыщIауэ, нобэрей гуфIэгъуэ махуэм ехъулIэныгъэщIэкIэ фрохьэлIэри, мамыр гъащIэ, зыузэщIыныгъэ фиIэну, щIэныгъэм, егъэджэныгъэм, щэнхабзэм я IэнатIэхэм зэфIэкI къыщывгъэлъэгъуэну, фи унагъуэм, республикэм, ди Урысей къэралыгъуэм я сэбэп зыхэлъ IуэхуфIхэр къывэхъулIэну си гуапэщ, пщIэ зыхуащI зеикъуэдэсхэ! — къыхигъэщащ Къэбэрдей-Балъкъэрым и премьер-министрым. Къэрэшей-Черкесым и Iэтащхьэмрэ ди хэгъуэгум щыпсэухэмрэ къабгъэдэкIыу Астэжь Франческэрэ Къэзэнокъуэ Кърымрэ къызэхуэсахэм яхъуэхъуащ икIи къуажэм и администрацэмрэ зы еджапIэмрэ компьютер зырыз тыгъэ хуащIащ. Хъуэхъухэр зэфIэкIа нэужь, артист ныбжьыщIэхэм зыкъагъэлъэгъуащ, творческэ гупхэм, уэрэджыIакIуэ цIэрыIуэхэм концерт купщIафIэ ятащ. Источник: riakchr.ru
Комментарии