«ЙХIХАУА АУЫС МАГIНЫ АМАПI»

МосковскІа поселок азъазара апхьарта йагъьу аъачІвагІагІвчва йрылапхьадзу ужвыгьи хІыгІвычІвгІвыскІ швлабахІырдырра хІтахъыпІ. Сольфеджио, музыка литературала йгьи музыка гІальмала атеория дисциплинаква рхъвшара апны йалрыпхьитІ йхІаракІу категория зму арыпхьагІв ЛАГІВЫЧВ (МалхІваз) Ольга Абдул йпхІа. Ауи йшылхІвауала, музыка ъагІалылхыз лани лаби йырбзирапІ. РтгІачва Карачаевск йанбзазузгьи, Псыжв кыт йангІайхгьи, ауи гькІалдмыррышвтІ. – Сара санхща Тобыль Нурйа Тольыстан йпхІа слыдкІылата сгІадзынгылтІ, – лхІвитІ Ольга. – Йауа ухІварыквын, Псыжв хІангІайх, амузыка кІасымрышвхра ахъазла сани саби Черкесск йапхъахауа амузыка апхьарта срымщтикІва йыгьрымуытІ. МшигІадза акыт сгІатыцІуамца агород агІайра, йалкІгІата агъныла, баргвын. АлахІ йбзирала, Нурйагьи Карачаевск дгІатыцІхын, Черкесск дгІайхтІ. Быжьсквша амузыка апхьарта съадзацузгьи, ауи амщтахь Черкесск амузыка училища сыцІалта сгІалганадзыкІьагьи ауи лпны саъата сбзазатІ. Уыста уыздкІылазлакІгьи джьауапкІра уыламкІва дахІвракІгьи ушазынамдзуш сыласзыркІыз Нурйа лакІвта йспхьадзитІ. АршІыйагІв апхьахьа ду, абызшвадырыгІв, абаза ажвар алазцІаз лъахІыль бергьльы Тобыль Нурйа Тольыстан йпхІа лхъа шлыладууыз, ауи швапхата дшылзалуаз гІаугвынгІвитІ. Ольга амузыка училища дангІалга амщтахь Устьджьгваты город акультура Тдзы, уацІыхъван Псыжв аквтанай апхьарта пениела арыпхьагІвта дынхатІ. Апхьарта йаланакІуата Псыжв апны йапхъахауата музыка апхьарта агІахътIра збзиру аъачІвагІагІвчва Ольга Абдул йпхІагьи дрылан. Йшбергьльу апшта, ауи амузыка апхьарта анцІра ауырахатІ, заманкІ анахъыцІ тыдз кІьыдагьи азалырххын, абар уыжвгІандзарагьи йынхитІ, Псыжв саби азъазара апхьартахІва ахьыз дута йгитІ. Акультура зны йапщылахаз агІвычІвгІвыс ауи зынгьи йгьизыкІарышвхуам, – рхІвалитІ. Ауи зынгьи йымдзуа йгьи ажвлара псыпта йырзалуа нархарапI. Ольгагьи унагІвара далалта Къвбина кыт анылбзазартаха щарда дымпшгІауата нхара гІалаутІ. МосковскІа поселок йапхъахауа асабигІзарта ддрайгван, 12 сквша руацІа ахвыцква музыка йазылбжьауа дынхатІ. – Уъатахъу, амаль амамкІва швхІаусыгІвакІла йара уагуштІ, – лхІвитІ амузыкант. – АсабигІзарта апны сызланхуз апианина абжьы ацакІын, ари амузыка апхьарта настройщик сизыпшгІауата акІвпІ йапхъахауата сшгІанагыз. Ауи сйызпшуа акоридор съадзагылаз ссабихъа сташвахызшва йызбатІ – зджьарала аскрипка абжьы гІагІвынггІитІ, датша зджьара пианина йаситІ, рыцІа хъарата аккордеон абжьы гІахІвачвитІ. Адиректор Каспарянц Эмма ъачІвагІагІв бзикІ даъата йылдыруата дгьагІвлымщтуашызтІ. Лпны нхара сгІамикІва сцІыхъва дыгьтымцІтІ, ауи уыжвгІандзарагьи сылзыразпІ, абар сквш 27 руацІа йсгвапхадзауата араъа сынхитІ. Ауи йахъазымкІва, йхІаргвану аквтанай апхьартаква зымгІвагьи амузыка рдырра йшгІацІанахІыркІуаш хІащтапІ. Къвбина апхьартагьи щарда хІцауамцара акыт асабиква хІрыдынхалтІ. Амузыка ауагІа йрылагІгитІ, асабиква йшхвыцыркІву уалагата ауи гІаргвынгІвуа, классика, уагІахъа макъым ззырхІвауа рзалыргауа йыгІбжьитІ. Амузыка гІазгвынгІвуа агІвычІвгІвыс йхІальгьи йдунейпшыщагьи датшапІ, йзаман зынгьи ахъазыкІ йгьирыдзуам. Сара теория акІвызтІхІва йызласрыпхьауа, ауагІахъа макъымква шрылазгушгьи ацІыхъва стагылапІ. Ареспублика семинарква рагІан йхътІу апхьара сахІатква акІвсыршитІ. «Мелодии Кавказа», «Ритмы Кавказа», «Къарча-Черкес акомпозиторква» темаквала йсрыхІазыруа асахІатква рпны Дагвжвей Марина Мерам йпхІа йылбжьауа акъвабызч шІаквала йанакІвызлакІгьи бзита дгІасцхърагІитІ. Асабиква рыхъазлагьи ауи файда алапІ, йызсуа амакъым запш уагІахъу йызчІву рдыруа йабжьитІ. Ольга Абдул йпхІа амузыка атеорияла йалрыпхьаз йрыуата щардагІвы лхъа рыладупІ. НАЗИРОВА Динара допера ашвахІвагІвхатІ, Франциягьи дынхатІ, ужвы Адыгея дбзазитІ; АЛЬБОРОВА ФатІима Черкесск акультури азъазари рколледж йгьи Саратов консерватория дгІарылгатІ, аколледж дгІахъынхІвыхын, йагъьу арыпхьагІвчва дрылапхьадзапІ; БОЧАРОВА Ирина Краснодар культура институт дгІалгатІ; КІЬЫЩМАХВА Олеся Черкесск акультури азъазари рколледж дгІалган, ужвы Краснодар культура институт дапхьитІ; САХРАТУЛЛИНА Фидания Ставрополь музыка училища йгьи Къарча-Черкес къральыгІва университет дгІарылгатІ, ужвы МосковскІа азъазара апхьарта йгІайуа асабиква дрыдынхалитІ. Ажва аламкІва, арыпхьагІв лыхъазла лкъару злалцІаз адахІвраква ъарыму гІатгара дупІ, йалкІгІата ауат рынхарагьи амузыка йъапщылахаз йылчпауа ауыс шатахъдзу рыцІагьи йазхъалнарцІитІ. – ХІзаман агІан музыка апхьарта йнарахвра ахъазла анкъвакъврала йгІалырхуан, тыпкІ хвгІвыцыгІв азабакІуан. Ужвы ахъаз быжь мачІкІ ахІа йымамызтынгьи, хІгвыргъьауа дгІахІахвитІ, закІ шгІайылхІцуш хІащтапІ. Ажва аламкІва, асабиква талант зму рылапІ, йыртахъзаджвыкІызтын, хІрыдынхалырныс хІхІазырпІ. Ан-абачвагьи ауи йайгвыргъьитІ, йауа ухІварыквын, дара анхарта йъадзану рсабиква хІхъпшылра йацІапІ, чІыдахъвы аурам йбжьамкІва магІны зму уыскІ йадкІылапІ. Рконцертква адыгІгаллитІ, йапшым ашІыпІаква йыгІгумца амузыка бзазара шІыцрата йгІалалуа йахахІыргІвазитІ. ЙгІасахвпІта, «Лебединое озеро» балет йахІырпшырныс Ставрополь йыгІган, лахІварата йгІарыланацІаз гІвына амамкІва хІгIайхтІ. Ауи апшымца апхьарта аршІыйара бзазара швабыжта йалачпапІ, йджьащахъвапІ. Йапшым азъазара хъвшараква рпны тшызбжьауа асабиква 400-гІв йрайхІапІ. Ауылагьи гвынгІвырапІ йхІхауа ауыс магІны шаму йгьи йшатахъу, – лхІвитІ арыпхьагІв. Ольга Абдул йпхІа хгІвысабичва дранпІ, АхІба Анвер динженер-механикпІ, Эльвира дбухгалтерпІ, Диана дизайнерта дапхьатІ. АхІвсса датша ъачІвагІа гІалырххызтІхва, ран лапшта амузыка йазаргванпІ, агІвыджьгьи амузыка апхьарта йцун, Эльвира йхІаракІу апхьарта апхъала Черкесск амузыки акультури рколледжгьи дгІалгатІ. Ан йшылпхьадзауала, лгІариква ъанхалакІгьи аршІыйара йгІарыланацІаз ахІаль бзиква йанакІвызлакІгьи къарута йырзалуаштІ. Ари аъаща уахьчІва дыздынхалуа асабиквагьи йрылалцІитІ.