АНКАРАДА АИТУВЛЫ ШАЙИРДИНЪ АКЫНДА

2019 йылдынъ 23 январинде Анкарада, ТЮРКСОЙ ямагатшылык бирлесуьвининъ штаб-квартирасында белгили ногай шайири Кадрия Темирбулатовадынъ 70 йыллыгына багысланган конференция озды. Бу амаллама «Тюрк дуныясынынъ данъклы инсанлары» деген лекциялар санында он биринши болды. Конференциядынъ куллыгында ТЮРКСОЙ организациясынынъ генераллы секретари, ваькил элши Дюсен Касеинов, Турцияда Таджикистаннынъ ваькил элшиси Махмадали Раджабиен, политикалык илмилер кафедрасынынъ заведующийи, Турция Республикасынынъ президентиндеги кавыфсызлык эм тыскы политикасы бойынша советининъ агзасы, доктор Исмаил Сафи, А.Ясави атлы халклар ара казах-туьрк университетининъ попечительлер советининъ председатели, доктор Муса Йылдыз, Гази университетининъ педагогикалык факультетининъ профессоры доктор Дилек Эргененч, ногай тюрклерининъ маданият эм биргелес демевлик ассоциациясынынъ генераллы председатели Мухаррем Йылмаз, Дагестанда ногай тилинде шыгатаган «Шоьл тавысы» газетасынынъ бас редакторы Эльмира Кожаева, яс шайир Айзанат Камалдинова, Анкарада ногай диаспорасынынъ коьплеген элшилери эм саниятты эм маданиятты суьювшилер катнастылар. Конференциядынъ ашылувында Д.Касеинов 2017 йылда басланган ис - атларын дуныялык оьлшемде яйылдырув мыратта «Тюрк дуныясынынъ айтувлы инсанлары» деген лекциялар сериясын бардырувы акында айтты. «Сосы конференция ман биз ногай шайири тувган тилин оьрлендируьвге уьйкен косымын эткен, ама яшавдан эрте кешкен Кадрия Темирбулатовадынъ ярык эстелигин сыйлаймыз. Биз дуныялык ямагатшылыгын ногай халкынынъ алал кызы ман таныстырмага аьзирмиз», - деди Д.Касеинов. Исмаил Сафи оьзининъ соьзинде ТЮРКСОЙ-дынъ аьрекетининъ маьнелигин белгиледи. Бу организация оьзининъ 25 йыллыгын белгилейди эм 250 миллион аьдем саналган тюрк дуныясынынъ бай маданиятын яйылдырувда «Тюрк дуныясынынъ ЮНЕСКО-сы дел белгили эм тюрк маданиятынынъ Халклар ара организациясына айтувлы ногай шайири Кадрия Темирбулатовадынъ эстелигине багысланган амаллама уьшин разылыгын билдирди. Мухаррем Йылмаз белгилевинше, ногай адабиятынынъ бийиклевлерининъ бириси Кадрия Темирбулатова болады. Онынъ аты Эльмира Кожаевадынъ документальли фильми мен оьмирлендирилген. Хошлав соьзлерден сонъ, Дилек Эргененч эм Эльмира Кожаева шайирдинъ яшавы эм яратувшылыгы акында доклад Айзанат Камалдинова Кадриядынъ ятлавларын окыды. Амалламадынъ барысында уллы шайирдинъ яратувшылыгы акында режиссер Э.Кожаева аьзирлеген «Кадрия» дел аталган художестволы-документальли фильм коьрсетилди. Ногай сазшылары Арсланбек Султанбеков эм Ислам Сатыров Кадриядынъ соьзлерине язылган йырларды йырладылар, а Зехра Эргин ногай халкынынъ биювлерин бийип коьрсетти. Конференциядынъ ызында ТЮРКСОЙ-дынъ басшысы Дюсен Касеинов доктор Исмаил Сафиге, профессор, доктор Муса Йылдызга, белгили ногай артисти Арсланбек Султанбековка ТЮРКСОЙ-дынъ 25 йыллы гына эстеликли медальлерди берди, амалламадынъ баьри катнасувшыларына эстеликли савгалар берилдилер. «Кадрия» дел аталган художестволы-документальли фильми уьшин Э.Кожаева Чингиз Айтматов атлы Орденге тийисли этилди. Ногай шоьлининъ давысы Кадрия Темирбулатовадынъ эстелигине багысланган кезуьвли конференция ерли ногай диаспорасынынъ коьплеген элшилерининъ катнасувы ман Турциядынъ Адана каласында озды. Амалламада ТЮРКСОЙ организациясынынъ генераллы секретари Дюсен Касеинов, Адана каласынынъ мэри Хюсейин Сезлю, доктор Мухаррем Йылмаз, Аданадынъ крым татарларынынъ ассоциациясынынъ сыйлы президенти Фатих Караянды, бу ассоциациядынъ президенти Ханде Боздоган, коьплеген конаклар катнастылар. Оьзининъ соьзинде ТЮРКСОЙ организациясынынъ басшысы Д.Касеинов ортак тюрк маданиятын саклав эм яйылдырув бойынша ТЮРКСОЙ-дынъ аьрекети йыл сайын оьседи, дел белгиледи эм Аданадынъ мэри Хюсейин Сезлюге сосындай амалламаларды аьр яклы демеви уьшин разылыгын билдирди. Оьз кезуьвинде Сезлю оьзи де ногайлардынъ эм крым татарларыныъ коьплеген диаспоралары яшайтаган Джейхун юртында оьскени акында хабарлады, эм сосындай маьнели амалламады уйгынлавы уьшин Д.Касеиновка разылыгын билдирди. Хошлав соьзлериннен сонъ, профессор, доктор Дилек Эргененч эм Эльмира Кожаева Кадрия Темирбулатовадынъ яшавы эм яратувшылыгы акында докладлар ман соьйледилер. Яс шайир Айзанат Камалдинова К.Темирбулатовадынъ ятлавларын окыды. Амалламадынъ барысында ТЮ РКСОЙ, Эльмира Кожаева, Арсланбек Султанбеков эм Ислам Сатыров аьзирлеген программа коьрсетилди.