«ХIГIВАЩАРНЫС ХВИТНАГIА ГЬХIЫМАМ»

Асквш 2012, сентябрь агIан РФ а-Генеральна прокурор й-Унашвала Россия аштаква зымгIва рпынгьи правовая статистикала ахъвшараква гIандыршатI. РыцIа йпхатшу асубъектква рпны УнашвахъцIартата йырчпатI, Къарча-Черкес йапшу йдучвам аштаква рпны хъвшарата йщаквгылтI. ХIреспублика апрокуратура апны правовая статистикала ахъвшара зтшын йгIандыршаз ауи даунашвачпагIвпI аюстиция акьангьашагIв ахIба КВАБАЛ Руслан УагIвырльы йпа. Ауи сквшгIважви закI апрокуратура органква дрылапI, щтанкъвцагIвыта Черкесск город апрокуратура апны йынхара джвыквицIатI. Асквш 2008, февраль йгIашIарышвта ареспублика прокуратура РФ ащтанкъвцара комитет аорганква рпны апроцессуальна уысхара хъпшылра ахъцIарала йгьи ауголовна-суд хъвшараква рпны дынхатI, ажвлара хабарргагаква рыцынхарала дцхърагIагIв ахIбан, архъвыхра йгьи архъйара нхараква адгалрала дцхърагIагIвын. – Правовая статистикала ахъвшара шIыцта йгIандыршаз йрыуапI ухIва ауаштI, угвгIанаграла апхьадзараква ауи аъара магIны зазырбаз ачIвыйа? – тшизынасырхатI ахъвшара аунашвачпагIв. – ЙыздырхитI асквш 2009 агIарбараква йырзынархаз РФ а-Генеральна прокуратура алачIвара апны ауи агIан йпрезидентыз Медведев Дмитрий дгIачважвауата ауголовна чвгьахараквала апхьадзараква дрыквгIашIасуата йхIваз ажваква – «Ауат апхьадзараква ъадзатамаму гьсыздырам. Чвгьахара мильуан – аныла, чвгьахара мильуан – арыла. ЙгIаншауа гьгвынгIвырам...» СгвгIанаграла агIачважвара амщтахь астатистика йазалху ахъвшараква ргIаныршара йазхъвыцзапI, – йхIватI Квабал Руслан. – ХIхъвшара хачIвыта йаму чвгьахарата ашвъа йанырцIауа, йгIахъыртIуа, ачвгьахараква зымгIва шалу рпхьадзара ъадзатамаму хъпшылра ахъцIара акIвпI. УахьчIвала хIхъвшара аоперативна нхагIвчва хгIвы йгьи аъачIвагIагIв хъадаква гIвыджь йнадзитI. Арайонква рпны ахъвшараква гьаъам, архъвыхраква хIкъарула йакIвхIыршитI. Ауи йшгIаликIгIазла, правовая статистикала ахъвшара ареспублика прокуратура ахъвшараква зымгIвагьи йрыцынхитI, йауа ухIварыквын, апхьадзараква ъатахъым нархаракIгьи гьаъам. Йара ауаса ачвгьахараквала ащтанкъвцара акIвзыршауа ареспубликала ахабзахчара органква зымгIвагьи йрыцынхитI, ауат ротчетква апхъапхъа правовая статистикала ахъвшара рылапшитI, архъвыхра амщтахь акIвпI Москва зунашва йацIу аведомства йырщтийырныс йанахвиту. – Астатистика ахъазыкI пхьадзара бахызшва йубауазтIхIва, ауи йгIаныцIуа, йащтагIайуа щардапI, – йхIвитI Квабал Руслан. – Апхьадзараквала йщаквгылу аъаща гIадырбитI, ауи йгIаквхта апхъала хачIвква лырхитI. Ауи акIвпIта, хIхъвшара анхара амагIны дупI, джьауапкIра ду апщылапI. ХIара йхIырхъвыхта йырнапIыцIашвауа апхьадзараква хIпрокуратура аунашвачпагIвчвагьи аквгIашIаситI, РФ а-Генеральна прокуратура аколлегия апынгьи йгIарылархIвитI. ПхьадзаракIла хIгIващазтын, йщаквгылуаш аъаща датшахитI. Ауи ахIатырла хIгIващарныс хвитнагIа гьхIымам, аквымшваракI ахъазла дзачIвунашвачпагIвызлакIгьи джьауап мчы йкIуаштI. Апхьадзараква рцIабыргыра магIныта йазырбауа йаквшахIатпI хIреспублика прокуратура ахъвшараквагьи йгIадырбауа апхьадзараква хIырхъвыхырныс хIъахвиту. Ауат ротчетква рпны апхьадзараквала гвыгIвбара гIаншузтын ареспублика апрокурор тшизынахIырхитIта архъвыхраква акIвхIыршарныс хIйырхвититI. АуацIа уысквала аорганква рынхара агIарбараква агъьырчIвра ахъазла ачвгьахарала апхьадзараква ацаркIуата йшгIаншауа гьцIакIым. Ареспублика апрокурор ажурналистква дгIарынйауата йакIвйыршауа апрессконференцияква рпынгьи ауи ауыс йызнымкIва даквгIашIастI. – ХIхъвшара ауат йрапшу агIаншараква йрабакIитI, – йхIватI правовая статистикала ахъвшара аунашвачпагIв. – АуацIа уысквала аорганква рынхара хвы злаквырцIауа агIарбараква щаквгылапI. Знапа цкьам анхагIвчва рфайда злам апхьадзараква надыркъвитI, рынхара бзита йгIазырбауа апхьадзараква йрыладырхIитI. ХIара хIхачIвы ауат йрапшу агIаншараква гIарыбергьыльра йгьи апхьадзараква рытамамхра акIвпI. Ахъвшара ъадзанхауа асквшква руацIала мыгIвхъгарата йгIадрыбергьльыз гьмачIым, асквш 2018 гIауахвырквын, хынзыкь йнаднацалитI. Ауаса ауи аунашвачпагIв йшгIаликIгIазла, ахвысквша райхIа руацIала зынла уыла йгIацIашвауа аквымшвараква, амыгIвхъгараква йрылдзгIумцара йгIамгIвайситI, уахьчIвала ауат мачIхатI. – Ауи ахIатырла рыцIа йхвыцу амыгIвхъгараквагьи хIгватра рзынахIырхарныс хIылшитI, – йхIватI Квабал Руслан. – АзджьакI дара ргвгIанаграла ауи ахъазла чва зхъам хIацрапауата хIдыркъванчитI. Ауаса ахвыцмыцквала магIны зму анхара агIарбараква щаквгылитI. Й г I а х I р ы б е р г ь ы л ь у а амыгIвхъгараква рнархарала йгьапшым. ЙгIауахвырквын, ачвгьахара йашвхIаусыгIвахаз тамамта йыгьгIадырбум, ауидъа ахабзамыгIвхъгара квпшыра гьузыщаквыргылуашым. Апхьадзараквала йцIыхъвахауа агIарбараква анщаквгылуа коррупция, налог, экономика датшагьи ачвгьахара квпшыраква зъару алыргазлара атахъыпI. Йара ауаса ахабзамыгIвхъгагIв, ауи йзарар зквшваз йырмагIну тамамта ашвъа апны йгIадырбара атахъыпI. ХIхъвшара ауыгьи йахъпшылитI. Апхьадзараква рхъпшылра зныкI ахъазла баргвыра аламызшва йазхъвыцуагьи аъапI, ауаса ауи чхIара ду, гватшнызлара апщылапI. Ари ауыс хъапышвала уадгыл гьауашым, йара амыгIвхъгараква рщарда гIазлыцIуа ауи акIвпI. Асквш 2005 агIан, РФ а-Минюстгьи рылата, Москва апны ахабзахчара органква зымгIвагьи ачвгьахараква ашвъа йанцIарала йазакIу аквпшырала, аргIапсщала аунашва мачвы ацIарцIатI. ХIара ауи аунашва апкъ йтата астатистика гIарбараква шщаквгылуа хIахъпшылитI. ЙшхIхIваз апшта, Квабал Руслан апрокуратура органква рпны сквшы гIважва райхIа къвырльыкъв йхитI. Ауи дызланхауа йамгIан ъанатIазлакIгьи йнардзата, ъачIвагIа азъазара хIагIа гIайырбауата йхъвдаквцIараква йырхъйитI. Йара йшгIаликIгIауала, уахьчIва йъагIадзазгьи щтанкъвцагIвыта анхара рыцIа йымаджьащахъвапI, ауи аъанатIала апрокуратура органква рпны йапхъахауа ачIвырхъаква атипуата Черкесск город апрокуратура апны хвысквша дынхатI. Руслан йынхаща РФ а-Генеральна прокуратура асогIа тлапIаквала йызнымкIва йгIалыркIгIатI, КЧР АуагIа Айззара (а-Парламент) йгьи а-Президиум рчIахIра грамотаква гIайквнадыргатI. Асквш 2012 агIан рыцIа йхIаракIу артшхъвагаква йрыуу «За безупречную службу» гвплацIала дгIалыркIгIатI. Ари артшхъвага хIаракIы 21-джв злаз ачвгьахагIв гвып руыс КЧР а-Верховна суд апны йаналапшуаз апрокуратура атланыкъвала зхIаквым рхуз йыркъванчауата йгIайырбаз азъазара ахъазла йгIайквнадыргатI. Асуд апны ачвгьахагIв гвып йырзынарху ауголовна уыс гIвысквши бжакIи йалапштI, Руслан ахъа угIалагата ацIыхъвадза асуд алачIвараква дрылан. Квабал Руслан тгIачва хIвапсагIвагьи йымапI. Йхъапщыла Жанна ГIараби йпхIа КЧР АуагIа Айззара (а-Парламент) хабзала а-УнашвахъцIарта знапIыцIу дизаместительпI. Ауат хгIвысабичва гIадзындыргылитI, ахIба Эмма жвыгIв сквша, аквтанай Астемыр агIсквша йыртапI, айцIбачкIвын Адам гIвысквша ракIвпI йхъыцIуа. Руслан йынхара хъвдаквцIараква шйырхъйауа апшта йунагIва апынгьи дшпшвыма нардзу кьангьашра гьазгIагIгуам.