ЗМУРАДКВА ДУУ ЧКIВЫНЫРГIА

Удырраква узымхъузшвакI, йуымугьи учвыдзырныс ушвузшвакI акIвпI уапхьара шатахъу» – йхIвун Китай апхъанчIви философ Конфуций. ЗымгIвагьи йшыгIдыруа апшта, й-11-хауа аклассква ансисквша йызхъысуа ЙазакIу акъральыгIва рхъвыхраква тшрыздрыхIазыруата рдырраква шырзымхъауа бзита йрылархIвитI. МчыбыжьквакI рапхъала хIъаныз Къарапагва арыпхьара Квта апхьагIвчва ауат штшрыздрыхIазыруа хIырхъвыхырныс хIрынйатI, ауи амщтахь ХъвыжвчкIвын апхьартагьи хIаъан. ХъвыжвчкIвын гькыт дууым, ауаса абзазагIвчва гIвычIвгIвыс гвапапI, зымгIва йацIагылата бзи йабабауа, азаджв йзымхъауа арахьарат йырдыруа, йацацхърагIауа йбзазитI. Акыт абзазара швабыжта йшбаргву збауа айцIбачва апхьара тшадыркIылитIта тахъыра ду азрымата йапхьитI. УахьчIва хIгIазквчважвуш ари акыт апхьарта йжвизхауа акласс йгIалгауа, аэкзамен зпыру анбжьагIвчва АшбаргIа Зураби Зухри рпа Рауль, АкъбашргIа Бащири Аси рпа МухIаб ракIвпI. Жвиц сквша йырту Рауль бзита дапхьитI, апхьаразтI спортызтI, анкъвакъврата йакIвшауа шабгу йара дрылапI, хIапхъала ймурадпI апхьарта дгIалгата Ставрополь къала йтагылу аэкономистква ъадрыхIазыруа йхIаракIу апхьарта дыцIалырныс. РарыпхьагIвчва шабгу швабыжта дырзыразпI, ауаса йалкIгIата физкультурала рарыпхьагIв ДшвакIь МухIамад Владимир йпи литературала рарыпхьагIв Къвмыкъв Лариса Ауес йпхIи дрызхIвахIвитI, швабыжта йшгIарыцIагылуа йхIвитI. МухIаб жвибыжь сквша дыртапI, йынбжьагIв Рауль йапш йапхьара бзита сынчIва дгIалгитI. АчкIвын йысквшква йрыквымшвауата йхъвыцщакви йтахъыракви багъьата йщаквгылхьатI. Ауи урышв бызшвала, математикала, обществознаниела йгьи историяла акъральыгIва рхъвыхраква йпырапI, ауат дырхъыста аттестат шгIайыртуа, Майкоп къала апны йхIаракIу апхьарта юрист ъачIвагIа гIацIигата ахабзахчара органква дрылата дынхарныс йгвтараква йрылапI. Аквтанай апхьарта йызпхьауа апредметква рпны история рахIа йгвапхитI, ауи Ашба Алла Зураб йпхIа йдлырдыритI. АчкIвынчва йщаквкIыпI, гвхIальальпI, акъыль бзи рымапI, хIапхъахьыла ргвы йту рмурадква щтIыхпI, йгIадзынгылуа райцIбачва зымгIвадзугьи апхьара йаквгIазшIыртитI, йампхьауа насып шйымам райцIбачвагьи йгIаргвындыргIвра, ауат швапха пшдза ддырбара йащтапI. Абзазара йанакIвызлакIгьи йбаргвыпI, апхъала йгIауахвырквын, щардагIвы апхьарта йыгьзымцузтI, чгIвыча, щапIхъацIа, апхьага гьрымамызтI. Ауаса уахьчIва ауат шабгу шхIызхъауагьи апхьара йачвыгIащауа айхIарапI, йыгьгIаргвынгIвуам ажвлара квнага ззырчпауа йапхьата закIы йашIысхаз шйакIву. Атдзы йуыргылуа багъьахара ахъазла ащапIы йалкIгIата уадынхалра атахъыпI. Абзазарагьи атдзы аргылра йапшпI – закIы уашIысхара ахъазла йапхъахауа акласс уанцара уалагата арыпхьагIв йхIвауа уылаукIра атахъыпI, удырраква рыцIа йрылахIара ахъаз.