УЫЖВГIАНЧIВИ ТДЗЫ РЗЫРУЫХВАТI

СКФО-ла РФ а-Президент йгIащтийыгIв МАТОВНИКОВ Александр КЧР а-Хъада ТЕМРЕЗОВ Рашид дйыцта Россия МВД Черкесск городла ахъвшара ауыжвгIанчIви тыдз шIыц гIахъыртIытI. Ауи йазынархаз ачIахIра айззара йалан СКФО-ла Россия МВД а-Унашвачпарта Хъада знапIыцIу аполиция агенерал-лейтенант БАЧУРИН Сергей, КЧР АуагIа Айззара (а-Парламент) а-Председатель ИВАНОВ Александр, КЧР-ла ауацIа уысквала аминистр ТРИФОНОВ Игорь, КЧР а-Верховна суд апредседатель СЕМЕНОВ Руслан, Черкесск город амэр ТАМБИ Руслан, Пятигорск р-Архиепископ йгьи Черкесск р-Феофилакт, ахабзахчара органква рунашвачпагIвчва, КЧР-ла МВД апны йгIаныршу Ажвлара Совет йалу, аполиция анхагIвчва. СКФО-ла РФ а-Президент йгIащтийыгIв, Россия а-Фыр Матовников Александр атыдз шIыцла ауаъа йгIвнанхуш драйхIвахIвтI. – Швара къвырльыкъв ъашвхауа агород турых байа амапI, сквш 194-ла утхъахырквын йгIандыршатI, – йхIватI ауи. – ЙгIаталуа асквш 2020 агIан швхъвшара сквшышвкI ахъыцIуаштI. Аюбилей йапылуата тыдз шIыц ъашвауыз хIайгвыргъьитI. Ауи шшваргвышхвуш, швынхара агIарбараква шагъьшвчIвуаш йазхъасцIитI. Араъа пхьадзараквакIгьи срыквгIашIасра стахъыпI. Асквш 2018 агIарбараквала хабзамыгIвхъгарата йыншаз 8,8 процентла йнакъвытI, асквш 2017 йгIаквухырквын, йгIахъыртIыз ачвгьахараква рыцIа йщардапI йгьи процент 74,6 йнадзитI. Швынхара аъаща ъагъьхаз йгIалцIла ауат апроцентква йшрылахIуш йазхъасцIитI. КЧР а-Хъада Темрезов Рашид йгIачважвара апны Черкесск городла ауацIа уысквала аорганква ръачIвагIа азъазара йгьи рджьауапкIра хIагIа гIаликIгIатI. – Черкесск Россия Федерация асубъектква йрыуу Къарча-Черкес йаадминистартивна квтапI, – йхIватI хIреспублика а-Хъада. – Къарча-Черкес хпа йчпата ахъвыкI араъа йбзазитI, агвыргъьахъвква рагIан ареспублика квта апны зыкь 250-гIвы раъара айззитI. Ауат ршварагIварадара адызгалуа, йахъпшылуа швара швакIвпI. Швара зымгIвагьи рыла швгIацIашвауата ауатыкв швыгьтагылам, ауаса швуыс джьауапкIра гIашвырбауата йшнашвырдзуш йазхъахIцIитI. Ауи ахъазла хIшвзыразпI. УахьчIва зышвква ртIуаш атыдз шIыц швара щарда цIуата йшвквнаган. Темрезов Рашид Черкесск город аполиция тыдз шIыц рызуыхварала атшазынархара Россия ауацIа уысквала аминистр, аполиция агенерал Колокольцев Владимир йъацикIыз ахъазла дшизыразу гIаликIгIатI. Ауи йширыбагъьазла, акъральыгIва власть органква йанакIвызлакIгьи апшта, хIапхъахьылагьи ахабзахчара органква рбзазага-техника щата рыбагъьара йацхърагIуштI. АуацIа уысквала РФ аминистр Колокольцев Владимир йыхьызла ажва йыман СКФО-ла Россия МВД а-Унашвачпарта Хъада знапIыцIу аполиция агенерал-лейтенант Бачурин Сергей. – Россия МВД ауацIа уысквала аорганква рбзазага-техника щата тшауацIнарыхра гватра ду азалнахитI, – йхIватI ауи. – УахьчIва йгIахъхIтIуа атыдз шIыцгьи ауи йаквшахIатпI. ХIминистр Колокольцев Владимир йыхьызла Черкесск город аполиция ртыдз шIыцла сшвайхIвахIвитI. Ауи Къарча-Черкес ауацIа уысквала аорганква гватрата йырзалихуа ахъазла Темрезов Рашид дшизыразу гIаликIгIатI. – УахьчIва хIыуа дзачIвызлакIгьи Черкесск ахъазла жвлара магIны зму агIаншара хIхъа аладухитI, – йхIватI йащтагIайуата йгIачважваз КЧР-ла ауацIа уысквала аминистр Трифонов Игорь. ХIкъраль йгьи хIыжвлара ртшауацIыхра йаццауата ашварагIварадара адгалра, ахабзанкъвгара рыбагъьара апны ауыжвгIанчIви технологияква атахъыпI. Черкесск город аполиция атыдз шIыц зымгIвалагьи ауыжвгIанчIви джыпха йтагылапI. ХIреспублика квта аполиция анхагIвчва ауи йаргвышхвауата рынхара рыцIагьи йшагъьырчIвуаш йазхъасцIитI. Ари ачIахIра айззара апны зкъвырльыкъвхара борч джьауапкIра дула йадгылуа, зынхара агIарбараква хIаракIу Черкесск город аполиция анхагIвчва КЧР-ла ауацIа уысквала а-Министерства ачIахIра грамотаква рквнадыргатI. Аразыра швъаква рырттI атыдз шIыц зыргылыз ауыхвагIвчвагьи. Россия МВД Черкесск городла ахъвшара знапIыцIу Эльканов Ойдур асасчва аразыра ажваквала тшырзынайырхатI. Ауи йширыбагъьазла, афаша ахв надмыркъвуата Черкесск город, Къарча-Черкес, Россия шабгу рбзазагIвчва ргIальаматраква хчара йазынхуштI. Аполиция атыдз шIыц Устьджьгваты угIатыцIта Черкесск город уъагIаталуала йдыргылтI. Ауи атерроризм йшачвыхчазлуш апшта йыруыхватI, хвэтажкIта йаквгылу атдзы 720-гIвы йырзалхпI. Ашта апны тыпта 100 зму чарта гылапI, гIвэтажкI йнадзауа ауыхвара апны спорт йгьи тренажер залква аныргIалпI. КIьыдата уыжвгIанчIви хысырта гылапI. Йара ауаса административна арест зквырцIаз рыхъазла гIвэтажкI йнадзауа атдзы кIьыдапI, ауи 50-гIвы йырзалхпI.