Джёгетей Аягъында 3-чю номерли орта школну бешинчи классыны сохталары аталары-аналары эмда устазлары бла бирге Черкесскеде шахар сабий юйде къонакъда болгъандыла. Ол тюбешиу «Ашхы ишлени кюню» деген сууаблыкъ школ акцияны рамкасында ётгенди. Къонакъгъа баргъанла сабий юйде джашагъанлагъа кёб ашхы саугъа эмда татлы затла элтгендиле.
- КъЧР-ни Башчысы Темрезланы Рашид бара тургъан джылны Ана бла сабийни джылына атагъанды. Биз да бу акцияны аны бла байламлы этгенбиз, - дегенни айтханды 5-чи «А» классны башчысы Ёртенланы Любовь. - Баш муратыбыз сабийледе сюймеклик, джан аурутуу, джазыкъсынмакълыкъ сезимлени чыныкъдырыуду. Экинчи джаны бла, ёксюз неда къыйын болумгъа тюшген сабийле алагъа къайгъырыу болгъанын сезерге керекдиле, аны бла бирге аланы джюреклери сынмай ёсерча этиу ашхы ишлени бири болгъанлай къалады.
Сохтала бла сабий юйню сабийлери бир-бирлерине илешиб, бир-бирлери бла танышыб, заманларын зауукълу ётдюргендиле. Бир-бири къолларындан тутуб, хороводха баргъандыла, назмула окъугъандыла.
Энди сохтала къонакъгъа Къартланы юйюне барлыкъдыла.
Комментарии