Окъуу аралыкъла ишлерикдиле

Джангы окъуу джылны аллында Къарачай-Черкес Республиканы 10 районунда «Точка роста» деген 19 окъуу аралыкъ ачыллыкъды.

Къарачай-Черкес Республиканы Правительствосуну Председатели Аслан Озов республиканы Окъуу бла илму министерствосуну келечилери, муниципал районланы башчылары бла бирге Хабез, Абаза, Адыге-Хабль эмда Ногъай районланы бир бёлек эллеринде болгъанды. Ала «Образование» деген миллет проектни «Современная школа» деген федерал проекти эл школлада къалай толтурулгъанына къарагъандыла.

2019-чу джыл «Современная школа» деген федерал проектни тамалында Къарачай-Черкесияда 19 окъуу аралыкъ ишлеб башларыкъды. Ала цифра эмда гуманитар джаны бла билим берликдиле. Аралыкъланы нюзюрю эл школланы техника болумларын игилендириудю, устазланы билимлерин ёсдюрюудю, билим бериуде джангы амалланы хайырландырыуду. Технологиягъа, математика бла информатикагъа, физкультура бла ОБЖ-гъа да уллу эс бёлюннюкдю. 
Аслан Озов ишни юсю бла 9 орта билим берген школда болгъанды. Аланы асламысыны аралыкъгъа берилген мекямларында ремонт этиле турады, керекли затла - партала, шиндикле - алынныкъдыла. «Точка роста» деген окъуу аралыкъла къыркъаууз (сентябрь) айны 1-ден ишлеб башларыкъдыла.