ТАЗА СУУ БЛА  БАДЖАРЫЛДЫЛА

Бу кюнледе 4 минг адам джашагъан Адыге-Хабль элни суу бла баджарлыкъ объектни былтырдан бери баргъан къурулушу тамамланды. Былтыр къачда Къарачай-Черкесияны Башчысы Темрезланы Рашид, районлагъа барыб, джамагъатны джарсыуларындан хапар соруб айланнган заманда адыгехаблчиле суу керекли инджилгенлерин айтхан эдиле. Башчы да, адамланы ол джарсыуларын билгенинде, алайларын суу бла баджарлыкъ объектни къурулушун башлатхан эди. Аны айтханы бла анда бир суткагъа 1800 кубометр сууну чыгъарлыкъ  водозабор ишленнгенди. Аны бла да къалмай, микробларын ёлтюрюб, бир сагъатны ичинде 150 кубометр таза сууну хайырланыугъа джиберлик насос станцияны къурулушу да битгенди, аны кибик андан чыкъгъан сууну резервуарлагъа дери тазалай джетдирирге джангы быргъыла да салыннгандыла.