Ноябрь а 21- аналог органква рынхагІвчва йры-МшпІ

АШІАКВА  ЗШІЫБЖЬАУА  АНХАГІВЫ

Нхартипхьадза апны ауыс  щъата  йацІагылуа, ашІаква зшІыбжьауа  анхагІвчва аъапІ. Россия  а-Федеральна къвырльыкъвхарта КЧР-ла  й-4-хауа  амежрайон  инспекция  акамеральна хъвшара  аналог  инспектор хъада  Къадыжв ГІалимат  Умар йпхІа  ауат  йрапшу  анхагІвчва дрыуапІ. ГІалимат  ареспублика апны аналог  органква гІаншангьи  ауат дрылапІ ухІва  ауаштІ. Черкесск  йаныргІалыз  автотанспорт нхарта  апны  бухгалтерта  йынхуз апхІвыспа   лылахь  гІацІцІта тахІа данца ХІабаз  район  апны  аналог  инспекция  дрылалын , къральыгІва налог  инспекторта  дынхауа  далагатІ. Ауищтара  сквшы 22 цІытІ,  ауаса ГІалимат йгІалылхыз  аъачІвагІа  гьлымпсахтІ. ХІабаз  йгьи АдыгьахІабльа районква рналог  инспекцияква  аларцІахта  й-4-хауа  межрайон инспекция  йгІандыршаз ауи акъральыгІва  налог инспектор ахІбата дынхун. УахьчІвала, йшхІхІваз апшта,  дкъральыгІва налог инспектор хъадапІ. КЧР-ла  й-4-хауа  амежрайон инспекция пщрайонкІ гІацІанакІитІ: Абаза, НагІвай, АдыгьахІабльа, ХІабаз. ГвынгІвырапІ акъральыгІва  налог инспекторква нхара шырщарду. Къадыжв ГІалимат  аюридическа хъатаква, ахІаракьатчпагІвчва кІьыдаква рналог  декларацияква лырхъвыхитІ. СквшыкІ ауи  декларацията пщынзыкь аъара  дрылапшитІ. - Ауи аъарагІвы гьщардамма, бкъару          йшпагІанагуа? - сылцІгІитІ  акъральыгІва инспектор хъада. -ЩардапІ, ауаса  сынхара  ацІыхъва  йнасмырдзауата  сгвы  йгьауам, анхара  амщтахь сангІанхауагьи, атшпсщара  мшква рагІан санынхауагьи  гІаншитІ, - лхІвитІ аъачІвагІагІв. – Сара  йгьсхъазым ауаса йынхауа, хІинспекция анхагІвчва  зымгІвагьи  йанатахъхауа рхъатачІв замангьи гІадрысабапитІ. Анхартаква зымгІва рпынгьи  йапшта, аналог  инспекциягьи  йцІыхъвахауа  асквшква электронна  амальла  ашвъаква рамдара  йазцатІ.  Ауи аналогтйыгІвчвагьи  руыс  арымайратІ, йарыластІ. Ауаса ауи ахъазла аналог  органква рынхагІвчва  тшдрыгІапсатІ, ауат  йапшым  апрограммаква  тшырзырбжьатІ, архъвыхраквагьи  йырхъыстІ. - ЙцІыхъвахауата Санкт-Петербург йгІатыцІта  йгІахІадзаз апрограмма  тшазыгІбжьатІ,  - лхІвитІ  ГІалимат. – УадыргІвана дистанционна  амальла  хІдырраква  дырхъвыхтІ. - Ахабзаква  йырзынархаз айчважвараквакІ апны  хІкъраль аналог хабза  сквшыкІ  апны  псахрата  350 аларцІауата рхІватІ. ЦІабыргыта ауи ахабза  йгьахъазым апсахраква  щардата  йзларцІауа. - Ауатква  швынхара апны абаргвыраква гьгІандмыршума? - тшылзынасырхатІ ГIалимат. -Ахабзаква тшанырпсахуа хIуыс шбаргвхауа ажва гьалам, йгIаншитI хIазцIгIараква рджьауап анхIмауа. Ауаса аналог ргIапсщагьи азаман йаквшвауата йагъьырчIвитI. АналогтигIвчви хIари амакIыра гIахIбжьашвузтын, судла йалхIыргитI. Араса «Эркенагроинвест» ООО хIщаквыргылра йазыразымкIва асуд тшазынадырхатI. Ауи анхарта адгьылрхарджьра йапщылапI, йапшым атехника багьандата йырнатитI. Анхарта рхъахІара йахъыртиуа  аналог рзыгIащаквдыргылхра ахъазла тшгIахIзынадырхатI, ахчата йгIадырбаз сом быжьмильуанкI надзитI. ХIара ауат ршвъаква хIырхъвыхтI, ауаса ауи апш хвитнагIа рымата йгьхIымпхьадзатI. ХIщаквыргылра йадымгылуата асуд тшазынадырхатI, ага йгвасразтынгьи, асудгьи ауат рытланыкъва акIытI. ХIынхара апны арат йрапшу амакIыраквагьи гIаншитI. Щта, йгьмачIым аналог органква йрыхъвдакву ауыс, джьауапкIра ду алапI. Аналог органква ракIвпI абюджетква рхъахIара хъвы айхIара зырчвуа. Ауат ахъаква ракIвпI ауагIа рпенсияква, рынхаша гIазлыцIуа, асоциальна уысква зладырхъйауа. АхъазыкI агIвыма къральква рпны аналог тира тшацIнаргара ачвгьахара хIатлаква йгьрыларпхьадзум. Ауи акIвпIта, дзачIв налог инспекторызлакIгьи йынхаща магIын ду амапI. Къадыжв ГIалимат лынхаща КЧР-ла аналог къвырльыкъвхарта а-Унашвачпарта аразыра сальамшвъала йгIалыркIгIатI. ХIапхъахьылагьи ауи лъачIвагIа азъазара йшазхIуш, ашIаква швапхата дшырзалуаш йазхъахIцIитI.   Дзыуа Аминат