СКФО Новый логотип курорта Эльбрус в КБР представили в студии Артемия Лебедева СКФО В Северной Осетии прошла донорская акция Актуально В КЧР родители старшеклассников сдали ЕГЭ Общество Карачаево-Черкесия наращивает объемы производства тепличных овощей Актуально Представители молочной отрасли КЧР могут принять участие  в Национальном Молочном Конгрессе   

Культура бзазара

20.11.2013 1059
Культура бзазара

АШАХВ АПШТА ЧКІВЫНЫРГІА РГЬАГЬАРА ДРЫКІКІИТІ

Ноябрь а 9 Йынджьыгьчк1вын кыт йтагылу культура а-Тдзы апны Россия  агІвадахь  шІыпІаква йгІартыцІыз чк1вынырг1а  алата «Зори Кавказа» фестиваль г1ахъырт1ыт1. Ауи  йалаз  ачкІвынчви  ахІвсси ауаг1ахъа г1ах1выщаквала, ашвах1варала, къвабыз асрала   апшыгІвчва дыргъвыргъьат1. Сквшщарда ц1ит1та ари афестиваль  Лагъь Осетия–Алания, Къабард–Балкъар, Адыгея республикаква, Ставрополь край аг1ащтыйыг1вчва г1адрайгват1.  ЗмагІны  дуу  ари  аршІышара  анкъвакъвра  сынчва Абаза муниципальна район апны  йакІвдыршарныс г1арызхъарцІат1. Культурала КЧР аминистр йзаместитель Алиев Темирлан афестиваль йг1адгылыз зымг1ва КЧР а-Хъада Темрезов Рашид йыхьызла драйх1вах1вт1. - Лагъь КІавкІаз чк1вынырг1а  абазырдыруа   афестиваль ак1выршара амаг1ны дута йх1пхьадзит1. АшІакваква рак1вымк1вагьи ах1бачвагьи гвыргъьара мшыта  йырзалуа  ари  йапшу анйараква рагІан  ауагІаква рыцІа  аргваныта  йабадырит1,   нбжьагІвыгІа  гІарбжьашвит1,- йгІаликІгІатІ Алиев Темирлан. Ареспублика уаг1ахъа культура Квта адиректор Катчиева Лейла ах1вах1вра ажваква йрыцта  афестиваль йалаз агвыпква аразыра сальамшвъаква рылтт1. - «Зори Кавказа» 14 сквша ц1ит1та йак1вшит1, х1гвыгъит1 ужвыгьи сквшщарда ари  йапшу  анйара  гвапаква Лагъь  КІавкІазла  чкІвыныргІа  шадыркІылуаш, - лхІватІ Катчиева Лейла . Абаза район администрация  а-Хъада Ныр Мух1аджьыр ЧагІбан  йпа ачкІвынчви  ахІвсси афестиваль йалазларныс   арайон ргІайра  швабыжта  йшигвапу гІаликІгІауата адах1враква  рзитахъта драйх1вах1вт1. Асасчва ракІвымкІвагьи афестиваль йалан х1республика арахьарат арайонква  йг1артыц1ыз «Акварель» «Кавказ», «Харц», «Харс», «Элия», «Ридада»,  «Шарм», «Незабудки»,  «Суьюнбике» гвыпква дасузлак1гьи лк1г1арак1 рыман . Абаза  районла  йгІаныршу Харц» г1ах1вра ансамбль  йгІахъвмаруа  ачкІвынчва абаза хъвмарра гІадырбат1. Наг1вай район йауу «Суьюнбике» гвып  йалу ахІвсса  руаг1ахъа фашаква ршвыта  асцена  йгІаквылтІ. «Харс» зхьзу агвып ркъвабызква рбжьы пшдзата йдыргат1. «Шарм» ашвах1ваг1вчва Дудов Ислам, Хвби Алина, Джьмакъвыл Марина йкьахву ауарадла  апшыгІвчва рнашх  г1ащтырхт1. Лагъь Осетия-Алания  йгІатыцІыз «Бонварнон» гвып йалу  ачкІвынчви ахІвсси доул йшасыз  згвапхадзаз апшыгІвчва  ауат  ауырата  напІы йырзаст1. Адыгея агІащтийыгІвчва - «Кубаночка» агвып ашвах1варали г1ах1врали ауатыкв гІадрылашарат1. Къабард-Балкъар йгІатыцІыз «Маленький  джигит» ансамбль агІахІвыгІвчва акьым  йагІвызата асцена  апны ащхъа уагІахъаква  ргІахІвыщаква  гІадырбатІ. Йапшым  акультураква «шзайчважвауа» йагІарбагата Ставрополь  край йауу «Малиновый  рай» гвып   агІахІвыгІвчва  аурышв  уагІахъа гІахІвыща  пшдзадза  гІадырбатІ. Афестиваль  йгІадгылыз аршІыйагІвчва рыхъазла  акультура  Тдзы  апны Абаза  район агІаджвыквцІарала гІарбара  джьащахъва  аныргІалын, асасчва   йрымагІальаматдзата абаза уаг1ахъа фаша, апхъанчІви ъамапсымаква, акІьанджьква, йапшым анап1лачпараква  йырпшуан. «Зори Кавказа» йг1адрайгваз гвыпквакІ  гьызг1амитІ, ауаса  афестиваль  аджьащахъвара гьыммач1хат1, ауи  адгалагІвчвагьи  йалаз чк1вынырг1агьи  йшразу рылубгІун, йырбаз  зымгІва шыргвапхауа ачк1вынчви ах1всси рш1ахъа лашараква йг1архІвун. «Зори  Кавказа» фестиваль ахьыз  пшдза  гІанарцІабыргуата  йапшым  ауагІахъаква  йгІарылцІыз  чквыныргІа  абанардыртІ, аконцерт    амщтахь   акультура  Тдзы  апшцІа апны  ауат  ахІауа  йаларжьыз  асалютква ажвгІванд  шгІадрылашараз апшта  ари анкъвакъвра    щардала йкІк1араг1ат1. Йуан Ася
1059 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный