ЛАГЪЬ КIАВКIАЗ АДАМЫГЪА ЙАДЫНХАЛИТI

СКФО-ла РФ а-Президент йгIащтийыгIв МАТОВНИКОВ Александр йгьи акыт млыкврхIарала РФ аминистр ПАТРУШЕВ Дмитрий Железноводск апны ЛагъьКIавкIаз Федеральна округла агропромышленна комплекс тшауацIнарыхра йазынархаз алачIвара акIвдыршатI. Ауи йалан Лагъь КIавкIаз ауысквала РФ аминистр ЧЕБОТАРЕВ Сергей, СКФО аштаква рхъадаква. ХIреспублика ахьызла алачIвара йалан КЧР а-Хъада ТЕМРЕЗОВ Рашид, КЧР а-Правительства а-Председатель йапхъахауа йзаместитель БАЙЧОРОВ Эльдар, акыт млыкврхIарала КЧР аминистр БОТАШЕВ Анзор. – Лагъь КIавкIаз апсабара аъаща акыт млыкврхIара пкъыгIваква ргIархарджьра йалархIара йаквыргIапспI йгьи агропромышленна комплекс тшауацIнарыхра уылнаршитI, – йхIватI Матовников Александр. – Ауи агIвымакъраль йхIщтиуа апкъыгIваква йрыланархIуштI, анхара тып шIыцква гIаннаршуштI. Ауи йшгIаликIгIазла, агIвымакъральква йгIартыргауа афачIв пкъыгIваква анахъадрысуа СКФО аштаква «йгIахвитхаз атыпква ркIырныс» лшара гIаншатI. УахьчIвала акытмлыкврхIара пкъыгIваква рэкспорт хпа йчпата агIвхъвыкI Азербайджан, Грузия, Иран, Армения йгьи Къазахстан гIацIанакIитI. – Асквш 2018 агIарбараквала, СКФО аштаква йтыргаз акытмлыкврхIара пкъыгIваква доллар мильуан 214,8 рыквшвитI, – йгIаликIгIатI Матовников Александр. – РыцIа щардата йтыргаз йрыуапI аквтIужь, агвадз, анартыхв, ауасажьы. Ауаса агропромышленна комплекс апны абаргвыраквагьи аъапI. Асквш 2018 агIарбараквала, кытмлыкврхIара пкъыгIвата йдырхарджьыз гIвпроценткIла йнакъвытI, арахв пхатша, ахIваква, апссгIачIвы, ауасаква йгьи аджьмаква йрылдзгIатI. Акыт млыкврхIарала РФ аминистр Патрушев Дмитрий йгIачважвара апны йшгIайхIвазла, рахвы йгьи пссгIачIвы рхIарала СКФО Россияла йцбахауа атып амапI, хIкъральла йгIацIаргауа агвадз йгьи акъвыд гIайыраква ртшыгIвра ажвиз проценткI СКФО аштаква рырхъаква йгIарыквыргитI. Асквш 2019 апщмызкIла СКФО йтыргаз акытмлыкврхIара пкъыгIваква доллар мильуан 108 рыквшвитI. – Асквш 2024 йадахIвуата акытмлыкврхIара пкъыгIваква рэкспорт 3,5-нла йалархIара атахъыпI, – йхIватI Патрушев Дмитрий. – Аэкспорт йауата 2,8 процент СКФО аштаква йырчIвыпI. Лагъь КIавкIаз ауысквала РФ аминистр Чеботарев Сергей йгIачважвара апны СКФО аштаквала кытмлыкврхIара пкъыгIвата йдырхарджьуа йалархIара шатахъу гIаликIгIатI. Йауа ухIварыквын, аэкономика анархараква гIадыршIыцхитI, акъраль афачIв шварагIварадара дрымчитI. Аминистр йшихIвазла, Лагъь КIавкIаз йапкъыгIвата адуней йгьи Россия арынокква рпны йпшцIырщтуа «Сделано на Кавказе» дамыгъа рыквызлуштI, аминистерства апны адамыгъа щаквдыргылуата анхараква джвыквырцIахьатI. АлачIвара апны ажва змаз КЧР а-Хъада Темрезов Рашид йшихIвазла, Къарча-Черкес агропромышленна комплекс СКФО йтыргауа апкъыгIваква йрылархIара къару аланацIарныс йхIазырпI. ХIышта апны аминерал йгьи йуыжвуа адзы щардата йгIацIырщтитI, жьы дырхарджьитI, тшыгIвра бзи гIацIаргитI, хIапхъахьыла ацIлауатраквагьи бажвхуштI.