АСАБИКВА РЫПХЫН ТШПСЩАРА АДЫРГАЛИТI

КЧР а-Правительства апны асабиква сынчIва апхын ртшпсщара йгьи рызгIвадара рыбагъьара адгалра йазынархаз алачIвара акIвшатI. Ауи йалан КЧР а-Правительства а-Председатель йзаместитель ЧЕККУЕВ Хзыр, арыпхьарала йгьи наукала КЧР аминистр КРАВЧЕНКО Инна, ауи лзаместитель БЕКИЖЕВА ФатIима, Къарча-Черкес къральыгIва университет аректор УЗДЕНОВ Таусолтан, КЧРИПКРО апроректор ЧАНКАЕВА Татьяна, МЧС КЧР-ла а-УнашвахъцIарта Хъада знапIыцIу ШАРКОВ Сергей, «Роспотребнадзор» КЧР-ла а-УнашвахъцIарта аъачIвагIагIв-эксперт хъада ДАНИЛИНА Ирина, згIвадарахчарала КЧР а-Министерства анри асабихъи рхчарала ахъвшара акьангьашагIв БОСТАНОВА Мадина, КЧР-ла МВД збальыгъ йнамдзас руысквала йгьи аполиция ахIабльа уполномоченнаква руысхара адгалрала ахъвшара аинспектор хъада, аполиция акапитан МАХВА Эльдар, чкIвыныргIа рполитикала, туризмла йгьи акурортквала КЧР аминистр йзаместитель СЕЛИПЕТОВ Павел, арайонквала арат анархараква йырхъпшылуа аъачIвагIагIвчва. Чеккуев Хзыр йшихIвазла, хIреспублика асабиква ртшпсщара мшква радгалрала ауыс хъадаква арыпхьарала йгьи наукала КЧР а-Министерства йшахъвдакву гIадйыргвалашвахтI. – Къарча-Черкес Республикала асквш 2019 агIан асабиква рыпхын тшпсщара йазалырхыз ахчаква асквшква 2015– 2018 рагIан ацкIыс йыгьмачIым, сынчIва ауи йазалырхыз сом 50031200 йаъарапI. УахъыкIи мшкIи руацIа сабикI йфуш йазалырхыз сом 125-дза йдрыщардатI. Акврыдзраква йрылахIазтынгьи, атшпсщараква йгIарыланадыркIуаш асабиква рпхьадзара цIыпх йаъарата йгIаныгIжьтI. СынчIва ауат тшынла тшъапсырщуш апхьарта лагерьква рпны ачара йаквдрыдзуаш ахчаква амуниципальна гIаныршараква рбюджет йгIалцIуаштI. АфачIвква рыхвква йъарылахIаз йгIалцIла амуниципальна гIаныршараква апхын йынхуш алагерьква кIьыдата ахча рзалырхра атахъыпI. Къарча-Черкес апсабара лкIгIараква азгIвадара рыбагъьара йъаквыргIапсу ахIатырла тшпсызщуш асабиква райхIарагIв хIреспублика йаъазлуштI. ЗымгIва шалу сабита 10777-гIв хIреспублика апны сынчIва тшпсырщарныс рылшуштI, ауи ахъазла ареспублика бюджет ахча гIаунащтуаштI. Апхын тшпсщара йгIаланадыркIуаш йрыуата 2522-джь – азгIвадарарыбагъьара лагерьква, 300-гIв – палаткала йадгалу алагерьква, 1470-гIвы – ахча щарда зквымдзуа атшпсщартаква, 300-гIв – асанаторийква, 6185-гIвы тшынла йынхауа алагерьква рпынква йандыргIалуаштI. ХIреспубликала июнь а 1 йгIашIарышвта апхьартата 101 рпны алагерьква рынхара джвыквырцIуштI. ХIреспублика асабиква тшъапсырщуш алагерьква рынхара йаназаману йджвыквырцIара ахъазла йадыргалитI, ауат рпны ацкьара хабзаква йалкIгIата гватра рзалшвхырныс тшшвзынасырхитI. Йбаргву аъаща йташваз атгIачваква рпны йгIадзынгылуа асабиква, асаби-йыбаква, збальыгъ йнамдзас руысквала ахъвшараква ршвъа йану ачкIвынчви ахIвсси апхын мызква рагIан йалкIгIу гватра рзалырхуаштI. АлачIвара апны апхын мызква йынхуш алагерьква ршварагIварадарала йгьи амцаблыраква йырчвыхчарала йнарахвыз амальквагьи йрыквчважватI. – Асабиква ртшпсщара мшква рагIан амцаблыра йачвыхчара ахъазла алагерьква радгалща дырхъвыхуата МЧС КЧР-ла а-УнашвахъцIарта Хъада анхагIвчва ауат йгIарыкIвшатI. Май а 16 агIарбараквала хIреспубликала тшпсщартата 113 ашвъа йанырцIатI, ауат йрыуата 101 апхьартаква рпны йаныргIалу лагерьпI, 12 – агород утыцIта йаныргIалу тшпсщартапI. Ауат дырхъвыхуата йапшым акъвырльыкъвхартаква ргIащтийыгIвчва злу акомиссияква нхатI. Архъвыхраква мыгIвхъгарата 58 гIадрыбергьыльтI, ауат йрыуата уахьчIвала мыгIвхъгарата 25 дрыдзххьатI. РахIа гватра рзалхчIвпI амцаблыра ангIаншара ауагIа йдзырдыруаш азшIытга, йкIьыду джвылцIырта аъазлара, агвжважвагIва агIан анхагIвчва йырчпара атахъула ахабар рдырраква рнадзара. ЙлыхIхыз апланла амцаблыраква рагIан йчпачIвула атшыбжьараква акIвхIыршуштI, – йхIватI Шарков Сергей. Атшпсщартаква рпны ацкьара йгьи агигиена хабзаква рырхъйарала ауысквагьи ауатыкв йгIатаргатI. – АхъатачIв лагерьква рунашвачпагIвчва асанитар аъащала ашвъа рыхIтра ахъазла йаназаману тшыгьгIахIзынадырхум, ауи йгIалцIла атшпсщартаква раъаща архъвыхра тащахIахитI, – лхIватI Данилина Ирина, – «Роспотребнадзор» КЧР-ла а-Унашвачпарта аъачIвагIагIвчва рырхъвыхрадъа атшпсщартаква рынхара джвыквырцIарныс хвитнагIа гьрымам. УахьчIвала асанитар аъащала швъа ртахъыта «Роспотребнадзор» КЧР-ла а-Унашвачпарта агород утыцIта йаныргIалу тшпсщартата 8 ракIвпI т ш г I а р з ы н а з ы р х а з , тшпсщарта 80 райхIа анхара йгьазыхIазырым. Атшпсщара мшква гIамдзаскIва ахIвара швъа щтIазцIаз зымгIва рпны архъвыхраква хIрылгара хIмурадпI. Апхьартаква рпны йаныргIалу алагерьквагьи гьхIазырым, Уарп, Къарча, ХIабаз, Абаза муниципальна районква рпны йаныргIалу алагерьква рмацIауыртаква рпны абжараква аъаркIвапI. Бостанова Мадина йшгIалхIвазла, згIвадарахчарала КЧР а-Министерства анхагIвчва агород утыцIта йаныргIалу алагерьква андырхъвыхуаз атшрыхIазырраква йыршымтан. Ага ауаса йаъазтынгьи, ауат зымгIва рпны амедицина кабинетква аныргIалхьан. Апхьарта лагерьква рпны йынхуш амедицина нхагIвчва аъапI, ауат рыхъазла атшыбжьараква акIвшуштI. Асабиква рызгIвадара йазарархуш шварагIвараракIгьи аъамызлара ахIатырла анхагIвчва зымгIва амедицина рхъвыхраква йырхъыстI. Алагерьква рпны йаъазлуш асабиква ран-рабачва рыгвква тынчызлара ахъазла ршварагIварадара адгалрагьи гватра азалырхитI. – Асабиква рыпхын тшпсщара ашварагIварадара тахъыраква йшрыквыргIапсу дырхъвыхуата КЧР-ла МВД анхагIвчва агород утыцIта йаныргIалу жвлагерькI рпны йаъан. Архъвыхра йшгIанарыбергьльызла, атшпсщартаква гIакIвзыршауа рчIаджьра йазыбжапI. АшварагIварадара ахъазла алагерьква рунашвачпагIвчва йазалху ахчара нхартаква ангIалра рыдырчпалра, алагерьква зрылашарауа амзаква кIныхIазара, гвжважвагIва аъащакI гIаншузтын йчпачIву йгьи тшыззынадырхуш акъвырльыкъхартаква ртелефонква зну астендква дрыхIазырра атахъыпI, – йхIватI Махва Эльдар. Асабиква ртшпсщара сабапра алата йакIвшара ахъазла ауат бжьагIвыта йрыцызлуш ррыхIазыррагьи гватра ззалхчIву уыспI. Узденов Таусолтан йшихIвазла, ауниверситет арыпхьара программа авожатаква рбжьарала апхьара сахIатква аларцIатI, йапхъахауа – йгIвбахауа акурсква йыцIу астудентква сахIат 104 рзалхпI. УахьчIвала Къарча-Черкес къральыгIва университет апны вожатата йынхушта студент 30-гIв злу гвып дрыхIазыртI. ЦIыпх анхара йаздрыхIазырыз астудентква «Артек» дуней лагерь апны вожатата йынхарныс рылшатI, ауат ауаъа швапха бзи дырхIатI. Селипетов Павел йшгIаликIгIазла, апхьарала, спортла, ршIыйарала, патриот бжьарала датшагьи йапшым анархараквала гIатгара зму асабиква льготыхвла апутевкаква рзалырхуаштI, дасу йнархара йазаргвану алагерьква йырщтиуаштI. Ауи ахъазла асабиква ран-рабачва ашвъакви аграмотаквагьи рымата чкIвыныргIа рполитикала, туризмла йгьи акурортквала КЧР а-Министерства тшазынадырхара атахъыпI. Асабиква ртшпсщара мшква сабап алата йыргара, рызгIвадара йазхIара ахъазла ареспублика власть органква нхара ду акIвдыршитI. Арат амшква алагерьква рпны атшазрыхIазырраква ацIыхъва йнадырдзитI, уыжвласыла рышвква ртIуаштI.