ХIЫШТА АСПОРТ АТШАУАЦIЫХРА ДАЗЫНХАТI

Аспорти афизкультури агIвычIвгIвыс йызгIвадара йшащату багъьата йазхъайцIитI июнь а 9 сквш 85 зхъыцIуа Черкесск абзазагIв МШВХIВАДЖЬ Адамей Инус йпа. Ауи йара йхъатала дшIангьи аспорт бзи йбун. ЙынбжьагIвчви йари абакIрала, хIахъваущтрала йанкъвакъвлун, топ йасуан, велосипедла йапхъанысуан. ЗымгIва рацкIыс йласыз, йпчарыхIыз, йхахваз Адамей йыквлагIвчва драйгIайуан. Ауасамцара ачкIвын Къвбина апхьарта йбыжьбахауа класс дгIалган, Черкесск педучилища дыцIалтI. Йаба йшвапхала дарыпхьагIвхатI (Инус Къвбина йгьи Къвайдан кытква рапхьартаква директорта дынхатI). Адамей педучилища дангIалга Къвбина апхьарта апычIв классква рпны арыпхьагIвта, уацIыхъван физкультурала йбжьауа дынхатI. Зуыс йазгIашыкъта йджвыквызцIаз аъачIвагIагIв йгIанйыршаз акъвбинаква рфутбол команда заман айшысла аобласть йачемпионхатI йгьи Ставрополь крайла акыт командаква рчемпионат йаларжьтI. Аспортсмен, афутболасыгIв йкъвырльыкъвхара борч йырхъйата дангIахъынхIвых, физкультурала арыпхьагIвта дъарщтийыз Теберда квтанай апхьартагьи йбжьуз чкIвыныргIа аспорт анкъвакъвраква рпны апхъагылараква гIатыргауа йалагатI. Ауи аунашвачпагIвчва гвы арымтуата йыгьгІанымхатI. Адамей Прикубань районла аспорт адкIылара дапредседательта ддыргылтI, йащтагIайуата Прикубань райком акомсомол дасекретарьхатI. Дшынхузымца Ставрополь къральыгIва пединститут йгьи Ростов йхIаракIу апартия апхьарта дгIарылгахтI, асквш 1962 агIан аобластьла йгIандыршаз «Урожай» спорт жвлара даунашвачпагIвхатI, пщысквша анцIы Къарча-Черкес аспорт жвлараква радкIылара дапредседательхатI, ауи уадыргІвана чкIвыныргIа руысквала, физкультурала йгьи спортла акъральыгIва комитет ахьырцIахтI. МшвхIваджь Адамей аспорт комитет сквш 30 райхIа унашва ахъицIатI. Ауи атлахан аспорт йамастерта 300-гIв, чемпионта 40-гIв райхIа, олимп чемпионкI гIадзынгылтI. Адунейла йгьи Европала йчемпионхатI Дзгоев Таймураз, Зангиев Виктор, Жабраилов Льакъвман, Головко Андрей, Уаз Мурат, Къвныжв МухIамад, Йуан Адир, КIьыщмахва Руслан, Агыр Роберт, Быджь Аслан датшагьи щардагIвы. МшвхIваджь Адамей аспорт йгьи афизкультура апхьартаква рымлыкв щата рыбагъьара, астадионкви аспорт тыдзкви руыхвара дащтаныкъвауата тширыгIапсатI. Ставрополь крайла йагъьта йырпхьадзуз Черкесск асаби спорт апхьарта (ДЮСШ) гимнастика зал рчпатI. Ари апхьарта апны акIвпI Атланта йакIвшаз а-Олимпиада хIышта дауата йапхъахауата йчемпионхаз Василенко Дмитрий дъадрыхIазырыз. Ауи аспортсмен ужвы Париж апны дтренерпI, йара йбжьагIвыз Кудинов Василийгьи Новая Зеландия апны дынхитI. Псыжв йауу Йуан Адир Америка апны йбергьльу ацирк даакробатпI. Ауат асквшква «Спартак» стадион хвыц ацынхъвы «Нарт» уыжвгIанчIви спорткомлекс, бассейн алачпата спорт Дворец, Къарча город йгьи Учкекен рпны астадионква руыхватІ. Адуней джыпхаква йрыквшвауата йандыргIалхыз «Домбай» мотодром апны Германия, Франция йауу акомандаква алата мотоболла анкъвакъвраква цIасхатI. «Домбай» мотобол команда йапынкIылата сквшпхьадзара руацIа СССР-ла йгьи Европала йчемпионхатI. Къарча-Черкес аволейболасыгІвчва, агандболасыгІвчва, агимнастква, авелосипедистква, йхІатлу атлетикала аспортсменква ргІатгараква хIаракIын. Псыжв кыт афутбол команда ахьыз гун. ЙагІвсыз асквшышв асквш 60-ква рагІан Домбай апны фристайл спорт квпшырала гІван адуней анкъвакъвраква акІвшатІ. США, Канада, Япония, Европа къральква йгІартыцІта йгІайуаз аспортсменква Домбай апсабара, атларыджа тагІвзыртаква рзыджьамщауа йцахуан. Ауат ауысква зымгІва згІаджвыквцІараз аспорт комитет аунашвачпагІв МшвхІваджь Адамей йакІвын. Ауи Къарча-Черкес апны хвитта абакІра йъазырбжьуш апхьартагьи гІанйыршатІ. «Нарт» футбол командагьи ауи данынхуз акІвпІ йангІанша. Адамей Инус йпа СССР йгьи Россия Федерация ркомандаква друнашвачпагІвта адунейла йгьи Европала чемпионат щарда дырщтитІ. Швеция, Япония, Франция, Испания, США, Югославия, Турция, Чехословакия, Венгрия датшагьи акъральква рпны Къарча-Черкес аспортстменква йызнымкІва йапхъагылагІвхатІ. Аспорт комитет аунашвачпагІв аспортсменква афатарква рзыгІапшцІигун, йхІаракІу апхьартаква йыцІалырныс дырцхърагІун, ачемпионкви ауат рбжьагІвчви амашина шІыцква согІата йшгІарадзуш дащтаныкъвун, ауи ззычпуш ауагІаква гІайауан. Арат ауысква рахъвдаквыщтра замангьи, къаругьи, лшарагьи ртахъын. МшвхІваджь Адамей хвду йыквызцІуз аунашвачпагІвчва йажва гІвба йыгьрымчпузтІ. Ауи Къарча-Черкес апны аспорти афизкультури ртшауацІыхра къарута йалайцІаз рыхъазла «За доблестный труд», «За трудовое отличие» медальква гІайквнадыргатІ, «Россия Федерацияла гІатгара зму афизкультура анхагІвы» ЧІахІра хьзы, «Россия апны аспорти афизкультури ртшауацІыхрала агІатгараква рыхъазла» ЧІахIра гвплацІа гІайырттІ. Анхара аветеран МшвхІваджь Адамей йыщтахьла йгІанижьыз асквшквала дацапшхуата йсабихъа баргвыта йшакІвшаз, цысквша ахIа дыртамкІва йаба Инус йгІалагаз Абашта айсра Ду дпшцІалуата дшнардасуаз, йан Нура, йанду Алакез, йахщчва айцІбачва Раи Льальи ауи азаман рбзазаща шаъаз гІайгвалашвахитІ. Адамей йанду Алакез дкъарчан, йгьихъаштылхуам акъарчаква антыргуз асквш 1943 агІан НКВД анхагІвчва ауыгьи йшлыщтагІайыз. Ауаса ажвхьагІвчва, ауасахчаква, аколхоз апредседатель гІайззан, ахшгIахьарта ферма апны йагъьыз рынхагІв бзи йылквцІата йгІайкваз йырпшІагылтІ. «Ауи абазаква даныртацазара ларгьи дабазахатІ, МшвхІваджьргІа дырчIвхатІ» -хІва щарда йрамакІтІ. НКВД анхагІвчва гвыхь-жьыхьра рылата йгІацІцІтІ. Ари йапшу гІаншара шпаухъаштылхуаш? Адамейгьи ауи агІан атгІачва хІальабальыкърата йрылаз бзита йдырхитІ. Ауи уагІахъипхьадзагьи рыцхІагІата йызшІашваз, йаба дгІазлыцІыз абазаква, йан дызуаз ачеркесква, йанду дызтпхІаз акъарчаква йапшым азаманква йгІарыдсылыз аполитика репрессияква рцІыхъватшараква дрыхагІвазапІ. Ауи йгІалцІла акІвпІ зынгьи уагІахъа алых зымчпауа интернационалистта йынцІра аурала дызгІамгІвайсыз. Аспорт комитет йнапІыцІата дъадзанхазгьи аспортсменква ргІатгараквала ракІвын хвы зларыквицІуз. СквшыкІ йацта йцІитІ МшвхІваджь Адамей Инус йпа йгвы дацчпата жвасквшапхьадзара руацІа дызцбзазаз йхъапщыла Рая дихъышвтищтара. УахьчІвала ауи лпхари лайгвыгІври швабыжта йшйыгхауа ажва гьалам. Ауаса ахъацІи апхІвыси швапха рыквта, дырра бзи рымата йгІадзындыргылыз ргІвыпхІчва раба рхъпшылра багъьа дацІапІ. Ставрополь кардиология квта апны зылшараква дуу айъазагІвта йынхауа Земфира йгьи СКГГТА астудентква агІвыма бызшваквала йазрыпхьауа, афилология наукаква рдоктор ФатІима ажвлара хвы зквырцІауа ъачІвагІагІвпІ. АхІба лпхІа Элинагьи йхІаракІу гІвапхьартакІ дгІарылгатІ, дюристпІ, айцІба лгІариква – Льильа дэкономистпІ, Арсен хъатачІв стоматология квта гІахъитІын, дахІврала дынхитІ. Ауат рдахІвраквала абаду дразыпІ. Нхаралагьи бзазаралагьи дамайчуата йгІамгІвайсыз МшвхІваджь Адамей Инус йпа йара уахьчІвагьи ажвлара зыхьыз рхІвауа дахІба пшдзапІ. Ауи йюбилейла хІйайхІвахІвуата йызгІвадара дгІанаргвышхвауа, йгвы нагьуа, бзи дызбауа йтгІачвала дкІвыршата йапхъала йщтІу асквшква найдасырныс йзыхІтахъпІ.