ЧКIВЫНЫРГIА РПРОЕКТКВА ЙРЫЦЫРКIТI

Машук – 2019» йалаз чкIвыныргIа дрысасын РФ а-Президент СКФОла йполномочна МАТОВНИКОВ Александр. Ауи йыцыз аокруг йаланакIуа ареспубликаква рунашвачпагIвчва «Ярмарка проектов» площадкIа апны грант гIатызгаз чкIвыныргIа рынхараква тшрыхадыргIвазатI йгьи разцIгIараква джьауап рырттI. Ставрополь край агIащтийыгIвчва аинфраструктура йгьи асаби йыбаква рбзазартаква агъьчIвра йырзынарху ауысква гIащтIырхтI. Лагъь Осетия-Алания рделегация чкIвыныргIа руацIала аунашвачпара йазычпу ргIарыбергьыльра йгьи аъачIвагIагIвчва йъагIатадрийыз ашIыпIа апны йынхарныс йхъкъьалрала амальква йрыквгIашIастI. Дагъстан Республика а-Хъади а-Правительстви р-Администрация аунашвачпагIв Иванов Владимир афорум ъадзакIвшуз ашIаква нхарата йакIвдыршаз ахъазла дшырзыразу гIаликIгIатI. «Мой Дагестан – моя вода», «Мой Дагестан – мои дороги», «Мой Дагестан – комфортная городская среда» проектква сабапра шрылу даквгIашIастI. Къабард-Балкъар Республика а-Хъада йхъвдаквцIараква зырхъйауа КIвакIва Юрий чкIвыныргIа наука-арыпхьара Квта гIаныршарала ргIаджвыквцIара йацикIтI. «Машук – 2019» форум ашIаква ареспублика аунашвачпагIв гватрата йырзалихуала йшизыразу йархIвтI. – Абзазара ага аъащагьи утанаргылитI, уадыргIванагьи йагъьу амальква швырзыпшгIитI, апхъала швчIвырхъитI. Мурадта швпахь йшвыргылуа зымгIва шгIашвдахIвуаш кьангьашра ткъвым гьазгIазгуам, – йгIаликIгIатI КIвакIва Юрий. Ингвыщ Республика а-Хъада йхъвдаквцIараква зырхъйауа Калиматов Махмудали дзунашвачпагIвыз аделегация агIвымакъраль инвесторква ргIахъкъьалра, аэкология хчарала амальква датшагьи уыс джьащакъва щарда йрыквчважватI. Афорум йалаз чкIвыныргIа Къарча-Черкес йгьи Чачан республикаква рунашвачпагIвчва Темрезов Рашиди Кадыров Рамзани йрынйатI. АшIаква ъачIвагIа гIалхрала рпроектква агIвунашвачпагIвкIгьи йацыркIтI. ЙалкIгIата йыргвапхатI «Машук – 2018» форум йапхъагылагIвхаз Байрамуков Нюр-Ахмат атурист лшараква йырзынарху йпроект. Къарча-Черкес Республика а-Хъада, йшцIасхаз апшта, афорум йалаз разцIгIараква джьауап ритуата йгIаликIгIатI: «РшIыйара злу чкIвыныргIа рхъвыцща, рдунейпшыща йанакIвызлакIгьи йсгвапхитI. Сара ауат хIапхъахьыла хIреспублика, хIокруг, хIкъраль рпхыцIа абгата йрызхъацIа шауаш кьангьашра гьазгIазгуам». «Машук – 2019» форум ацIыхъва йнадзатI, ауи йалаз зымгIвагьи анцIрала ргвы йгIатахатI йгьи швапха бзи дырхIарныс рылшатI.