АШІЫЦРАКВА АБЗАЗАРА ЙАЛАРЖЬИТІ

Асквш 2012 йгІашІарышвта ахвыц йгьи аквтанай хІаракьатчпара йацкІрала апрограмма апкъ йтата аэкономика тшауацІыхрала РФ а-Министерства чкІвыныргІа ринновация ршІыйарала ауыжвгІанчІви квтаква (ЦМИТ) ргІаныршарала апроект абзазара йаланажьитІ. Ауи апш квта КъарчаЧеркес апынгьи йгІахъыртІра рмурадпІ. Ауаъа радиоконструирование, компьютер графика, дизайн, техника моделирование йахадыргIвазауата зтехнология надзара хІагІу аъамапсымаква йрыланхауа йырбжьуштІ. КЧР а-Правительства а-Председатель йзаместитель ПОЛЯКОВ Евгений, аэкономика тшауацІыхрала КЧР аминистр НАКІВАХВ Али йгьи ахІаракьатчпара йацкІрала а-Квта адиректор ЕЗАОВ Артур Ставрополь город апны йгІахъыртІыз ЦМИТ йцатІ. Къарча-Черкес йтыцІыз агвып ауи анхара шакIвшауа ддырбатI Ставрополь къральыгІва аграрна университет арыпхьара йгьи абжьара уысквала апроректор АТАНОВ Иван йгьи «Вектор» зхьзу аинновация ршІыйара Квта аунашвачпагІв КУЛАЕВ Егор. Ауат йшгІарархІвызла, Ставрополь край ауацІала ауи апш квтата йынхауа жвба йнадзитІ. «Вектор» Квта зымгІва рапхъа йгІахъыртІыз йгьи джьгарта тшгІазырбауа йрыуапІ. Ауи Ставрополь край йтагылу «Энергомера», «Монокристалл», «Электроавтоматика», Александровск электромеханика завод датшагьи анхарта дуква ртахъыраква дырхъйитІ, акрай чымазагІвтара йакІвдыршауа амедицина ркъьара хІатлаква рагІан йгІадрысабапуа аимплантква рзырчпитІ.