Сосы йылдынъ йырма биринши июнинде Карашай-Шеркеш Республикасынынъ Басшысынынъ борышларын заманлыша толтырувшы Рашид Темрезов республикамыздынъ Наркотиклерге карсы комиссиясынынъ план ман карарланган йыйылысын озгарды.
Йыйылыстынъ куллыгында РФ МВД-нынъ СКФО бойынша Бас управлениесининъ етекшиси Сергей Бачурин де ортакшылык этти.
Рашид Темрезовтынъ йыйылыста белгилегенинше, аьлиги шакта бизим юртымызда наркология бойынша аьллердинъ ийгиленуьви сезиледи. Ол затты санлар да беркитедилер. Суьйтип, сонъгы уьш йылдынъ бойында КЧР юртында наркоманиядынъ яйылувы 25,1 процентке тоьменлетилген. Аьллер, боьтен де, Карашай, Уруп эм Хабез муниципал районларында ийгиленгенлер.
Йыйылыста оьз ойлары ман РФ МВД-нынъ Керуьв-Кавказ федераллык округы бойынша Бас управлениесининъ басшысы Сергей Бачурин, КЧР МВД-нынъ уголовлык излев управлениесининъ басшысы Руслан Коркмазов, республикамыздынъ ден савлыкты саклав министри Казим Шаманов эм коьп оьзгелер боьлистилер.
Комментарии