АНАУКА АНХАГІВ ЦІАБЫРГЫ

Асквш 1984 агІан йгІацІцІыз апхьахьа БЕКИЖЕВ Мхвтар МхІамат йпа йгІвыра «Великая сила пролетарского интернационализма» ажвлара йаквнагу хвы аквырцІатІ. Арыпхьарала СССР йгьи РСФСР рминистерстваква рхъпшылра йацІата йгІацІырщтуаз «Известия Северо-Кавказского научного центра высшей школы. Общественные науки» журнал апны хІхаквлагІв йгІвыра йауацІыхта йгІаквчважватІ. Ауи анхара апны Бекижев Мхвтар ажвлара, акъральыгІва, атурых, апсихология нархараква рмагІны, ауагIа разазаъаща агІвычІвгІвыс йыхъазла магІныта йрыму гІаликІгІауата йызнымкІва «уагІахъа» ажва гІайрысабапитІ. Ауи азаман агІан совет жвлара азакІын, акъральыгІва политика апны ауагІа рацзакІыра акІвын рахІа магІны ззырбуз. ЙагІвсыз асквшышв й-80-хауа асквшква рагІан анаука апны ауагІахъара амагІны йапщылу ауысква гІащтІухра ахъазла хъацІара атахъын. ХІхаквлагІв йгІаджвыквцІараква йгьи йгІвыра апны йгIащтIихыз ауысква ауи атлахан йгІазгвнымгІвыз гьмачІгІвым. Йара уахьчІвагьи Бекижев Мхвтар ажвлара агватра ззынайырхауа гІазгвнымгІвуа йа йгІазгвынгІвра зтахъым аъапІ. Амайчра ду злата ауагІа млыкврхІара, аэкономика, ажвлара бзазара, акультура датшагьи йырзынарху архъвыхра нхараква йрылу апхьахьа ажвлара апны азазаъащаква, ашта атшауацІыхра йазынхауа амальква, абзазаща агъьчІвра йырпщылу анархараква цІолата дрызхъвыцитІ. Къарча-Черкес областьла арыпхьагІвчва ръачІвагІадырра йалархІарала аинститут унашва анахъицІуз Бекижев Мхвтар МхІамат йпа йкъральгІв джьгарра гІайырбатІ, ажвлара злалу уагІахъипхьадза рмагІны гІапхьадзара шатахъу гІаликІгІатІ, йара дызуу акъабардчеркес уагІахъа алшаракви агІальаматракви дрыквгІашІастІ. Ауи йнаука нхараква рцІолара йацхърагІатІ йарыпхьагІвчва – аистория наукаква ркандидатра йхчауата адиссертация данадынхалуаз зхъпшылра дацІаз апрофессор Чекменев Сергей Андрей йпа, адоктор диссертация анигІвуаз йнаука унашвачпагІвыз, йбергьльу аакадемикква Ким Максим Павел йпа йгьи Минц Исаак Израиль йпа. Ауат ацІабырг айрышта уазгылра шатахъу гІаршIикIгІатІ, хІхаквлагІв йдунейпшыща йгьи йхъвыцраква рбагъьара ауат къару ду аларцІатІ. Зыхьыз бергьльу апхьахьаква Бекижев Мхвтар йынхараква хвду аквырцІатІ, ауаса йара йхаквлагІвчва, ауи азаман авласть органква йрылаз йрыуата апхьахьа йхІвуз йадымгылуаз, йхътІыта йпшІагылуаз гьмачІгІвым. ЦІабыргыпІ, Бекижев Мхвтар ауи азаман «йшцІасыз» апшта ахъахьыла йгIархIваз йуагІахъа йрызцауа аполитика тшазынархараква йыгьрыцйымкІуазтІ. Ауи йдунейпшыща йынхараква рпны йгІайырбун, йхъвыцраква йанакІвызлакІгьи йащтацун, амц дгьадымгылуазтІ. АйчважвалагІв гвапата йырпхьадзауа Бекижев Мхвтар зынгьи дыздымгылуа гьцIайымкIуазтI, йхътІыта ауатыкв йгІатайцІун. Сара апхьахьа йцІыхъвахауа асквшква дыздынхалыз сахагІвазапІ. Ауат рпны ауи авласть йалу гватра ззалырхра атахъу гьгІайырбахуам. Бекижев Мхвтар ажвлара атшауацІыхра ащтацаща, йапшым агІаншараква йрыщатаз, аквыргъвгъвараква йыршвхІаусыгІвахаз гІайырбитІ, аполитика, аэкономика, ауагІахъара, анаука ртшауацІыхра шакІвшауа алйыргитІ. Бекижев Мхвтар йнаука нхараква рпны йазалху гыларта рымапІ КІавкІаз айсра йгьи Абашта айсра Ду йырзынарху агІвыраква. Ауи йхъвыцща йадымгылуаз ргвауарагьи, йдахІвраква йдыргвыжвкІуаз ацныхчылраквагьи дгІарылстІ. АмакІыракІгьи даламылуата Къарча-Черкес ауагІахъаква рпхыцІа йгьи ртурых йырпщылу, апхъаламгІвайсра йащату гІахъитIуата ажвипхьадза ашвага йызнымкІва «йыквицІауа» дынхатІ. Ауи ахъазла йцІолу адырраква йырхъазымкІва чхІарагьи уасаражврагьи уылазлара атахъыпІ, ацІабырг уамайжьауата, уажва йазхъауцІауата убзазара атахъыпІ. Апхьахьа йапхъала йырхІваз йа йырчпаз тшгьадикІылуам, йара йхъвыцща йанакІвызлакІгьи йымапІ. Ауи зынгьи ауыс «гьирыпшдзум», йара йшаъу апшта гІаншарипхьадза даквчважвитІ, ауаса йара йхъвыцща заджвгьи мчыла йгьипищылуам. Бекижев Мхвтар МхІамат йпа гІвтлахан дукІ адызкІылуа дгІвычІвгІвыспІ. СССР дакъральгІвта джьауапкІра ду шйылу йзыгІарбатІ. Россия Федерация дазгылата абзазара злащаквгылу агвынгІвыраква рхчара дазынхитІ. Ауи йагІвсыз азаман тшгьацрайхІвум, й-Псадгьыл апхъаламгІвайсра дазгылапІ. Ари ацахъра йгьи апхьахьа йуасаражвра ракІвпІ Бекижев Мхвтар йнаука йгьи йыршІыйара лшараква йрыщату. Апхъахьыла йщтІу йысквшквагьи йгвбайари йамайчри йрылымдзгІауа, згІвадари нцІра ауыри