АНАРХАРА ШIЫЦКВА ЙРЫКВГIАШIАСТI

КЧР а-Хъада ТЕМРЕЗОВ Рашид хIреспублика йгIайыз КъабардБалкъар Республика а-Хъада йхъвдаквцIараква заманкIла йзырхъйауа КIВАКIВА КIазбек дйынйатI. АгIвреспубликакI рунашвачпагIвчва КъабардБалкъар апны асквш 2019 Къарча-Черкес йа-Сквшта йгьи Къарча-Черкес апны йгIаталуа асквш Къабард-Балкъар йа-Сквшта йщаквыргылрала апхъала мачвы зцIарцIаз а-Унашва рхъйахара ахъазла йгIаргыз ажванахъаква йрыквчважватI. ЙшырхIвазла, ареспубликаква йырзалырхыз асквш Къабард-Балкъар йгьи Къарча-Черкес ращтаныкъвара тшауацIнарыхра йацхърагIуштI. – ХIреспубликаква айгвара рызбжьата щарда цIуата йащтаныкъвитI, – йхIватI Темрезов Рашид. – Ауи йашвхIаусыгIву хIъагвлачву йгьахъазым, хIцIасквали хIхабзаквали хIацапшыпI. Ауатква аэкономика уысквала ащтаныкъвара йацхърагIитI. Анйара апны йшгIалыркIгIазла, агIвреспубликакI апромышленна йгьи акыт млыкврхIара уысквала йащтаныкъварныс алшараква аъапI. ЙгIауахвырквын, ацIлауатраква, арахвырхIара ртшауацIыхрала ашвапхаква амырдуштI, аинвестицияквала йацынхуштI. Ауат ракIвымкIвагьи, туризмла алшараква гIадрысабап ауаштI. АгIвреспубликакI рунашвачпагIвчва ацынхара аштаква рэкономика тшауацIнарыхра йшацхърагIуш гIалыркIгIатI