ЙХIАРАКIУ АРТШХЪВАГАЛА ДГIАЛИКIГIАТI

Къарча-Черкес Республика а-Хъада ТЕМРЕЗОВ Рашид Москва а-Финансквала а-Университет аректор ЭСКЬЫНДАР Михаил «За заслуги перед Карачаево-Черкесией» орден йквнайыргатI. Ауи ауыс пшдза йазынархаз анйара йалан ауниверситет арыпхьагIвчва, РФ а-Федерация а-Совет йалу САЛПАГАРОВ Ахмат йгьи Москва КЧР-ла ащтийыгIв ГВАГВ Мадина. ХIреспублика аунашвачпагIв Москва а-Финансквала а-Университет аректор Эскьындар Михаил унашва зхъицIауа арыпхьагIвчва гвып экономикала зуыс йазъазу аъачIвагIагIвчва ъадрыхIазыруа ахъазла ажва пха щарда рзынайырхатI. – Къарча-Черкес Республика йабзазагIвчвата щардагIвы хIкъраль йапшым ашIыпIаква рпны адахIвраква рымата йынхитI. Уара, Михаил АбдрахIман йпа, унашва зхъуцIауа агвыпи уари йшврыхIазыруа аъачIвагIагIвчва гвымчIваква хIреспублика ахьыз хъара йдыргитI. ЧкIвыныргIа дырра рытрала, рыгIзара-бжьарала уыста йшвырхъйауа ахъазла квырмыш швзысчпитI. Ауниверситет йынхауа зымгIвагьи чIыдахъвы швхIаргванпI, йауа ухIварыквын, аректор хIара дхIхаквлагIвпI. Ауи Къарча-Черкес апачва цIабыргква дрыуапI. Асквш 2018, сентябрь а 7 ареспублика а-Мш анхIыртлапIуз Эскьындар Михаил АбдрахIман йпа орден йквнаргарала аунашва мачвы ацIасцIатI, – йхIватI Темрезов Рашид анйара апны. «За заслуги перед Карачаево-Черкесской Республикой» орден асквш 2013 агIан Къарча-Черкес Республика АуагIа Айззара (а-Парламент) ащаквыргылрала йнарахвтI йгьи йхIаракIу ртшхъвагапI. Ауи нхарала, жвлара уысла гIатгара зму, хъацIара гIазырбаз хIхаквлагIвчва йырквнадыргитI. Эскьындар Михаил йгIайквнадыргаз артшхъвага хвы шазибауа йгьи гватра ъайзалырхыз шигвапу гIаликIгIатI. – Къарча-Черкес Республика аунашвачпагIвчва социальна йгьи экономика тшауацIыхрала, ауагIахъа проектква абзазара йалажьрала уыста йдырхъйауа абзирала Россияла дахIврала тшауацIызхуа ашIыпIаква йрыуапI. Ажва пхата йгIасзынашвырхаз йгьи йгIасквнашвыргаз артшхъвага швабыжта йсгвапапI, – йхIватI ауниверситет аректор.