АКЪЫЛЬАКВШВАРА АНПШВЫМУ АГІАТГАРАКВА ЩАРДАХИТІ

Сквш 50 йнайгвгъитІ ХІАЧВЫКЪВА МухІамад Азамат йпа хІышта акультура атшауацІыхра дазынхауищтара. Ауи аквтанай апхьарта дангІалга Псыжв кыт акультура Тдзы йадиректорыз ХІачвыкъва АхІмад нхара дирайгватІ. РшІыйара злаз ачкІвын гврыхва «Абазинка» гвып дрылата дгІахІвуан, йдахІвраква гьгвымхамызтІ. ДукІ йнамихуата МухІамад Черкесск музыка училища ахореография хъвшара дыцІалын, анхарагьи ацйырцауамца дапхьатІ. Ауаъа дангІалга Краснодар культура институт йхІаракІу дырра гІацІигатІ. АъачІвагІагІв нхара дъагІарщтихыз амузыка училища хореографияла арыпхьагІвта 18 сквша дынхатІ, ауат йрыуата 10 сквша – ахореография хъвшара даунашвачпагІвын. МухІамад йбжьаз ачкІвынчви ахІвсси хІреспублика агород гІаныршаракви арайонкви рпны дахІврала йынхитІ, «Эльбрус» йгьи анахьанат ансамбльква рпны йгІахІвитІ. Зыхьыз бергьльу аршІыйагІвчва Джьанымбей Алибек йгьи Къараль Дмитрий йшырхІвауала, ащхъа гІахІвыщаква анцІрала бзи йдзырбаз МухІамад йакІвпІ. Ауи «Адиюх» ансамбль апны балетмейстерта дъадзанхаз азаман ауацІала афестивалькви анкъвакъвракви рпны йызнымкІва йагъьта тшгІадырбатІ, «Эльбрус» ансамбль йгІадырбалауа агІахІвыщаква рыуа гІвба зыргылыз МухІамад йакІвпІ. «Шаратын» йгьи «КІавкІаз» гІахІвыгІвчва гвыпквагьи «КІвашара» гІахІвыща йапшымкІва йрызйыргылтІ. ХІачвыкъва МухІамад Азамат йпа датшагьи уыскІ дазычпапІ – сквшщарда цІуата ауагІахъа музыка ъамапсымаква рпны гыларта ду зму адоул даситІ, дазъазатагьи йрыхІазыритІ, йгІадзынгылуа чкІвыныргІагьи ауи ауыс джьащахъва йазибжьитІ. Асквш 2019 апхын агІан Къарча-Черкес Республика апны йапшым анархараквала агІатгара джьащахъваква йырзынадзаз аршІыйагІвчва рфестиваль акІвшатІ. Ауи анкъвакъвра акъральла агІатгараква знырцІауа аэлектронна книга аредактор хъада Коненко Станислав, «Сильная Россия» жвлара организация йалу, «Воин» адкІылара йгьи спортла КЧР а-Министерства аъачІвагІагІвчва ргІаджвыквцІарала йадыргалтІ. Афестиваль метр 2070 зхІагІару Гум-Баши щхъахъысырта апны йакІвшатІ. Атуристкви абзазагІвчви швабыжта йрымаджьащахъвата йакІвшаз анкъвакъвра йапшытІ. Ауаъа рылшараква гІадырбатІ аршІыйагІвчва, къару ду злу хІхаквлагІвчва, йапшым аъачІвагІагІвчва. Учкекен кыт абзазагІв, сквш 75 йырту Бостанов Борис килограмм 80 зхІатлару аштанга 9-ны йщтIихтІ, Знаменка кыт абзазагІв Калабеков Ислам 7 дакъикъакІ рахІа дамкІуата ауаса йщын йгьи йашІыххтІ. Адуней ачемпион Узденов Марат 5 тоннкІ зчакьуаз аркъанла йацрахІваз ахмашинакІ пыцла дгІарыхъын, хвметркІла йатирыпатІ. ЙгІашІыхІпхьадзаз анкъвакъвраква ъадзакІвшуз азаман ауацІала дашІамсуата адоул дастІ Къарча-Черкес къральыгІва филармония аъачІвагІагІв, ахореограф, Къарча-Черкес Республикала гІатгара зму акультура анхагІвы ХІачвыкъва МухІамад. Ауи йхъатала йрыхІазырыз адоул 7 сахІаткІ руацІа дамайчуата дъасыз гватрадъа йыгьгІанымхатІ. Ауи Россия арекордква знырцІауа а-Книга аредактор Коненко Станислав йгьи аэксперт хъада Коненко Анатолий рымачв зцІаз сертификат гІайквнадыргатІ. ХІхаквлагІв йгІатгара джьащахъвала хйайхІвахІвитІ, апхъахьылагьи ршІыйарала адахІвра хІаракІква дырзынадзарныс йзыхІтахъпІ.