АБЫЗШВА АРДЫРРА ГВЫРГЪЬАХЪВТА ЙАНАЛУА

Ставрополь край «Абаза» уагІахъа-культура автономия апны йгІаныршу чкІвыныргІа «Бзибара» зхьзу радкІылара йалу ашІаква уыс бзита йдырхъйауа хІгазет анапаква рпны йызнымкІва хІгІаквчважвахьатІ. Щарда мцІуата асабиква рыбызшва ъаддырдыруаш архъвыхра проект анхара джвыквыржьтІ. Ставрополь город йбзазауа абазаква тгІачвала «Гвымзагъа» саби адкІылара гІаныршара йазынарху агвыргъьахъв йалан. Ауаъа йдрайгватІ «Амара» кIьанджь театргьи. Йапхъахауа апхьара сахІат апны асабиква хъвмарра турасы йтата ажва щарда ддырдыртІ, ачвапшыраква, апсауышвхІаква рыхьызква гІаддыргвалашвахтІ. Асабиква гІвгвыпкІта йыршан йадрыпхьатІ. Ставрополь край «Абаза» уагІахъакультура автономия йалу йгІадзынгылуа абанпара рцри бызшва ахьыла разыгІальаматра гІадыршІыхара ахъазла амаль шІыцква абзазара йалажьрала йамайчуата йынхитІ. «Гвымзагъа» саби адкІылара йазынархаз агвыргъьахъв Ставрополь край йбзазауа абазаква йрыуата щардагІв аднакІылтІ. Ауаъа анахьанат ауагІахъаква ргІащтийыгІвчвагьи драйгватІ. Таджикистан йауу астудентква йрымаджьащахъвадзата агвыргъьахъв йалан. «Амара» кІьанджь театр «ЗагІдан дзыгІв» ргылчІв гІадырбатІ, апшыгІвчвагьи ауи швабыжта йыргвапхатІ, напІасра дула йнардастІ. Абаза бызшва йапхъанчІвидзу абызшваква йрыуапІ, данхвыцу йгІашІарышвта йаламчважвауа, уадыргІвана ййырдырхырныс баргвхитІ. ЙцІыхъвахауата асквш 2010 агІан Россияла йакІвшаз ахъгІвылгІара йшгІанарбазла абаза бызшвала йчважвауа рпхьадзара 37831 ракІвпІ йнадзауа. АбызшвадырыгІвчва – афилология наукаква ркандидат, Къарча-Черкес Республика арыпхьагІвчва ръачІвагІа йъаладырхІауа аинститут абаза йгьи ачеркес бызшваква ркафедра аунашвачпагІв ХІасарокъва Бильаль йгьи Ставрополь край «Абаза» уагІахъакультура автономия апредседатель Чагва Армида хысквша цІуата ашІаква рцри бызшва рырдыррала уыс щарда дырхъйахьатІ. – ХІынхара апны асаби йцри бызшва ахьыла йазыгІальаматра шгІахIыршІыхуш хIащтапI. Ауи амщтахь ауат абаза бызшвала цкьата йъачважвауа ашІыпІа йантанагара ажвата йыргвныркІылуа рпхьадзара рыцІагьи йалахІитІ. Арыпхьара уыс апны аудио йгьи авидео амальква щардата йгІахІрысабапитІ, йатакІу амультфильмква гІахІырбалитІ. Ставрополь городла абаза бызшва ззырдырра зтахъу ахвыцква 60-гІв йнадзитІ, – йгІаликІгІатІ ХІасарокъва Бильаль. Ахвыцква йырхъазымкІва Ставрополь йынхауа, йбзазауа хІыгІвычІвгІвысква рыхъазгьи ахмызкІ курсквагьи адыргалтІ.