ЗШВАПХА ДУУЫЗ АГВЫМ ХЪАЦIА

УахьчIва йщаквгылу амамыр ащата щтIазцIаз, Абашта айсра Ду агIан зкърар йамайжьауата йайсыз, «ШвычкIвын йыдзща гьбергьльым», «Бхъапщыла фырта йхъа щтIайцIатI»-хIва зхабар гIагаз, лагIапкIта хIкъраль хыйа йгIагвыквсыз агъа далазрыхъвашата йапшым ахвыртаква зныта йгIахъынхIвыхыз, йалпIлаз аколхозква гIащтIызххыз хIхаквлагIвчва щардагIвыпI. Красна Восток кыт апны ветеранкIгьи дгьгIанымхатI. Ауаса абзазара ъадзакIвшауа хIмамыр гIазхчаз заджвгьи йхъацIара щтадъа йгьыдзуашым. Ауат рыхьызква ачвахъабагаква йырныпI, рхъацIара йагIвыгу атурыхква апхьартаква йазалху азалква рпны йгIарбапI, йызну ачвахъабага книгаква гIацIырщттI. УахьчIва сгIазквчважвара стахъу, сквшщарда рцIыхъвала адуней зхIваджьыз Джьаней Николай (Нахвыпщ) Абашта айсра Ду ахъа уалагата ацIыхъвадза дайсытI, йчынла дкапитанын, йапшым артшхъвагаква йщардан, аткъвым йырхъазымкIва, дыздыруаз зымгIвагьи йыладухун. ДЖЬАНЕЙ Нахвыпщ Джьантемыр йпа асквш 1922, ноябрь а 7 Красна Восток кыт дйытI, араъа дгIадзынгылтI. Йаба Джьантемыри йан Кваквыри адгьылрхарджьри арахвырхIари йырпщылан. АтгIачва пщгIвы йнадзун: Цаца, Нахвыпщ, Бубакьыр, Бабына. Джьаней Таймураз йгIайгвалашвахитI: Нахвыпщ акыт апхьарта быжькласскI бзидздзата дгIарылгатI. Асквш 1938 агIан СогIвым йтагылаз атехникум апхьара дырщтитI. ДангIалга йцри кыт дгIахъынхIвыхын, апхьарта апычIв классква рпны арыпхьагIвта далагатI. Дшынхузымцара айсра гIалагатI. Йгвыбзыгъаз ачкIвын акыт Совет дацхърагIун, айсра йызшIыртуаз ашвъаква ритуан. Ауи йанщчва ХъабльахьргIа Мадана йан «СычкIвын айсра ддырцитI»-хIва дчIвыуа данйызгIай, ауи дызныз ашвъа апны дйыхъын, йара тшаницIатI. Абауаса Джьаней Нахвыпщ арра дцатI. Ауаса Маданагьи ауи йцIыхъвала гIвба-хпа мзы рахIа мцIуата айсра дызшIыртын, дыгьгIахънымхIвыхтI, даладзтI. Нахвыпщ СогIвым датаргахын, апехотна училища дадрыпхьатI. ДангIалга, асквш 1942 агIан ЗакIавкIазскIа фронт, й-19-хауа архъв, й-1372-хауа стрелкова полк арота акомандир дизаместительта дырщтитI. Ауи ЗакIавкIазье, Курск дуга, Сталинград айбащраква датшагьи аласра щарда дрылан. ЙшихIвахуазла, Лагъь Осетия йаъу Ольхотово город йачвыхъарамкIва зны унашва зхъицIуз айсыгIвчва мадза-мадза агъа йгыларта гIарпшыхвта, бзыкIгьи дгIаркIыта йгIайхырныс гIарыхъвдаквырцIатI. Акомандир Джьаней Нахвыпщ рапхъа дгылата амажа йахъыстI, ргыларта дырхъвыхтI, офицер чын змаз бзыкIгьи дгIаркIын йшгIайхуаз анамыцаква гвы гIарыртын, йгIарайхсуа йалагатI. ХIайсыгIвчвагьи ауат йырпшIагылра атахъхатI. Ауи гвы азтыз хIырхъв айсыгIвчва атанкквагьи рыцта амажа йахъысын, згвы мгIвуз анамыцаква йырпшIагылтI. Ауаъа хIайсыгIвчва рчIвы хъахьхатI, анамыцаква рквнага йанырцIатI, апхъаланаскIьара джвыквырцIатI. Архъв акомандир Нахвыпщгьи йыгIвзачвагьи хъацIарата йгIадырбаз ахъазла йыртшхъватI, зымгIвагьи «За отвагу» медаль гIарквнадыргатI. Нахвыпщ йапшым аласра щарда дрылан. Ауи Маздагв аргванква йакIвшаз айбащра чвгьакI апны дангIархвы, Азербайджан ССР йаланакIуа Ленкорань город агоспиталь дщтIан. Йхвыртаква анбзиха ЗакIавкIазье айсра фронт й-88-хауа хIазырта йгылаз аполк (запасной полк) апны лейтенант чын йымата, авзвод дакомандирта даъан. Нахвыпщ йшихIвахуазла, Эльхотово кыт аргван дызлаз айбащра чвгьакI апынгьи дгIахвхатI, агоспиталь дыцIашватI. Ауаъа йкытлагIвчва Огвыз АхIмади ХвытI ЗукIанейи дыршIашватI. Нахвыпщ йщапIы гвымхата йхвын. Ахирург йщапIы данапшы «УщапIы бгIауа йалагуштI, йхъыхра атахъыпI» анихIва, Нахвыпщ гвасра дута йбатI. «Уара сщапIы хъухырквын анамыцаква сшпарпшIагылхуаш, ауат рхы йхIылнахыз сайщчва рща шпасхахуаш?» – йхIван йхвыз йщапIыла ахирург дгIайгърастI. Ауи збаз ахирург «Момо, ауаса ущапIы анузыкъьауазара йхъых гьауашым», – йхIван йгIанижьтI. Агоспиталь амедахща, Сталинград йауаз апхIвыспа Тарабановская Александра Николай йпхIа уахъгьи тшынгьи айсыгIв дгьикъвымцIуазтI, йхвырта дайъазун. Ауи лбзирала Нахвыпщ йщапIы дгIахвынгылхтI. Ауаъа абаза айсыгIви аурышв пхIвыспи абагвапхатI, йабгата айсра йгIахъшвалуазтын, йашIашвахырныс йангIалтI. Нахвыпщ йатаркIвах айсра мгIва дыквылхтI, асквш 1944 йгIашIарышвта й-4-хауа УкраинскIа фронт автоматчикква рвзвод дакомандирта дайсытI. ЙатаркIвах й-49-хауа агоспиталь дыцIашватI. МачIкI йхвыртаква анбзихах й-4-хауа УкраинскIа фронт, й-138-хауа стрелкова дивизия, й-344-хауа стрелкова полк дрылата Чехословакиядза днадзатI, ауаъа айсра алйыргатI. Абаза айсыгIв хъацIарата йгIайырбаз ахъазла «Орден Красной Звезды», «Орден Отечественной войны» йгIвбахауа йгьи йапхъахауа астепеньква, «За отвагу», «За оборону Кавказа», «За оборону Сталинграда» медальква, Сталин йымачв зцIаз артшхъвагаква гIайквнадыргатI. Асквшква 1945–1946 рагIан аофицерква рдырра йъаладырхIуа акурсква дырщтийын, дапхьатI. УацIыхъван ПрибалтийскIа айсра округ акадрква ротдел арезервква дрылан. Асквш 1947 агIан йцри кыт дгIахъынхIвыхтI. УацIыхъван йбзазара йахъвыта йпхьадзаз, йайъазаз, йпсы бзи йабаз амедахща Сталинград длыщтацан дгIайаухтI, накьахI ргIвын, Пятигорск йгIахъынхIвыхтI. Нахвыпщ «Пятигорсксельмаш» нхарта апны слесарьта йынхара джвыквицIан, аинструментальна цех даунашвачпагIвта асквш 1982 агIан тшпсщара дчIвахтI. Ауи йынхара хвы азырбауата йсурат ачIахIра гъвы йгIакIыдырцIатI, «Ветеран труда» медаль, йапшым артшхъвагакви асогIакви гIайквнадыргатI. Нахвыпщ йхъапщыла адуней анылхIваджь йкыт йазаргваныз Кисловодск город дгIахъынхIвыхын, йбзазара сквшква найдасхтI. Джьаней Нахвыпщ асквш 2011, ноябрь а 10 адуней йхIваджьтI. Дъайыз, йцриква ъацIаз акыт дгIаргхын, адгьыл дартхтI. Ауи сабикIгьи дыгьгIайтнымхатI, йпхыцIа АлахI ауаса йхасазарын. Ауаса хIмамыр зхчаз, зкытлагIвчва бзи йызбуз, дгIазлыцIыз аткъвым рыхв назмыркъвуаз, хъардугата йрымаз йфырра зынгьи йгьырхъаштылуашым, ртурых анцIрала дгIалахуштI.