АЙСРА АЛАКТА ЙТАПШЫЗ

Абашта айсра Ду лдзгIарати гIапсарати ауагIа йднарадзаз уаквчважвапхьадзагьи йухIвуш угьалгум, ауипхьадзагьи хабар джьащахъвакI, шIыцракI уанйитI. Айсра сквшква рагIан АлбыргIан йауата Урал (Челябинск область, Златоуст къала) йаъаз йрыуапI ТIыкIва ЗамахIщари, Шай Люба, КIам Гваща, Къвырча Щумисат. Арат апщыгIв йрыуата хIызту азаман адуней йыкву ТОБЫЛЬ (Къвырча) Щумисат лакIвпI. Кълыч Руслан йгIвыта Щумисат лгIагвалашвахраква «Абазашта» газет зны йгIаншвалхьатI. УадыргIванагьи, «ауи агIвыра йаламшвата ужвыгьи хабар шIыцквакI лсырхIвахырныс сайгвгъауата Щумисат дъабзазуз аурамла сымгIвайстI. «Ари сыззцауа сшпалынйуш йара? КIара лыхьуата дщтIамкIва слыквшвазарквын бзийын»-хIва съанквынта сшымгIвайсуаз ргвашв санаргванха сгвы гIабзихатI. Ахъвлапынхъагьи гвахъван, йтынчын. Щумисатгьи лыгвла Тобыль Зайыри лари агвашв аквчIварта йыквчIвата йайчважвауа снарыдгылтI. Сальам анрасх амщтахь Щумисат сыззцаз смурад гIалгвынсыргIвытI. Щумисатхузгьи дгIагвыргъьачIватI. «АлахI дбзыразхатI бъагIайыз. Йара йгIасрыхIазырхьатI сшвъаквагьи смедальквагьи, «заджв дгIанысылпI, йабацара», – схIван пасата йгIасраргвантI», – лхIватI ауи. Араъа Щумисат гIапсарата йылбакваз дрыквчважвауа далагатI. Лыгвла Зайырагьи Щумисат йылхIвахуата йылгIаз ахабарква гIалгвалалыршвахуан. УадыргIвана атдзы хIнашылын, Щумисат лмедалькви ауат йрыцу ашвъакви слырбауата, «арат закIзаджвыкIгьи ахъазгIваца йыгьгIасырымттI, гIапсарата са йсгвашIыз АлахI йакIвымкIва заджвгьи йгьидырам» лхIватI. Тобыль Щумисат йшылхIвахуала, тшынла азавод ахыхъвшвква уандыр чкIвынла йатдрыпун, уахъынла ачкIвынчва йырзырчпаз айха ауырала ачартаква йгIакIарпсахуаз ачIахъва цIабылква гIадыркIвыруан. УагIа щардадзан, ахвымбырцIакIьа йапшын. Азаман къвльайсызызтIхIва ауаъа азавод дуква тагылан, йашIамсуата атанкква асамолетква гIацIцIуан, уыр-хIва йырхъыпссгIун. ХIхаквла йауата Щумисат йлыцын ЙынджьыгьчкIвынла йтыцIыз Быджь ФатIима, ХIаткъва Аскьырхан, Къардан Дзадзуна; Къвбина кытла ртдзыхьызква гьылдырхуам, ауаса ахъацIа хIагIа дуква Рауфи Маци рунашва лчпатI. Урал данаъаз асквшква йылбаз данрыквчважвахуа Щумисат лажва ахъа далапI Дзадзуна. Ачарта мацIаугIвыта йынхуз Къардан Дзадзуна лрызкъы Щумисат лапшта щардагIвы гIащаквнажьтI, апсапа АлахI йгIалпигалтI. – Тшынла швабыжта хIгIапсун. ЩардагIвы ауыс хIатла, амла, ахьта. гьырзымчхIузтI. ТIакIв тшызпщара зтахъыз ачIвымыгъ йшидыруаз дахъапун йа ацIлаква ъапыркъуаз йахьнышвтызшва рщапIы пыркъуанта ахвырта ъадзайыхуа йгIарнатуаз амшква тшпсырщун. Щыбжьанла чара хIгьгIамихуазтI, хъвлапныла йхIфуш рыцIа щардата йгIахIыртхырквын хIымгва чвыта хIщтIалхра ахъазла. «ХIымгва чвыта» анухIварагьи, ауи зырчвуашыз дукI гIахIыртуазма? Акъашыкъ гIалгIватIуанта йгIанакIуаз акIвын, хъварпкI ангIанагуазгьи аъан. Хъваца ццан йхIыжвуаз. Уымгва бжата уычва гIайума? АйхIара хIшчважвузымца йшун. Амгва закIы йгьапшым. Мгвала хIгIапсатI. ЗамахIщари рыцхIа адыгьа рызкъы дашIпсгIун. «Щумисат, йшпаббауа? ЙанбакIву хIцахта хIгвы йадыруа хвшабаста тIакIв анхIфуш?» - хIва дгIасцIгIагвыщун. Ауи йажваква ауи аъара йгврыдзганта сыладзква счвгIайуан. Йаргьи дпсгвыщан ауахь дандыргIалхтI. ХIан-хIабачва апосылкаква нарщтиуанта ауат йгIартыцIуаз хIфун, йпскваз рпосылкаквагьи хIара йхIзыгIанхун. Азаман хIатлан, арызкъы къытын. Щымтала анхарта хIцарыквын гIвыджь-хыгIв псыта хIцун, мшигIадзагьи псра аъан, йпсуагьи дгьджьарымщахуазтI. БыджьргIа ФатIима цIла ъапыркъуаз акIвын дъаныз, ацIла йгIакIахIуз гIалыквшван дпсгвыщатI. Арыла дгIаргхтI. РыцIа йахIбачваз бна пыркъуан. КIам Гващагьи Шай Любагьи бна пыркъуан. Сара сысквшпхьадзарала сайцIбанта ахIбачва сгьрыцмызтI. Уахъынла хIангIадгылхра хIабабун. Акъвашква рапшта ауырата йхъвкIылата апещква рпны хIыгIвнан, ачвартагъв аквгылаква рпны хIычвуан. Москва йгIатыцIуанта мызигIадзапхьадза комиссия гIайуанта йгIахIпшуан. Сара уыбаджьыбата сгIвычан йгьи самлаганта спхIвыспачкIвынта заджвы йыгьйымдыруазтI. ГIвысквши бжакIи анцIы «малолетка»-хIва сщаквдыргылын, сгIауырщтхтI. ЗаджвзаджвыкIгьи дсыцымкIва ауаъа сгIатыцIын, Астраханьла сгIайхтI. АмгIва йыквпсуазгьи даъан. СъагIайхызгьи айсрапI йакIвшауа. ХIара аклуб хIадзхъанта йыгIбун ауаъа анамыцаква шыгIвназ: йгIахIвуан, йхъвмаруан, рбыжьква дууын. Арыла ашкIолыжв апынгьи рэшелонква гылан. ХIабазла йгIалбгIахуазгьи ауаъа йгIадгылуан. Аклуб йыгIвнамшвуз аргван йбзазауз рпещква рыквырхуан. ХIаргьи ауаса – хIангьи, хIабагьи асабиквагьи зымгIва – пещкI хIыгIвнарпсан, дара йшыртахъыз апшта арахьарат апещква йрыгIвнан, йхъахсылуамца атдзакв йаквыз акъамыш айачIваква убауа йдрыкIынхIаратI, – йгIалгвалашвахитI Щумисат. – Сара Мамей рыцхIа йтара Урал сцатI. Ауи дгьгIамихуашызтI ауаъа. Сара ахIайльараква здыруанта сгIарыцIсуан. Мамей рыцхIа йымщтахьгьи зъара нсцIыхыз бапшы. Тобыль Щумисат медальта хвба лымапI. Ауат йрыуата апщба Абашта айсра Ду АйгIайра асквш 50, 60, 65, 70 йырзынархапI. «Анхара а-Ветеран» хьызгьи асквш 1980, май а 16 йгIалквнадыргатI. Абараса дшчкIвыныркIваз агIапсара йгIацIагылыз Щумисат дъанхалакIгьи лыхьыз бзирала йырхIвауа лбзазара мгIва гIамылдатI. Апрель а 27 Тобыль Щумисат сквшпщынгIважви жвыгIв лрыцкьатI. ЛынцIра-бзазара апны гIапсарата йылбаз алала Щумисат дбзипI, лщапIы дхвынгылапI, агвашвхъагьи дызгIайитI, агвлачва пхIвысква дрыдзхъачIвата хабар-хайыркIгьи йаквчважвитI. Дызкву АлахI дахъимбгIатI. Данйыз амшлагьи АйгIайра амшлагьи хIлайхIвахIвитI. Щумисат згIвадара багъьа лымата, лымшква лашарата, лтгIачва ргIариква рыхайыр щарда йылбарныс, дыззабакIыз амамыр бзазара лгвы анчвгIарныс лзыхIтахъпI. АйгIайра а-Мш агвыргъьахъв сквшщарда йналдасыргIатI! М