АН ЛГВБАЙАРА АДУНЕЙ ГIАНАРКIКIИТI

Черкесск акультура Тдзы апны ан лы-Мш йазынархаз агвыргъьахъв айззара йалан КЧР а-Хъада ТЕМРЕЗОВ Рашид, КЧР АуагIа Айззара (а-Парламент) а-Председатель ИВАНОВ Александр, адепутатква, КЧР а-Правительства анхагIвчва, хIреспублика агородкви арайонкви рхъадаква, анчва. КЧР а-Хъада Темрезов Рашид агвыргъьахъв йдрайгваз саби щардагIв зму атгIачваква ан лы-Мшла драйхIвахIвтI. – ЙтлапIу анчва, асабиква мгIва тамам йъахвыншвыргылуа, рпатриот бжьара къару ъалашвцIауа, хIреспублика, хIкъраль ркъагIара, ртшауацIыхра йазынхуш гIари гвыбзыгъа ъагIадзыншвыргылуа ахъазла сшвзыразпI. ХIара хIзырбзазауа, хIыззбзазауа швара швакIвпI. Швпхара, швбзибара ъахIыгшвмырхауа ахъазла квырмыш ду швзысчпитI. ДзачIвызлакIгьи швгIариква гвыбзыгъата, ръадаб пшдзата, ртгIачва йрызцIабыргта йшгIадзынгылуаш йазхъасцIитI, – йхIватI Темрезов Рашид. Ауи аныта 24-гIв «Материнская слава» ЧIахIра гвплацIаква, асогIаква риттI. Ари ачIахIра согIа йанкъвгагIвхаз йрыуапI хвгIвысабичва зму Псыжв кыт абзазагIв ШенкIауа Марина Мурадин йпхIа, хвгIвысабичва гIадзынзыргылуа Бала Зарема ХIаджьгьари йпхIа (Къвбина), хвгIвысабичва ран Джьгватан Светлана Сергей йпхIа (МалоабазинскI) датшагьи. Агвыргъьахъв апны КЧР а-Правительства а-Председатель йзаместитель Суюнов Джанибекгьи анчва агвыргъьахъвла драйхIвахIвтI. Ауи асцена йдрайгваз бзита йапхьауа, талант зму саби гIадзынзыргылуа анчва асабиква рбжьара, рарыпхьара къару ъаларцIауа ахъазла дшырзыразу йхIватI. Суюнов Джанибек согIа зитыз анчва дрыуапI Псыжв кыт абзазагIв ПатI Лариса Ибрахим йпхIа. Ари атшын ан лы-Мш йазынархаз агвыргъьахъв дрыпшдзатI хIреспублика ашвахIвагIвчва, агIахIвыгIвчва. ДзачIвызлакIгьи йыхъазла ан лацкIыс аргваны дгьаъам. Ауи гIазгвынгIвуа хIкъраль, хIреспублика рунашвачпагIвчва саби щарда зму атгIачваква социальна цхърагIара драдзарала йгIадрысабапуа амальква сабапра шгIаргуа гIалуымкIгIушта йгьаъам.