ЙХIАРАКIУ РТШХЪВАГАЛА РЫХЬЫЗ РХIВАТI

Рашид Абашта айсра Ду аветеранкви атыл анхагIвчви дрынйатI. АхIбачва йрайхIвахIвырныс йгIадгылтI КЧР АуагIа Айззара (а-Парламент) а-Председатель ИВАНОВ Александр, КЧР а-Правительства а-Председатель УАЗ Аслан, афедеральна инспектор ДРАЛЬЩИКОВ Игорь, Черкесск город амэр ТАМБИ Руслан, ахабзахчара органква рунашвачпагIвчва. Ауи атшын хIреспублика аунашвачпагIв КЧР йхIаракIу артшхъвага – «За заслуги перед Карачаево-Черкесией» орден афронт йпшцIаз цгIвы йырквнайыргатI. Ари артшхъвага тлапIа БЕЛЕНЬКИЙ Макс Владимир йпа, ЖУРАВКОВА Екатерина Степан йпхIа, ЗОРИН Виталий Гаврила йпа, МАРТИДИ Георгий Иван йпа, НИКУЛИНА Вера Николай йпхIа йгьи ХЕЖЕВ Рамазан ХIаджьмырза йпа йриттI. Анйара апны айсра зыла йыцIсыз ргIагвалашвахраква йрыздзыргIвытI, аветеранкви атыл анхагIвчви пхата йрайхIвахIвтI. – АуагIахъаква зымгIва пIатIу ду ззырбауа агвыргъьахъв – АйгIайра а-Мш айсра агIан хIабадучва фыррата йгIадырбаз ангIахIгвалашвахуа мшыпI. Швара йгIатыжвгаз айгIайри амамыр бзазари рыхв дудздзапI. ШвхъацIара, швфырра, швамайчра нхара, швчхIара абанпараква рыхъазла йанакIвызлакIгьи йшвапхазлуштI, – йхIватI Темрезов Рашид. Анйара йалаз айсра сквшква рагIан зхъа щтIазцIаз, адуней йыквхым айсыгIвчва гIаргвалашвахуата хъмаштылра дакъикъа йгылтI. Ауи атшын гватра ззалырхыз аветеранква рыхьызла ОВСИЕНКО Григорий Павел йпа хIреспублика аунашвачпагIвчва аразыра ажваква рзынайырхатI