АБАШТА ЙАЗРЫМУ АБЗИБАРА ЙАДНАКIЫЛТI

Абашта айсра Ду алгищтара йцIуа асквш 74 йадахIвуата май а 7 Россия ауацIала «Диктант Победы» акция адыргалтI. Ауи йацыркIтI КъарчаЧеркес абзазагIвчвагьи. «Единая Россия» политика партия агIаджвыквцIарала йакIвдыршауа «Историческая память» проект апкъ йтата АйгIайра йазынарху адиктант сынчIва йапхъахауата йыргIвытI. Архъвыхраква Россияла площадкIата 1189 йгьи агIвымакъральквала 23 рпны йакIвшатI. Къарча-Черкес Республикала ари архъвыхра Лагъь-КIавкIаз къральыгIва гуманитар-технология академия апны йахъыстI. «Диктант Победы» ныбыжьла йапшым ауагIаква хIкъраль атурых, Абашта айсра Ду йапщылу агIаншараква шырдыруа гIазрыбергьыльуа нхарапI. Архъвыхра азцIгIараква 20 йнадзун, адиктант гIвра йалалыз ауи дырхъйара ахъазла дакъикъа 45 гIарнатуан. Ауи атшын СКГГТА абидольква рпны аволонтерква нхун. Ауат йгIадгылуаз йнашылра ъатахъу рархIвуан. Черкесск апны архъвыхраква йырхъысырныс йгIадгылтI Къарча-Черкес Республика а-Хъада ТЕМРЕЗОВ Рашид, КЧР АуагIа Айззара (а-Парламент) а-Председатель ИВАНОВ Александр, КЧР а-Правительства а-Председатель УАЗ Аслан, Абашта айсра Ду аветеран ГОФМАН Борис, адепутатква, хIреспублика арайонкви агородкви ргIащтийыгIвчва, апхьагIвчва. «Единая Россия» ашIыпIа хъвшара а-Исполком аунашвачпагIв йзаместитель Дзугаев Альберт архъвыхра магIныта йаму айшыста даквгIашIастI. – Ауи Абашта айсра Ду атурых акъральгIвчва хвы шазырбауа, йхчара атахъыта йшырпхьадзауа гIанарбитI, – йхIватI Дзугаев Альберт. – Фыррала йырчву хI-Абашта атурых абанпараква апызщылуа хацпI. Ари акция хI-Псадгьыл атурых ашIаква йырзызхчауа амальпI. ХIреспублика а-Хъада Темрезов Рашид йгIайззаз АйгIайра а-Мшла драйхIвахIвтI. – ХIкъраль ахъазла АйгIайра а-Мш рахIа йхъаду гвыргъьахъвпI. ХIреспублика апынгьи, Россияла, анахьанат акъральквала рпны апшта, ауи агвыргъьахъв хвду азыгIбауа йхIыртлапIитI. ХIара йгIахIгвынгIвитI хIкъраль мамырта йбзазарныс ахъазла хIахIбачва къарута йаларцIаз, – йхIватI Темрезов Рашид. – ХIара йалачпу турых зму ауагIа хIыртынхапI. Афронтква рпны хъамайгьдзара гIазырбаз хIайсыгIвчва айсра амщтахьгьи лдзгIара ду задзаз хIкъраль амлыкврхIара гIащаквдыргылхуан. АуагIахъаква рацзакIыри рацацхърагIари рбзирала Россия адуней апны рыцIа зкъару мчу акъральква хIрылапхьадзапI. Абашта айсра Ду айсыгIвчва згIвадара багъьа швымата ужвыгьи сквшщарда швхIыцызларныс швзыстахъпI! Темрезов Рашид «Я нужен своей республике» проект даунашвачпагIвпI, ауи архъвыхраква йгIарылалыз аветеран Гофман Борис согIа йыйттI. Иванов Александр йшихIвазла, азаман агIвситI, ауаса АйгIайра а-Мш амагIны гьнакъвуам. «Единая Россия» политика партия йадыргалыз адиктант йгIадзынгылуа абанпара айсра гIаншараква рдырра ахъазла йакIвдыршитI, хIреспублика аунашвачпагIвчва дара ршвапхала чкIвыныргIа рдырраква дырхъвыхырныс йаквгIазшIыртитI. Арыпхьарали наукали КЧР а-Министерства агIащтийыгIв Агошкова Татьяна архъвыхраква йырхъысырныс йгIайззаз йазалху абланкква йшыртагIвуаш йахалыргIвазатI. Архъвыхраква джвыквырцIара апхъала ауи йгIадгылыз Москва Поклонна бхъвы йакIвшуз адиктант йалаз аветеранква ргIачважвараква телебарала йапшытI. ЗымгIва рапхъа азцIгIараква джьауап рызтыз Темрезов Рашид йбланк ритхын, йгIайззаз зымгIва дшырзыразу райхIвтI.  Абаза муниципальна район администрация ахъада НЫР МухIаджьыр йшихIвазла, ари йапшу акцияква магIын ду рымапI. ЙгIадзынгылуа абанпара хIкъраль атурых рдырра атахъыпI, чкIвыныргIа рпатриот бжьара йацхърагIитI. – Абашта айсра Ду лдзгIара днамрадзауата унагIвакIгьи гьгIанымхатI. ТшауацIызхуа, апхъала йчIвырхъауа хIкъраль апны йгIадзынгылуа абанпараквагьи ауи йшахъвыкIу рыладырхIвара магIын ду амапI, – йхIватI Ныр МухIаджьыр. – УахьчIва хIызхъысыз архъвыхра азцIгIараква сара сыхъазла йыгьбаргвымызтI. Ауат агIаншараква апхьарта хIаныцIаз бзита йхIгвынхIкIылыз ракIвпI. Абаза район администрация ъачIвагIагIв хъадата йынхауа ХIвырйа Ася рахIа йайцIбу дрыуапI, ауи лыхъазла адиктант азцIгIараква рызджьакI баргвын. Ага ауаса йаъазтынгьи, ари апш акция ъадыргалыз дайгвыргъьитI, йлымдыруаз щарда лылалкIтI, апхъахьыла дыздынхалуаш гIалрыбергьыльтI. Абашта айсра Ду агIан йпхатшу айбащраква, айсыгIв-фырква рыхьызква, акъала-фырква датшагьи йырзынарху азцIгIараквала йалаз адиктант агIарбараква июнь а 12 «Диктант Победы» асайт апны йгIатарцIуштI. Йызтахъу дзачIвызлакIгьи тшрыхайыргIвазара, онлайн-тестла йдырраква йырхъвыхырныс йылшуштI.