АГIАЦIЩТРА АСКВШЫШВ ДЫРТЛАПIАТI

Асквш 1918, июль а 4 урышв бызшвала йгIацIцIуа йалагаз агазет йапхъахауа аномер апхьагIвчва йырнапIыцIашватI. ХIхаквлагIвчва ахабар шIыцква дзырдыруаз агIацIщтра апхъапхъа «Известия Совета народных депутатов», уадыргIвана «Красные горы Кубани», «Красные горы», «Баталпашинская правда», «Горская жизнь», «Ленинское знамя» ахьызта йгIацIцIуан. Совет Союз аналпIлах агазет «День республики» ахьырцIахын, уахьчIва йъагIадзаз мчыбжьыкI апны хын абзазагIвчва йрадзитI. Агазет йахъыцIыз асквшы 100 йазынархаз агвыргъьахъв Черкесск город акультура Тдзы апны йакIвшатI. Ауи йалан КъарчаЧеркес Республика а-Правительства анхагIвчва, АуагIа Айззара (а-Парламент) адепутатква, апхьагIвчва. Агазет ареспубликала йыншауа ашIыцраква йырхъазымкIва абзагIвраква, апублицистика джьащахъваква, йапшым ахабзаква, ащаквыргылраква гIанылитI. «День республики» газет аредакция анхагIвчва хIреспублика а-Хъада Темрезов Рашид йыхьызла пхата драйхIвахIвтI Къарча-Черкес Республика а-Правительства а-Председатель йзаместитель Чеккуев Хзыр. – Ареволюция амщтахь, азаман швабыжта йантынчмыз агIан йгIаншаз агазет мгIва джьащахъва гIамнадатI. УахьчIва йгIважьхаз ауи архив напаква анахъхIрышвтхуа бызшва щардала йалу ауагIахъаква ъабзазауа хIшIыпIа штшауацIнахуаз уыла абгата йгIацIанажьхитI. Ателебара, арадиуа, а-Интернет йшырчпалакIгьи ашвъабыгъь гIацIщтраква йрайгIайырныс гьрылшум. Агазет йану ажва апхьагIвчва йазхъарцIитI, хвы азырбитI. ХIапхъахьылагьи уахьчIвала агазет йадынхалуа аршIыйагIвчва йгврыхву ажурналист шIаква гIарыцIагылыргIатI, ражва шIымчIварагIатI, – йгIаликIгIатI Чеккуев Хзыр. Агазет аюбилейла ауи анхагIвчва драйхIвахIвтI йгьи артшхъвага грамотаква риттI регламентла, амандат йгьи ахабарргагаква руысквала КЧР АуагIа Айззара (а-Парламент) адепутат Акбаев Ренат. Агвып йрайхIвахIвтI Байрамыкъва Халимат лыхьыз зхъу ареспублика библиотека адиректор Хапчаев СальыхI, Къарча-Черкес Республика Ажвлара палата апредседатель Молдованова Вера, ауагIахъа уысквала, ажвлара коммуникацияквала йгьи печатьла КЧР аминистр йзаместитель Хвби Ислам, арыпхьарали наукали КЧР аминистр лзаместитель Семенова Елизавета, «Абазашта», «Къарачай», «Ногай давысы», «Черкес хэку», «Черкесск. Вчера, сегодня, завтра» газетква рынхагIвчва. «День республики» газет аредактор хъада Кратов Евгений агвыргъьахъв йгIадгылыз зымгIвагьи разыра ажва рзынайырхатI. Ареспубликала йбергьльу ашвахIвагIвчва йадыргалыз аконцерт агазет аюбилей йгIадгылыз асасчва рнашх рыцIагьи йщтIнахтI.