АЪАЧIВАГIАГIВЧВА РШВАПХА АМЫРДАТI

ЙтыцIыз асквш декабрь а 25 агIан арыпхьарали культурали Абаза район а-Унашвачпарта агIаджвыквцIарала АлбыргIан, «Аленушка» сабигIзарта апны семинар акIвшатI. «Деятельность педагога ДОУ в формировании разносторонней личности в условиях реализации ФГОС» хъата йызмаз ауи асеминар йалан асабигIзартаква рунашвачпагIвчви рметодисткви. Арыпхьара джыпха шIыцквала асабиква йапшым ауысква йыргIаджвыквцIагIвта, ркъаруква йрызхъарцIауа, заджвгьи ймайгвгъауата рхъамаль рзыбахуа, рдунейпшыща ауацIыхта, адырраква йрызгIашыкъта йаъазлара атахъыпI. Арат алкIгIараква «Аленушка» сабигIзарта апны йшырзырбжьауа тшахаргIвазара акIвын асеминар ззынархаз. Ауи йалаз аъачIвагIагIвчва арыпхьара федеральна къральыгIва джыпха (ФГОС) йахIбу йгьи аквтанай гвыпква рпны абзазара йшаларжьуа йадырпшытI. АхIбачва гвып алаборатория апны архъвыхраква акIвдыршауата ахш алкIгIараква, ауи йанчIвчIвра алаща штшапсахуа тшахадыргIвазатI. Аквтанай гвып рапхьара сахIат «агъын локI бна» ауацIа йакIвшатI. Акытчаква йгIарныцIуа ззыгIадыруаз асабиква АсхьырчIвачIва лсогIаква рквнадыргатI. Абна гIамдараква руацIала асабиква йгIакIвзыршауа апсабара шырдыруа, математикала рдахIвраква шаъу, джьгаррата йрылу гIадырбатI. Асеминар йалаз рыхъазла асабигIзарта музыкала арыпхьагIви асабикви абаза бызшвала йадыргалыз Асквш шIыц йаздрыхIазырыз агвыргъьахъв йадырпшытI. Асабиква ашва рхIватI, йгIахIвытI, ауысаква йгIарыпхьатI. Асасчва АлбыргIан асабигIзарта абжьагIвчва рынхара хвду аквырцIатI, асабиква рдырраква арыпхьара федеральна джыпха шIыц атахъыраква йшрыквшвауа гIалыркIгIатI. Асабиква рыдынхалрала шIыцрата йырбаз швапхата йшгIадрысабапуаш рхIватI.