Москвада юртымыздынъ ден савлык тармагы акында

15 ноябрьде Москвада КЧР Басшысы Рашид Темрезовтынъ ой этуьви мен эм Россиядынъ ден савлыкты саклав министри Вероника Скворцовадынъ тапшырувы ман онынъ биринши орынбасары Татьяна Яковлева Минздравтынъ баьри департаментлерининъ етекшилери мен йыйылыс озгарды. Онда Карашай-Шеркеш Республикасынынъ «Ден савлыкты саклав» Миллет проектинде катнасувы тергелди. Республикадан йыйылыста Федерация Советинде КЧР-дан агзасы Ахмат Салпагаров, вице-премьер Джанибек Суюнов, Москвада КЧР-дан дайымлык элши – вице-премьер Мадина Гогова, ден савлыкты саклав министри Казим Шаманов, регионлык кан-тамыр орталыгынынъ етекшиси Марат Темрезов катнастылар. Йыйылыстынъ барысында Минздравтынъ департаментлерининъ етекшилери республикадынъ ден савлыкты саклав туьзилисининъ баьри йоьнелислерининъ куллыгынынъ тергевин коьрсеттилер. Куллыктынъ тамамларына ийги белги берилди. Сондай болып, йыйылыста шешуьвди талаплайтаган соравлар белгилендилер, сонынъ санында «Ден савлыкты саклав» эм «Демография» уьстинликли миллет проектлерининъ калыбында. Татьяна Яковлева регионда декабрьдинъ сонъына дейим косымша аьризелерди бермеге амалы бар болувын белгиледи. Сондай болып, ол йыйылыстынъ барысында Миллет проектине кирмеген маьселелер бойынша тапшырувларын этти. Айырып айтканда, олар республикадынъ ден савлыкты саклав объектлерин ремонт этуьвге, алат-садак пан канагатлавга, тавлы ерлерде орынласкан медициналык учреждениелерин косымша санитарлык автотранспорты ман канагатлавга каратылдылар. «Бизим йолыгысты бек маьнели деп санайман. Неге десенъ, «Ден савлыкты саклав» миллет проектининъ калыбында таралтылаяк амалламалардынъ негизинде аьдемнинъ яшавы эм савлыгы турады», – деди КЧР Басшысы Рашид Темрезов, йыйылыс акында ойын билдирип. «Карашай-Шеркеш Республикасынынъ сулыбын баска регионлар да алмага кереклер. Толылай алып караганда, Карашай-Шеркеш Республикасынынъ ден савлыкты саклав тармагы тезликли оьрленеди. Буьгуьн белгилеген практикалык абытларды бажарув ман республика Россия Президенти Владимир Путин оьзининъ Ой-хатында билдирген коьрсетимлерге етиспеге амалы бар, сонынъ санында яшав оьмирининъ узайтылувын, маразлардынъ бас коьрсетимлери бойынша оьлуьвлерди кемитуьв, саьбийлердинъ оьлуьвлерининъ санын тоьменлетуьв. Куллык этеекпиз», – деп билдирди йыйылыстынъ тамамлары бойынша Татьяна Яковлева. КЧР Басшысынынъ эм Правительствосынынъ прессслужбасы.