ХОЛОКОСТ ЙАНАКIВЫЗЛАКIГЬИ ХIХЪМАШТЫЛРА ЙАХЬЫГIАЗЛУШТI

Россияла холокост арыцхIагIара зыла йыцIсыз рхъмаштылра йазынархаз амчыбыжь акIвшатI. «Холокост» – ангьльыз ажвапI, урышв бызшвала йатаукIырквын, «всесожжение» гIанакIитI. Ауи амчыбыжь апкъ йтата Къарча-Черкес Республика Ажвлара палата апны «Холокост: уроки памяти для будущих поколений» зхьзыз айчважвара адыргалтI. АлачIвара йалан КЧР Ажвлара палата апредседатель МОЛДОВАНОВА Вера, Ажвлара палата йалу аепископ КУРГИНЯН Гарик, асабиква рхвитнагIаква рхчарала, арыпхьарали наукали КЧР а-Министерства ахъвшара аунашвачпагIв ГЕРБЕКОВА Джульетта, «Деловая Россия» партия КЧР-ла ахъвшара апредседатель, КЧР Ажвлара палата апредседатель лзаместитель ГВАНА Игорь, ажвлара организацияква ргIащтийыгIвчва, апхьахьаква. АлачIвара апны йгIачважваз зымгIвагьи Абашта айсра Ду агIан афашистква амамыр бзазагIвчва рахьыла жьыхьыдарата йгIадырбуз йаквгIашIастI. – Щарда мцIуата Черкесск город агIархвитхра амш йазынархаз ауысква рагIан афашистква швыррата йгIадырбаз ужвыгьи зны йауацIыхта хIаквчважватI. Акоммунистква, аджьутква, ацгьанква гвыпта йазырццунта йхъырщгIун, агаз камераква гIадрысабапуан. АуагIа рыцхIагIа щарда рыла йыцIстI. ЙгIадзынгылуа абанпараква ауи йапшу агIаншараква, атурых шахIатква йрыхаргIвазара магIны амапI. Адунейла аджьутква йрыуата афашистква цмильуанкI хъырщгIатI, хIкъраль йауата уагIата хмильуанкI алагерьква йыртапсытI, – йгIаликIгIатI Кургинян Гарик. Лагъь-КIавкIаз Федеральна университет адоцент КРУГОВ Алексей холокост арыцхIагIа агIвычIвгIвара зарарта йрызгIанагыз шгIапхьадзауачву даквгIашIастI. – Сара Къарча-Черкес Республика саъамищтара сквшы 20 цIитI. Йсгвапата йгIалскIгIитI ашIыпIа пшдзаква йрыццауата апсахра бзиквагьи зынла уыла йшгIащтIнахуа. Черкесск городла ухъызхуа атыдзква датшагьи уыхвара щарда гIалагылтI. Къарча-Черкес Республика Ажвлара палата йалу йгIащтIырхыз ауыс ахъазла швабыжта сырзыразпI. Холокост – агIвычIвгIвара зымгIва рыхъазла йымйыхуа хвыртапI. Россияла ауи арыцхIагIа ацIыхъватшараква рхъмаштылра йазынарху амчыбыжь акIвшатI. Йапшым арыпхьара къвырльыкъвхартаква рпны чкIвыныргIа алекцияква рзадыргалтI, айсра музейква рэкспонатква йрыхадыргIвазатI. Ауи йапшу амальква анацизм, ауагIахъа алыхра йырпшIагылитI, ашIаква аинтернационализм йаквгIазшIнатитI. Анамыцаква аджьутква рыжвла гIанымхауата йыквырчIвакьра ртахъын, анахьанат ауагIахъаквагьи рейх акъагIара йазынхуш чIгIвынта йдырбзазушын. Совет Союз ауагIахъаква зымгIва рапшта КъарчаЧеркес абзазагIвчвагьи афашистква йырпшIагылата йайсуан, АйгIайра ду гIадраргвануан. Сара историяла сарыпхьагIвпI йгьи холокост йазынарху агIвыраква, ашвъаква апхьарта программа йалазлара атахъыта йспхьадзитI. Агаз машинаква 37-гIв наржьылуанта 7 дакъикъакI анахъыцIра зпсы дыргIваз машакI йтарпсахуан. Ауи йапшу арыцхIагIа абанпарата йгIадзынгыллакIгьи амаль амамкIва рхъмаштылра йгIалахара атахъыпI, – йхIватI Кругов Алексей. АкъральгIвчва рсоциальна хчарала «ЭвенЭзер» гвчIагIвра Фонд агIащтийыгIв ДРЕВИНСКИЙ Владимиргьи афашизм ажьыхьыдара даквгIашIастI. – УахьчIва йгIахIрахаз ауыс уаквчважвагIвацарнысгьи швабыжта йхIатлапI. АгIвычIвгIвара зынгьи йгьырхъаштылуашым Абашта айсра Ду агIан Бесленей абзазагIвчва хъацIарата йгIадырбаз. Ауи йазынархата йахъырхыз «Бесленей – право на жизнь» фильм йапшыз заджвгьи гвалымста дгьгIаннамыжьтI. Абесленейква зынцIраква рхчаз, Ленинград йгIатыргата хIхакв йгIадзынгылыз йрыуата щардагIвы йызнымкIва срынйатI. Къарча-Черкесла схъатала коммунистызтынгьи, джьут сабийызтынгьи зунагIваква рпны йкъазчIвахыз тгIачвата ужвыгьи 15 гIасрыбергьыльтI. Ауат йрапшу хIхаквлагIвчва заджвгьи йазадйымцалуата дарадара йгIадырбаз апатриотизм угвы амрыпшкакIва амаль гьамам. Черкесск йбзазуз НовиковргIа ртгIачва, ажва ахъазла, Днепропетровск йауаз аджьутква рунагIва апны йкъарчIвахын, афашистква йырчвырхчатI. Старая Джегута, Каменномост кытква рпынгьи джьут сабита йрыдыркIылыз гьмачIым. Сара йшазызбауала, ауи йапшу агIаншараква зну азкIкIра гIацIщтра атахъыпI, – йгIаликIгIатI ажвлара уыснкъвгагIв. «Горное эхо холокоста» книга згIвыз аистория наукаква ркандидат ХАТУЕВ Рашидгьи ауи апш рыцхIагIа зынгьи йнымшахра ахъазла чкIвыныргIа урыдынхалрала амальква дрыквгIашIастI. – ХIкъраль атурых апны рыцIа йхьанту абгъьыцква йрыуапI холокост ацIыхъватшараква. ХIара йагIвсыз гьхIзыпсахуашым, ауаса рыцхIагIата йгIанагыз хIхъмаштылра йалазлуштI. Анацистква йырмагIныз йгIадзынгылуа абгата йрылархIвара ахъазла уахьчIва йапшу айчважвараква акIвыршалара атахъыпI,– йхIватI «День Республики» газет аредактор хъада Кратов Евгений. Анйара йалаз йхIыщтагIайуа асабиква йагIвсыз хвы аквырцIауата, гвчIагIвра рылата йбжьара хIборч хъадаква йшрыуу ужвыгьи зны йаквгIашIастI.