ФИНАЛГА ШЫККАНЛАР БЕЛГИЛЕНГЕНЛЕР

Керуьв-Кавказ федераллык округынынъ элшилери уьшин «Россиядынъ етекшилери» конкурсынынъ регионлы к ярым финалы Пятигорск каласында 2020 йылдынъ 1-2 февралинде озды. Озгарылган сынавлардынъ тамамында конкурстынъ финалына Карашай-Шеркеш юртынынъ бир элшиси - «Савлайроссиялык миллетлер ара яс-явка союзы» савлайроссиялык ямагатшылык козгалысынынъ председателининъ орынбасары Ахмат Аппаков шыккан. Ахмат Аппаков - округлык ярым финалда Караш ай-Ш еркеш ю ртыннан катнаскан элшилерининъ бириси болады. Конкурстынъ катнасувшылары эки куьннинъ бойында туьрли кыйынлык дережели басшылав кейслерин шешуьв мен каьрлегенлер. Куллыктынъ тамамлары бойынша катнасувшылардынъ аьр бириси де арбатын да оьз-оьзин таралтувдынъ планын туьзбеге ярдам этеек персоналлык ой-коьрсетуьвлер алган. КЧР Басшысы Рашид Темрезов ярым финалшылардынъ конкурслык программасынынъ баьри шакларын да етимисли оьтуьви мен, а Ахмат Аппаковты конкурстынъ финалына шыгувы ман кутлады. «Конкурслык сайлавдынъ тамамлары бойынша бизим ердесимиз - Ахмат Аппаков финалга шыккан. Бизим ясларымыздынъ аьр кайсысы да - коьплеген болымлыклары, командада ислевдинъ сулыбы болган оьз исининъ етимисли кеспишиси. Ама энъ маьнелиси, олардынъ баьриси де - яваплы аьдемлер. Тек оьзи, оьз иси уьшин тувыл, а оьз Эли уьшин де! Ярым финалшылардынъ баьрисин де кутлайман, а Ахмат Аппаковка ак юректен енъуьвди йорайман!», - деп Рашид Темрезов, Instagrram социаллык сетиндеги оьз официаллы аккаунтында белгилеген. «Россиядынъ етекшилери» басшылавшы куллыкшылар конкурсынынъ суперфиналы Сочиде язлыкта озаяк. СКФО-да ярым финалдынъ тамамлары бойынша конкурстынъ катнасувшыларына каратылган соьзлери мен «Россия - амаллар кыралы» АНО бас директорынынъ орынбасары Александр Садовский эм РФ Федераллык Йыйынынынъ Оькиметлик Думасынынъ депутаты, «Россиядынъ етекшилери» конкурсынынъ тергев советининъ агзасы Светлана Журова соьйледилер. Конкурсантларды кутлай келип, данъклы спортшы аьле ярым финалда катнасув оьз кебиндеги маьнели яшавлык енъуьв болатаганын белгиледи. «Аьле соьле етисилмеген болса да, сиз тагы да бир кере сынап караягынъызга, мен сенимлимен. Эм энъ маьнелиси, мунадай узаклыкты оьте келип, сиз билинъиз, уьйкен йигит эм шынты кеспиши боласынъыз. Суьйткенде, акыйкатлайына соралаяксынъыз эм оьз кыралынъызга эм регионынъызга кереклисинъиз», - деп Светлана Журова, сагынувларын билдирди. Сондай болып, «Россия - амаллар кыралы» АНО бас директорынынъ орынбасары Александр Садовский социаллык баславларды таралтувда оьзлерининъ етекшилик болымлыкларын белсинли кулланмага ярым финалдынъ катнасувшыларын шакырды. «Баскаларга ярдам этуьв уьшин сизинъ аьр кайсынъыз да, аьле соьле, етерше куьшли. Социаллык проектлердинъ темасынынъ конкурстан оьзекли йиптей болып оьтуьви босына тувыл. Мага белгили болганынша, коьплеринъизде басланган сондай проектлер бар, оьз кишкей элинъизди тагы да ийги этуьв уьшин оларды сиз бардырарсынъыз, деп сенемен», - деп Александр Садовский соьзин тамамлады. СКФО-да ярым финалда Ставрополь крайыннан, Дагестан, Кабарты-Балкар, Керуьв Осетия-Алания, Карашай-Шеркеш, Шешен эм Ингуш республикаларыннан 263 аьдем катнасты. Конкурстынъ финалына СКФО-дан, савлайына, 30 катнасувшы шыккан.