АУАГIАХЪА РШIЫЙАРА ЙАХАДЫРГIВАЗАТI

Австрия апны КъарчаЧеркес Республика амшква акIвшатI. Ауи «Интернационально-творческое общество молодежи» жвлара организация ргIаджвыквцIарала йадыргалтI. Вена йаныргIалу наукали культурали ароссия Квта апны ауагIахъа напIлачпараква ргIарбари аконцерти апшыгIвчва зымгIвагьи йрымаджьащахъвата йакIвшатI. ХIреспублика ащтийыгIвчва друнашвачпагIвын культурала КЧР аминистр БАРОКЪВА Рамазан. АршIыйагIвчва гвапата дгIарпылтI Вена йаныргIалу наукали культурали ароссия Квта аунашвачпагIв ЗАЙЦЕВ Юрий. Барокъва Рамазан йшихIвазла, ршIыйарала апроектква абзазара йалажьра магIын ду рымапI, ауат ауагIахъаква йапшым анархараквала ращтаныкъвара дрыбагъьитI. Къарча-Черкес Республика акъральыгIва ансамбль «Эльбрус», ашвахIвагIвчва Байрамыкъва Аида, Китаева ФатIима, Хорольская Агата ргIахъвмарра йапшыз Австрия йбзазауа Россия акъральгIвчва, астудентква, аршIыйагIвчва рыуа заджвгьи гвалымста дгьгIанымхатI. Йджьащахъваз аконцерт амщтахь хIреспублика ауагIахъаква рфольклор фашаква ргIарбарагьи адыргалтI. Амузыка йацIата ауат зшвыта асцена йгIаквлыз ахIвсса напIасра дула йнардастI. АуагIахъа напIлачпараква, ацIгIвыпIа, аджьаргьан йгIарылху абльынкIыдцIаква, хьырахъвала йтадзаху апхъанчIви пхIвыспа хъылпаква, ачеканка, амузыка ъамапсымаква, анышв цIыквква аргваныта йрыдгылуамца йырпшыз зымгIвагьи лахIвара пшдза гIарыланацIатI. Къарча-Черкес Республика ащтийыгIвчва йрылан РАНХ и ГС ЛагъьКIавкIаз институт ахъвшара адиректор ТЛЬЫС Азамат йшгIаликIгIазла, акультура проектква абзазара йалажьра йацхърагIаз зымгIвагьи уыс ду дырхъйатI. – Австрия апны Къарча-Черкес Республика амшква ъадзакIвшуз азаман ауацIала хIартистква рыршIыйара абгата йгIахъыртIытI. Ауи тшахазыргIвазаз аинвесторква, абизнесменква хIшIыпIаква рахьыла разыгIальаматра йалахIата йспхьадзитI, – йхIватI Тльыс Азамат. Вена йаныргIалу наукали культурали ароссия Квта аунашвачпагIв Зайцев Юрий хIреспублика йтыцIыз агвып рпрограмма швабыжта йгвапхатI. – Австрия сынхауищтара Къарча-Черкес артистква йгIадырбаз апш ухъызхуа концерт джьащахъва зынгьи йыгьсымбатI. Аделегация йалугьи ареспублика аунашвачпагIвчвагьи разыра ажва рзынасырхитI, хIапхъахьылагьи адахIвраква швзыстахъпI, – йгIаликIгIатI Зайцев Юрий. – Сара Москва сгIатыцIта Вена сбзазауищтара сквш 25 цIитI. УахьчIва йакIвшаз ауыс зджьара йгIанымхауата йсгвапхатI, снашх гIащтIнахтI, щардала йсхъмаштылхуаш лахIвара щарда гIасыланацIатI. Ужвыгьи зны швангIайуаш сазпшуаштI, – лхIватI Мохар Татьяна. Ауи йгIалыцылкIтI австрийка Либервит Даниэллагьи. – Сара санстудентыз Россия ауагIахъаква йырпщылу архъвыхраква акIвсыршалун, ауаса КIавкIаз ауагIахъаква ркультура уахьчIва апшта аргваныта зынгьи сгьахагIвазамызтI. Зынгьи йсхъмаштылхуаш лахIварала сзырчвыз агIахIвыща ласква, агIарбара джьащахъва схаквлагIвчва зымгIвагьи тшрыхадыргIвазарныс швабыжта йстахъыпI. ХIапхъахьылагьи акультура ащтаныкъвараква тшауацIдрыхра магIын ду амапI, – лхIватI Даниэлла. Къарча-Черкес Республика йтыцIыз агвып йапшым ауагIахъаква, акъральква рмамыр ащтаныкъвара арыбагъьара йаларцIаз ахац щтадъа йшымдзуаш акультура программа йалаз зымгIвагьи аквшахIатхатI.