АГВЫРГЪЬАХЪВКВА РАГIАН АШВАРАГIВАРАДАРА ДРЫМЧИТI

КЧР а-Хъада ТЕМРЕЗОВ Рашид май агвыргъьахъвква йрыдахIвуата атерроризм йапшIагылуа акомиссия, а-Оперативна штаб йгьи а-Координационна айззара ралачIвара акIвйыршатI, ауи Къарча-Черкес апны ахабзанкъвгара адгалра йазынархан. АлачIвара йалан КЧР а-Хъада йгьи а-Правительства р-Администрация аунашвачпагIв УАЗ Мурат, КЧР а-Правительства а-Председатель УАЗ Аслан, ареспублика агородкви арайонкви рхъадаква, ашта йгьи афедеральна хабзахчара органква рунашвачпагIвчва. Темрезов Рашид щарда мцIуата Махачкала город йакIвшаз АшварагIварадара Совет алачIвара апны Россия ашварагIварадара Совет асекретарь ПАТРУШЕВ Николай йгIайхIваз даквгIашIастI. Ауаъа йшгIалыркIгIазла, асквш 2018 апрель агIан Черкесск йакIвшаз АшварагIварадара Совет алачIвара апны йнарахвыз ащаквыргылраква дырхъйауата экстремиз нархара зму ачвгьахараква агIпроценткIла йрылдзгIатI, терроризм нархара зму – хынла. ХIреспублика а-Хъада йшгIаликIгIазла, АшварагIварадара Совет апны аштаквала атерроризм йапшIагылуа акомиссия анхараква аднакIылра шатахъу йаквгIашIастI, атерроризм идеология мчыта йгIашIакIра, ашIаква апатриотра рыладыркIра датшагьи йырзынарху ащаквыргылраква нарахвтI. АлачIвара апны май агвыргъьахъвква, ауагIа ъащардагIвхауа амыз ауацIала йадыргалуаш ажвлара-политика айззараква тынчта йакIвшара ахъазла амальква йрылархIара шатахъу гIархIватI. КЧР ауацIа уысквала аминистр йзаместитель ШАЙ Ануар йгIачважвара апны йшгIайхIвазла, май агвыргъьахъвква, акъарча уагIахъа ргIащаквыргылхра амш, АйгIайра Ду йахъыцIуа асквш 74 ртлапIара ршварагIварадара адыргалуата ахабзахчара органква амальква нарахвтI. Май а 1 угIалагата а 9-дза хIреспублика ауацIала 300-гIв райхIа злу гвыргъьахъвта, айззарата 60 айхIа адыргалуаштI, «Бессмертный полк» йгIалалуа зкьпхьадзара йнадзуштI. Йшалу агвыргъьахъвква зкьы 150-гIвы рылазлуштI. Ауат ршварагIварадара ауацIа уысквала аорганква йрынхагIвыта зкьгIвы раъара, «Росгвардия» йакъвырльыкъвхагIвчвата швкIгIвы райхIа йадыргалуаштI. Агвыргъьахъвква тынчта йакIвшара ахъазла ауагIа дружинаква, ахъатачIв хчара организацияква ркъаругьи гIадрысабапуаштI. Россия МЧС КЧР-ла аунашвахъцIарта Хъада аунашвачпагIв ШАРКОВ Сергей йгIачважвара апны агвыргъьахъвква рагIан мцаблыра, датша пхаста нымшара ахъазла амальта йнарахвуа алачIвара йалаз ахайыргIвазатI.