Къарча-Черкес Республика а-Хъада ТЕМРЕЗОВ Рашид Уарп район апны адзыр азарар зквшваз акытква рбзазагIвчва дрынйатI. Къзыл-Уарп апны аква щарда йгIалцIла адгьылцIахь дзква тшгIащтIырхтI, ащхъаква рпны ахIвынчIвы гIабгъалитI. Темрезов Рашид КЧР а-Правительства а-Председатель Къардан Мурат, капитальна уыхварала КЧР а-Дирекция аунашвачпагIв Кябишев Индрис, Уарп район администрация ахъада Шутов Алексей, КЧР-ла МЧС а-Унашвачпарта знапIыцIу Чехов КIазбек, Уарп йгьи Зеленчук районла аполиция хъвшара аунашвачпагIв Боташев Анзор, агидротехник-ъачIвагIагIвчва йыцта абыхъвква ргьагьара дапшытI, ауагIа йырхIвауа даздзыргIвытI. Ареспублика а-Хъада йширыбагъьазла, тшгIащтIызхыз адгьылцIахь дзква ауагIа йшрымзарархуш апшта анхараква акIвдыршуштI. ХIреспублика а-Хъада агвжважвагIва аъащаквала ареспублика комиссия алачIвара акIвйыршатI. Ауи Къзыл-Уарп кыт абзазагIвчва ахIвынчIвы гIарыцIамылра ахъазла амаль амамкIва йчпачIву анхараквала ахъвдаквцIараква йчпатI. Ауи акIвымкIвагьи, мшигIадза ауаъа йщаквгылу аъаща дырхъвыхырныс йрыхъвдаквицIатI. Темрезов Рашид Къзыл–Уарп адзцагаква Преградна станица йалсуа йапырщылта акыт дзыла йадыргалра шатахъу гIаликIгIатI. Ауи ауысла анхараква хIызту асквш йалдыргара атахъыпI. СынчIва июнь а 25–26 Уарп район йгIарыцIалыз адзыр ахъатачIв тыдзква, адзыгIвтшпы рыбагъьартаква, ацхIаква йрызарархатI. КЧР а-Хъада йунашвала адзыр ацIыхъватшараква рыдзхрала штаб гIандыршатI, ауи йазынхитI йапшым акъвырльыкъвхартаква йыръачIвагIагIвчвата 200-гIв, техниката 30 гIадрысабапитI. Уарп район администрация ахъада Шутов Алексей йшихIвазла, асанитар-эпидемиология аъащагьи йахъпшылитI. Арайон аунашвачпагIв амгIваква дрыцкьара йгьи йгIащаквдыргылхра ахъазла ужвыгьи техника рзалырхырныс хIреспублика а-Хъада тшизынайырхатI. Темрезов Рашид йакIвйыршаз алачIвара апны Уарп район асоциальнаэкономика уысквагьи йрылачважватI. Предыдущая новость 1040 просмотров Следующая новость Читайте также ЧВАХЪАБАГА ХIАХЪВ ЩТIАРЦIАТI 12.11.2018 525 ЧКIВЫНЫРГIА РСОВЕТ ГIАДЫРШIЫЦХТI 09.04.2021 145 Получайте свежие новости на электронную почту Подписаться Комментарии Написать
Комментарии