АДГЬЫЛРХАРДЖЬЫГIВЧВА «АРХЪА АМШ» РЗАДЫРГАЛТI

Ленинград область, Пушкин город апны июль а 10 йгIашIарышвта Россия адгьылрхарджьыгIвчва адызкIылыз «Всероссийский день поля» кытмлыкврхIара гIарбара акIвшатI. Ауи агIахътIра йалан акыт млыкврхIарала Россия Федерация аминистр ПАТРУШЕВ Дмитрий, Ленинград область агубернатор ДРОЗДЕНКО Александр. Ари агIарбара апны ауыжвгIанчIви техника шIыц тшахадыргIвазарныс алшараква щардапI, гIвымшкI руацIа ацынхарала ангIалраква мачвы рыцIарцIатI. АгIарбара йалан хIышта йтыцIыз адгьылрхарджьра нхартаква рунашвачпагIвчва, аъачIвагIагIвчва. Агвып друнашвахъцIагIвын акыт млыкврхIарала КЧР аминистр БОТАШЕВ Анзор. Йапшым аплощадкIаква рпны акыт млыкврхIара гIайыраква рзигIва шIыцква, адгьыл адынхалрала ауыжвгIанчIви технологияква датшагьи щарда асасчва йддырбатI. Ауаъа йгIадыргалыз атехника 800 йрыуата 70 шынхауа архъаква рпны йгIадырбатI. Аштаква йгIартыцIыз аъачIвагIагIвчва швабыжта йрымаджьащахъвахатI Петербург трактор завод апны згIацIщтра джвыквырцIаз «Кировец К-7» трактор шIыц. Ари айззара йалаз Россия Федерацияла асквш 2019 агIан агIапын архъа нхараква рцIыхъвагIарбараква йгьи атшыгIвра ацIагахра шакIвшауа йрыквчважватI. АдгьылрхарджьыгIвчва ашIыцраква ъардыруа йгьи ршвапха ъамырдауа «Всероссийский день поля» гIарбара цIасхатI. ЦIыпх ауи Липецк область йакIвшатI, ауи акыт млыкврхIара йапщылу 3000-гIв алан.