АДЕПУТАТКВА АНАЛЫРХУАШ ЩАКВДЫРГЫЛТI

КЧР АуагIа Айззара (а-Парламент) а-Председатель ИВАНОВ Александр йакIвйыршаз й-55-хауа асессия далан хIреспублика а-Хъада ТЕМРЕЗОВ Рашид. Адепутатква жвуыскI йрылапштI. СынчIва май а 31 КЧР апны агIвычIвгIвыс йхвитнагIаквала а-Уполномоченна йхъвдаквцIараква зырхъйуз йынхара пIатла тыцIтI. Ауи ахIатырла Уполномоченната йынхуз аъанатIа дакъвыцIтI. Асквш 2003, октябрь а 15 йдрыбагъьаз «КъарчаЧеркес Республика апны агIвычIвгIвыс йхвитнагIаквала а-Уполномоченна йуысла» КЧР а-Хабза апкъ йтата адепутатква ауи аъанатIа зквнадыргушла Темрезов Рашид йгIайгыз ажванахъа йалапштI – Уполномоченната йынхаз Умалатова Зарема. РФ апны агIвычIвгIвыс йхвитнагIаквала а-Уполномоченна Москалькова Татьяна ауи лкандидатура йацылкIтI. А-Парламент а-Председатель Иванов Александр адепутатква йшгIарылайхIвазла, КЧР апны агIвычIвгIвыс йхвитнагIаквала а-Уполномоченна лынхара хвду аквырцIатI. Умалатова Зарема РФ апны агIвычIвгIвыс йхвитнагIаквала а-Уполномоченна й-ЧIахIра грамота гIалквнадыргатI, РФ а-Генеральна прокурор й-Унашвала «За верность закону» гвплацIа йапхъахауа астепеньла дгIалыркIгIатI. Адепутатква йацшIакIта Умалатова Зарема лкандидатура йацыркIтI, ауи хвысквшала а-Уполномоченна йхъвдаквцIараква лырхъйуштI. ЙащтагIайуата адепутатква КЧР АуагIа Айззара (а-Парламент) йцбахауа азддара йалазлуш асквш 2019, сентябрь а 8 йалырхуашта щаквыргылра нарахвтI. Асквш 2002, июнь а 12 йнарахвыз «Об основных гарантиях избирательных прав и права на участие в референдуме граждан Российской Федерации» Федеральна хабза й-10-хауа астатья апкъ йтата, анапIщтIыхра мшы 100 йайцIамкIва йшатахъыркIву йгьи мыш 90 йахънадмырхIвауата алхраква шакIвшушла ащаквыргылра зтшын йнарахвыз амщтахь хвымшкI руацIала ажвлара хабарргагаква рпны ауи ауысла хабар дыргитI. Адепутатква «О республиканском бюджете Карачаево-Черкесской Республики на 2019 год и на плановый период 2020 и 2021 годов» КЧР а-Хабза йаларцIуш апсахраква дрыбагъьатI, ахабзапроект афинансквала КЧР а-Министерства йарыхIазыртI. Араса асквш 2019 агIан йхъындмырхIвыхуата абюджет йгIалалуа ахча сом зыкь 196764,3-ла йгIалахIатI. Ахча гIауызщтуа йрыуапI ЖКХ апны апсахраквала а-Фонд, ауат йшварагIвару агIвнабзазарта йыгIвну хъацIакIыртала йадгалра йазынадырхуштI. ЙгIалахIаз ахчагьи алата, асквш 2019 ареспублика бюджет ахъахIара сом зыкь 25331055,7 йнадзитI. Ауи йгIалцIла КЧР аминистерстваквакI ракврыдзраквагьи йрылахIатI. ЙгIауахвырквын, згIвадарахчарала КЧР а-Министерства йазалырхыз ахча ззынадырхуш йрыуапI ЭрсакIон ахIабльа чымазагIвтара анашылырта капитальна рчIаджьра арадзара. Адепутат Дзыуа Зауыр асквш 2019, апрель а 29 йчпаз атшазынархара амщтахь ауи апш щаквыргылра нарахвтI. АуагIахъа уысквала, ажвлара коммуникацияквала йгьи печатьла КЧР а-Министерства йырзаладырхIаз ахчаква Къарча-Черкес апны социальна магIны зму акъральыгIва программаква шдырхъйауа ателерадиуакомпанияква рпны йгIарбара йазынадырхуштI. Промышленностьли хвгIахвтрали КЧР а-Министерства йгIадзаз ахча Къарча-Черкес ашта апны айхамгIва транспортла ауагIа ратрыпарала ахвква йырпщылата йгIаншауа алдзгIараква ргIащаквыргылхра, нархара щарда зму аквтаква (МФЦ) ртшауацIыхра датшагьи йырзалырхуаштI. Акыт млыкврхIарала КЧР а-Министерствагьи йырзалырхыз ахча йаладырхIатI, ауат афермерква, ахIаракьатчпагIвчва йрыцкIрала, акытмлыкврхIара кооперация тшауацIнарыхрала ареспублика программаква рырхъйара ахъазла йгIадрысабапуаштI, йара ауаса РФ а-Правительства асквш 2019, февраль а 28 йнанауахвыз ащаквыргылра апкъ йтата агропромышленна комплекс апны аинвестиция кредитква йырхъыртигIауа ахъвыкI хъыргIвахуаштI. ЙгIазлахIаз абюджет ахчаква ззалырхыз йрыуапI уыхварала йгьи ЖКХ-ла КЧР а-Министерствагьи. Ауат ахчаква амгIваква рырчIаджьра, акапитальна уыхвара абюджет инвестицияква алажьра, адзцагаква ргIаршIыцхра датшагьи йырзынадырхуштI. Нхарали социальна тшауацIыхрали КЧР а-Министерства йгIарадзаз ахчаква йапхъахауа асаби дзауыз мзигIадза йрыртуа ахча, фатар щардала йалу атыдзква ркапитальна рчIаджьра атичIвыла льгот зму компенсация рзычпара рыхъазла йгIадрысабапуаштI. Адепутатква «КъарчаЧеркес Республика амгIва Фонд ауысла» КЧР а-Хабза апсахраква аларцIатI. Ауат рыпкъ йтата амгIва шварагIварадарала РФ а-Хабза мыгIвхъызгауа йддыршвауа акъвады ареспублика амгIва Фонд йаларжьуаштI. Йара ауаса «КъарчаЧеркес Республика апны адгьыл азазаъащаква аныргIалрала алкIгIараква» республика Хабза апсахраква аларцIатI. Ауат ззынарху акъральыгIва йгьи амуниципальна органква йырхъатачIвыру адгьылла рахвырхIара змураду радгьыл йалархIара акIвпI: 0,3 гектар угIалагата 3,0 гектардза. УахьчIвала йырзалырхуа 0,3 гектар йгIашIарышвта гектаркI йгьахънахIвум.