Мындан алда Къарачай-Черкес Республиканы Башчысы Темрезланы Рашид, Совет Союзну халкъ артисти Василий Лановой бла тюбешгенди.
Василий Лановой Къарачай-Черкесиягъа «Спасибо за верность, потомки!» деген джамагъат-патриот акцияны тамадасы болуб эмда «Бессмертный полк России» деген джамагъат къозгъалыуну сопредседатели къуллукъну толтура келгенди. Ол бизде Уллу Ата джурт къазауат темагъа моноспекталь да этгенди.
Тюбешиуню кёзюуюнде Василий Семёнович аны джашауунда аскер тема кёб орун нек алгъаныны, аны юсюнден джаш адамла бла кёб нек сёлеширге керек болгъаныны юсюнден айтханды.
КъЧР-ни Башчысы Темрез улу айтхандан, аны спектакллери, кинолада роллары терен магъаналыдыла. Ала Ата джуртха сюймекликден толубдула. Ол себебден, аны бла ушакъ этгенни, аны чыгъармачылыгъына къарагъанны магъанасы уллуду. Адамны джюреги учунады.
Темрезланы Рашид Василий Семёновичге бизге келгени, роллары, джамагъат-патриот ишлери ючюн, республиканы бютеу джамагъатыны атындан разылыгъын билдиргенди. Анга разы болуб, «Къарачай-Черкес Республиканы махтаулу артисти» деб, сыйлы ат атагъанды.
«Сизни творчествогъузгъа биз берген сыйны бу бир кесегиди. Сиз бизни мындан ары да актёр ишлеригиз бла кёб заманны къууандыргъанлай турлукъсуз, ала «Офицеры» деген белгили кинода сизни ролюгъуздан энгишге тюлдюле», - дегенди Темрезланы Рашид.
Комментарии