ДГIАПСАЗТЫНГЬИ ЙГIАЛХIВАХТI

ЙамгIан заманызлакIгьи хвгIвысабичва ргIадзныргылра гьмайрамызтI, йырфушла, йыршвырцIушла йнауырхъарыгьи рбжьара, шви пхи рыквта ргIадзныргылра къару бзидздза атахъыпI. Хъапщыладъа йгIанхаз апхIвыс лыхъазла ауи рыцIагьи йшбаргву, гIапсара ду шапщылу гIазгвнымгIвуа дгьаъам, ауаса, йшырхIвауа апшта, АлахI йгIауыквицIарквын, укъару йгIанамгуаш гьаъам. Зылахь Хъвыжвду йтанагаз акъазма пхIвыспа КЪВАПСЫРГЬАН Айщат пщгIвыпхIчва лымата йхвыгIвхауагьи мгва дтата сквш 32 айхIа йыртамыз лхъапщыла ШВОХВЫЖЬ МухIадин амотоцикл даквчIвата дызлашваз апхаста дгьгIацымхатI. Сквш 29 дыртата зхъапщыла дызхъыдзгIаз апхIвыс шIа зныкI ахъазла дгвжвайызтынгьи лгвы лрыбагъьан, асабиква шлагIзуш ахIа дуней лымамкIва анхара тшалттI. Ауи азаман йызкъагIамтаз акыт амлыкврхIарта апны йухуш щардан, асандрыйа рашвара, ажвхьара акIвызтынгьи датшагьи. Айщат амлыкврхIарта ъадзащаквгылаз алых лымчпауата дынхатI. – Санхъва лакIвмызтын, лахрат пшдзахатI, асабиква сыгIзарныс, рщапIы йхвынсыргылырныс гьсылымшушызтI, – йгIалгвалашвахитI Айщат. – Ауи сан лапшта йлызхъасцIун, сгвы бжамкIва щымта сгварцIуанта хъвлапныдза сынхун, ссабиква шымламщиуаш, йгIвычамкIва ахьта йшыламылуаш, йшыммаджьанхуш здыруан. Асабиква раба пхастала даныдзыз ахIба Льильа йпщбахауа акласс, ауи йлыщтагIайуаз Елена йгIвбахауа акласс йцун, йхыгIвхауа Льольа йгьи йпщыгIвхауа ФатIима апхьарта йгьымцаркIвузтI, айцIба Мадина адуней дгьгIаквмылсызтI. Санхъва ларгьи дынхун, акыт апхьарта йгьи аклуб аллыргун. Ауи дъанхуз асабиквагьи лыцлырцун, ауаъагьи лылапш гьырхъылымхуазтI. Швабыжта сылзыразпI санхъва, щъата дсыцIагылата сгIариква сыцлагIзатI. Айщат ланхъва Татымгьи лбзазара гьмайрамызтI. Ауыгьи лпазаджвыкI МухIадин лхъазыкI длыгIзатI, йщапIы дхвынлыргылтI, дтгIачвата гIальаматта дбзазун. Ужвы сгвы тынчхатI анылхIва лпа ауаса йызнитI. Йырчпушызйа, йрамальызйа анхъви атаци… АгIвыджьгьи ацIагылын МухIадин йгIайтынхаз асабиква рыгIзара тшарттI, ркъару йамайгьдзауата йынхатI. Ауат рахвгьи, квтIугьи, къазгьи дырхIун. – Ахъвыжвквагьи АлахI дырзыразхатI, – лхIвитI Айщат. – Арахв гьхIмачIмызтI, апссгIачIвгьи хIщардан. Ауат йырфушла йанакIвызлакIгьи йгIасцхърагIун, ауи ауысла тшыззынасырхаз схIатыр гIарымбауата зынгьи йыгьгIанымшатI. Ссабиква рщапIы йанхвынгыл даргьи гIасыцIагылтI, арахвырхIара сакъвыцIхтI. Ауи ауаса йылхIвузтIхIва, уахьчIвагьи анхара дгьгIакъвымцIтI, акыт апхьарта аллыргитI. ДгIапса-ддзышыргьи Айщат ан лборч йнардзата йлырхъйатI. Ангьи абагьи змата йгIадзынгылуа асабиквагьи йыззыбжу закI анрымам гIаншитI. Йалныс ауыпI Айщат лгIариквагьи йъадзахвыцыз, йъадзапхьуз закIыла йбжахарнысгьи, ауаса рыцIа йхъаду ауат зынгьи йыгьрыгымхатI – ран лбзибара, лхъагIара, лгвапара, лпшкара – ауатла йанакIвызлакIгьи йкIвыршан. Швохвыжь Айщат лыхIвсса зымгIвагьи йызлабзазуш ъачIвагIа шрымазлуш апшта йалрыпхьатI. Льильа КЧГУ арыпхьагIвта дгIалгатI, Льольагьи ауи аъачIвагIала Невинномысск гуманитар-техника институт апны дапхьатI, ФатIима дпедагог-психологпI, Ставрополь къральыгIва университет апны дапхьатI, ауи амщтахьгьи бжьагIвыта дынхара ахъазла лъачIвагIа дырра РИПКРО апны йалалырхIатI. Елени Мадини медицина ъачIвагIа гIалырхтI, Черкесск амедицина колледж йгIалгатI. ЗымгIвагьи йызпхьаз аъачIвагIаквала йынхитI. АйцIба Мадина «Дервейс» компания амедицина пункт апны дынхитI, ауи лан длыцпI. ФатIима АлбыргIан ЙуанргIа дыртацапI, Черкесск дбзазитI, асабизгIзарта апны дбжьагIвыпI. Арахьарат ахыгIв Красна Восток йтанагатI, Льильа – ПсауынргIа, Елена – ДжьгватанргIа, Льольа – КълычргIа йыртацапI. АхыгIвгьи акыт апхьарта апны йынхитI. УахьчIвала Айщат «мамаду», «нана»-хIва йгIалазхIвуа, тшгIалыкIвзыршауа лыпхIчва ргIариква агIгIвы йнадзитI. – СгIапсазтынгьи йгIасхIвахтI, сыпхIчва йрылахьхаз сазыразпI, зымгIвагьи тынчта йбзазитI, йызланагаз атгIачваква гIальаматпI, – лхIвитI ан. ЙагIвсыз амчыбыжь Швохвыжь Айщат сквш 60 лрыцкьатI. Любилей атшын ауи лунагIва адауыш гьыгIвнымцIтI, лымхIвчва, лыпхIчва, ауат ргIариква, аъахIыльчва, агвлачва ан, анду, апхIвыс гвымчIва йлайхIвахIвырныс йгIайззатI. Айщат лмацIауыщала акыт утыцIтагьи лыхьыз рхIвитI, анадылракви ахатымкви рагIан ахъвшва гIалызхъарцIитI. Ауи атшын лайшва йгIадзхъачIвазгьи ужвыгьи зны дшмацIауыгIв ъазу йаквшахIатхатI. Ан лыхъазла йнасыпу лгIариква ртынчра, рбзазаща пшдза акIвпI. Айщат лгIариквала лгвы бжамкIва, ауат йгIарыцIагылыз асабиквала дкIвыршата ужвыгьи юбилей щарда налдасыргIатI.