СКФО Ингушетии не хватает детских садов СКФО Тепловизионный контроль помогает специалистам «Россети Северный Кавказ» в Карачаево-Черкесии выявлять дефекты оборудования СКФО Во Владикавказе появятся остановки с бесплатным Wi-Fi СКФО В Нальчике газовики отключили газ в двух жилых многоэтажках Актуально Уроженец Карачаево-Черкесии Альберт Огузов выступит на чемпионате Европы по дзюдо

АДЗЫ АХЪА ЗЛАГIАДЖВЫКВЫЛУА АЦIЫХЪВАГЬИ АЛАЦИТI

27.11.2018 266
АДЗЫ АХЪА ЗЛАГIАДЖВЫКВЫЛУА АЦIЫХЪВАГЬИ АЛАЦИТI
АгIвычIвгIвыс йылахь йхъапахь йангIвылата адуней дгIаквылуата рхIвитI. Ага ауаса йаъазтынгьи, йара йхъаталагьи йбзазара ащтацаща анйыргIалра ахъазла йылшауа гьмачIым. Зыщайдзаква Красна Восток кытла йгIаджвыквылуа ГЬАБАН Бориси Людмили Псыжв кыт йгIаталхищтара сквшщарда цIитI. ГIвычIвгIвысагIа ду гIазырбауа, йгIвынгIалу атгIачва йгIазлалыз ахIабльа анцIралагьи йрылата йгIамгIвайсызшва зынла йрылагIващатI, рыхыгIвпачвагьи гIацIастI, йунагIвахатI. АтгIачва рпны акврыт МухIамад йаби йани дрылата дбзазитI. Йхъапщыла Марини йари хвгIвысабичва гIадзындыргылитI. МухIамад апхьарта амщтахь Черкесск автодорожна техникум дгIалган, адгьылква нйырхауа сквшкъомкI дынхатI, уахьчIвала «Аквалайн» фирма дапщылапI. МухIамад йхъапщыла Марина АлбыргIан йауу Хъсал ХIазраъильи ГIайщати рыхыгIвпхIчва драйцIбапI. Марина Черкесск амедицина колледж дгIалгатI. Псыжв йаныргIалу аполиклиника дынхитI. Марини МухIамади рсабиква Радмир – й-11-хауа, Карина – й-9-хауа, Самира – й-6-хауа, Ясмина – й-1-хауа аклассква рпны йапхьитI, Софйа хысквша дыртапI, «Звездочка» сабигIзарта дцитI. Марина лаби лани рунагIва йгIаджвылылгаз ацIаскви ахабзакви дырмайжьауата дбзазитI, лсабиквагьи ахIбара-айцIбара рдыруата йшгIадзынлыргылуаш дащтапI. – ХIаба Хъсал ХIазраъильи хIан ГIайщати сквш 42 цIитI йацбзазауищтара, хгIвыпхIчва хIгIадзындыргылтI. АунагIва уысква, ауатра хIшадынхалуаш, хIшмацIауаш хIанхвыцдзаз йгIашIарышвта хIырзырбжьатI. СгIазланагаз аунагIва апынгьи шви пхи гIвнапI. Схъапщыла йани йаби швабыжта сырзыразпI. Асабиква ргIадзныргылрала цIагылагIвта йхIзалитI, хIакъыль аквхIыршвауа хIбзазитI, – лхIвитI Марина. УахьчIвала апсихологква тгIачва шIыц гIанзыршаз ашIаква заджвгьи дгIарыдымсылуата рхъазы рщапIы йаныквгылуа рыцIа йагъьта рхIвитI. ЦIабыргыракI алазапI ауыгьи. УадыргIванагьи абазаква апхъанчIви заман йгIашIарышвта рсабиква дара ршвапхала йырбжьун. Йаргьи агIвычIвгIвыс йагIауа ацкIыс йбауа рыцIа ласы йылайкIитI. Ауи акIвзапI Гьабан МухIамади Марини рсабиква йщаквкIыта, ахIба йажва хвы азырбауа йызгIадзынгылуа. Ауат раби рани аунагIва йыгIвну агIвахIбачва пIатIута йрыщтанкъвыргауа мшигIадза рыла йыцIапI, швапха пшдзата йырзалитI. Гьабан Бориси Людмили ртгIачва йырзацIырхъийыз апхара зымрычвуаш тацачва ъагIарыднагалыз ахъазла рылахь швабыжта йазыразпI. Ауат рпахIба Артур хыгIвпачва йымапI, айцIба Тимургьи – хгIвыпхIчва. Аби ани зцбзазауа МухIамад йыхвыгIвгьи арахьарат ргIариквагьи апшцIа йанайззара адуней дара йрыдунейпI. АтгIачваква хIанрылачважвауа, акъыльаквшвара ауыс ауатыкв йангIаталра ТхIайцIыхв Бемырза йхабаргIвыра «ХIаджьмурати ауи йыгIвпхIвысчви» злалгауа ажваква йанакIвызлакIгьи сгвы йгIанагхитI: «АхъацIи апхIвыси ачвызрыхъаруш раргван йщтIапIта, йазраргвануаш швабыжта йырчвыхъарапI, насып зму хъара дпшыпI». «Адзы ахъа злагIаджвыквылуа ацIыхъвагьи алацитI» – ахIвитI абаза ажважв. Закъыль аквшвауа йгIабзазаз ГьабанргIа рычкIвыни хъара йпшуа ХъсалргIа ртпхIа Марини рыхвыгIвсабичва йызгIвадата, йгврыхвата, рылахь пшдзата рапхъахьылагьи йгIабзазаргIатI. АтгIачва рпны йщаквгылу анашх ан лхIаль йапщылапI. Марина лунагIва апны акъыльаквшвара шпшвымазлуш зынгьи йгьылхъылраштылуам. 
266 просмотров


Айран - 43%
 
Курорты Карачаево-Черкесии - 40%
 
Вода Карачаево-Черкесии - 12%
 
Горный чай - 4%
 
Сады Карачаево-Черкесии - 1%
 
Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Нас уже 250 тысяч.
Присоединяйтесь