АБАНПАРАКВА РАПХЬАРТА ЙАДНАКIЫЛИТI

ЩардагIвы йыгIдыритI Долматовский Евгений йажваквала Кабалевский Дмитрий йгIанйыршаз «Апхьара сквшква джьащахъвапI!» уарад злалу ажвипхьадза магIын дукI гIаныцIуата, цIолата уархъвыцуата йшаъу. АгIвычIвгIвыс дъагалакIгьи йчкIвынхъа гIагвалашвахра щарда апщылапI. Ауи атлахан йауата апхьара сквшква закIы йапшымкIва лкIгIара пшдза рымапI. Йацапхьакваз анапшIашвара ауырата йызквчважвауа, йгIаргвалашвахлауа апхьарта йъадзацIаз рыла йыцIсыз, рырыпхьагIвчви дари разазаъащаква, апхьарасахIатква рагIан агъвы йкIыдгылата рпынхачIвы шгIархIвуз йа йанхIазырымыз арыпхьагIв «гIвба» ймыргылра ахъазла йгIархъвыцквуз ахIайльараква ракIвпI… Апхьара сквшква швабыжта йджьащахъвапI. Йаргьи ауи акIвзапI ласдзата йцауазшва йзубауа. Йапхъахауа йгьи йцIыхъвахауа ауадгьына ахIвачвара, апхьарта йгIалгаз раттестатква анрыртуа йадыргалуа ахъвлапын джьащахъваква гвалагIваласракI гIауыларцIитI. Ауи агIан учкIвынхъа йгIацампахуашта йшагIвсыз гIаугвынгIвитI, апхъахьыла утшдырра бзазара, упсы бзи йабуш аъачIвагIа гIалухта ауи ушазапхьуш уазхъвыцитI. Азаман агIвситI, ауаса дзачIвызлакIгьи дгIазылгаз апхьарти йарыпхьагIвчви хвы рзибитI, гIвычIвгIвыста дъащаквгылыз ауат рынхара магIын ду шаму йылайхIвитI. Макьар Умар йыхьыз нкъвызгауа АлбыргIан квтанай апхьарта сынчIва йгIалгуз чкIвыныргIа йырзынархаз агвыргъьахъвгьи арат алахIвараквала йырчвын. Ауи йалан Абаза район администрация агIащтийыгIвчва: арыпхьарали культурали а-УнашвахъцIарта аметодист КIарма Лена МагIаруф йпхIа, адгалра уысквала ахъвшара аунашвачпагIв Шай Римма Али йпхIа, АлбыргIан акыт гIаныршара ахъада Меремкъвыль Мурат Али йпа. Апхьарта унашва ахъызцIауа Шай ФатIима Къартуль йпхIа, асасчва Шай Римма, Меремкъвыль Мурат, йапхъахауа акласс апхьагIвчва ари атшын апхьарта йгIалгуз пхата йрайхIвахIвтI. Ауат йырзынархан ауыса чкIвынква, ауарадква, й-3-хауа акласс ахIвсса ргIахIвыща. Агвыргъьахъв дрыпшдзатI атурых фырква Буратино, Мальвина, Незнайка, Чебурашка йгьи абльагIва Гена. АлбыргIан апхьарта апны цIас бзикI щаквгылтI – сквшщарда цIуата ауи йгIалгаз ачкIвынчви ахIвсси гIадрайгвалитI. СынчIвагьи й-11-хауа акласс апхьагIвчва ЙУАН ХIамзат, МЕРЕМКЪВЫЛЬ Айна, ХIАЧКЪЫЗ Льана асквш 1989 АлбыргIан квтанай апхьарта йгIалгакваз йрынйатI. Ауат йрыуата апхьарта ахъазла согIа рымата йгIадгылтI Абаза Юрий, Йуан Римма, Къалмых Рамазан, Къвач МухIамад, КIам Зулифа, Меремкъвыль Мурат, Напщ Муъайад, Уаз Замрат, Пщмахва Люба, Тобыль МухIарби, ХIвадж Хзыр, Шармат Мадина. Агвып рыхьызла йгIачважваз Уаз Замрат рарыпхьагIвчва, апычIв классква рпны йгIвуа, йапхьауа йызбжьаз Быджь Мслимат Мусса йпхIа, уацIыхъван акласс унашва ахъызцIаз Шхай ФатIима Насып йпхIа (лпсата бзихатI) аразыра ажваква рзынайырхатI, апхьарта йгIалгауа рмурад пшдзаква шгIардахIвуашла драйхIвахIвтI. Амакъыми анапIасри ацIата апхьарта сынчIва йгIалгази йгIадрайгваз агвыпи агIагвалашвахраква йырзынархаз апхьара сахIат ацакIвдыршатI. Ауыла агIвабанпаракI ранйара гьалымгатI. Ахъвлапын асахIат ацба уалагата ауат йрызпшуан ахъвмарракви анкъвакъвракви. Й-10-хауа акласс аунашвачпагIв Хамдохова Раиса Рауф йпхIагьи дрыцта йадыргалыз анйара джьащахъва акIвдыршатI Къвач Мхвтари ХIвадж Дамири. Анйара йуарадквала йрыпшдзатI ашвахIвагIв Шармат Гурам. Ари атшын йгIадрайгваз агвып зныкI ахъазла рчкIвынхъа йташвахызшва йырбатI, ргвы пшыхь тастI, йабабатI, тшпсырщатI. Ауат йырзадыргалыз анйара ргвы пхата йгIатахуштI. ЙшIымчIварагIатI арат йрапшу ацIас пшдзаква!