Къарачай-Черкес тарих-культура эмда табигъат музейни-заповедникни сурат галереясында саулай къралгъа белгили суратчы, скульптор Зураб Церетелини кёрмючю ачылгъанды.
Россия Федерацияны халкъ суратчысы, Россияны суратлау академиясыны президенти Зураб Церетели кёрмючге 50 чыгъармасын теджегенди - алада бояула бла этилген суратла, эмалгъа, графикагъа бойсуннган чыгъармала, скульптура да бардыла. Кёрмючге келгенле фахмулу суратчыны портрет композициялары, гокка хансланы суратлагъан натюрмортлары, «Шахарчыла» деген пластика иши, «Пиросмани бла Руссо» деген скульптура чыгъармалары бла шагъырей болгъандыла. Шимал Кавказ федерал округда КъЧР Церетелини кёрмючю ачылгъан экинчи субъектди.
Кёрмюч ачылгъан кюн Зураб Церетели кеси болмагъанды, аны атындан къызы Россия Федерацияны культурасыны махтаулу къуллукъчусу Елена Церетели джыйылгъанлагъа джюрек разылыгъын билдириб сёлешгенди. Къарачай-Черкесия бла мындан ары да атасы байламлылыкъ джюрютюрге таукеллигин да чертгенди.
Кёрмюч июлну 10-на дери турлукъду.
Комментарии