ЗУАГIАХЪА ЗМЫРПУДУА ТКЪВЫМПI

Кытла хIауапI хIткъвым Гвым, ХIтдзыхьызгьи пшдзапI – ГIапргIа, ХIрылапсапI абаза кытква зымгIвагьи, ЙыгьхIырпудуам хIткъвымхьыз зджьарагьи. ХIтдзыхьызгьи шбзийу хабарта йшвырга – Гвымхара згвалу агIап дарга, Бзира згвы йтугьи – абзира йырба, Йбзазара пшдзата, гIапныта йырга. ЙгьизыхIтахъым заджвгьи йамуа данйарныс, ЙырзыхIтахъпI рбзазара гIапныта йцарныс, ХIгIазлыцIыз, хIпсы йапшу, абаза уагIа, ХIшвызхIвахIвитI хIашIамсуа хIара, ГIапргIа! УагIахъипхьадза, ткъвымипхьадза, тгIачвипхьадза, гIвычIвгIвысипхьадза турыхкI зпщылам дгьаъамзапI. УахьчIва зхабар швасхIвуаш Красна Восток йауу ГIапргIа рткъвым хъацIаралагьи, бзазащалагьи акыт зрыпшдзаз, ахьыз пшдзата йзыргаз, ужвыгьи йзыргауа уагIапI. Асквш 1877 агIан йгIалагаз аурышв-трыкв айсра апны Россия архъвква йрылалта агъа йпшIагылыз, Гвым йтыцIыз атшчва 25-гIв дрылан акорнет ГIап УогIвырльы. Асквш 1904 агIан йакIвшаз аурышв-япон айсра апынгьи аяпонецква йырпшIагылныс йгIандыршаз КIавкIаз атшыгIвчва рполк йалан 32-гIв йнадзуз, акорнет ГIап УогIвырльы дызлаз агвып. Абашта айсра Ду ГIапргIа йрыуата 14-гIв алан, 7-гIвы аладзтI: Асльамбакь, ДжьагIафар, Качуна, Льильу, Маджьид, Тосльамби, Добльа. Йапшым артшхъвагаквала йхърыста йгIахъынхIвыхыз Данил, Кьащиф, Муридин, Щарадин, лейтенант чын змаз Заудин, Исльам, ЗимлахI аколхозква ргIащаквыргылхра къалата йазгылтI, тгIачва пшдза гIандыршатI, асабиква рпатриот бжьара йапщылан, хвы амата рынцIрахъвы нардастI. Акыт апны турыхгIвоута, уасаражв гвыбзыгъата дырпхьадзун сквшщарда зкытлагIвчва рсабиква историяла йазрыпхьаз ГIап Музали ШахIым йпа. Йапш механизатор ъаза акыт дыгьгIатымшатI нхарала «За доблестный труд» медаль гIазквнадыргаз ГIап ЧухIайыб ДжьагIафар йпа. Нхарала рхъвы гьгIатамхатI арахвырхIара йапщылаз ГIапргIа ЧухIайыб Къамбот йпа, МухIадин, МухIамад, Люца, амеханизатор ъаза ГIап ИсмагIиль. Акыт ахьыз пшдзата йыргатI ГIапргIа рткъвым йгIарылцIыз, Афганистан зинтернационал борч зырхъйаз ГIап Муъайад. АгIвыра ахъа йалагылу асатырква зкъальам йгIахъыцIыз ГIап Роман (Абдущель) «Холоднородниковский» совхоз агрономта, Устьджьгваты район ахимия адкIылара, агропром ъачIвагIагIвта, «КрасногорскIа» совхоз директорта дынхатI. Йынхара хвы азырбауата Москва акытмлыкврхIара гIарбарта (ВДНХ) хын дырщтитI, Россия Федерация рчIахIра швъа, «КъарчаЧеркесла акыт млыкврхIара анхагIв бзидздза» ЧIахIра хьзы, «Анхара аветеран» медаль гIайквнадыргатI. Ауи йпа Мурат аэкономика наукаква дыркандидатпI. ЙахщайцIба, ДзыгIваргIа йыртацу ФатIима, «КъарчаЧеркес Республикала азгIвадарахчара анхагIв бзидздза» ЧIахIра хьзы данкъвгагIвыпI. ЙащайцIба Ауес «Россия Федерацияла гIатгара зму акыт млыкврхIара анхагIвы» ЧIахIра хьзы гIайквнадыргатI. Ауи аткъвым пшдза йгIарылцIтI ари асурат йгIанарбауа ГIапргIа Ауес, Борис, Рафаиль (ауат рпны адуней йыквху Рафаиль йакIвпI). АхыгIвгьи йаунакъващпI, абзазара йатахъыз ъачIвагIа гIалырхын, йызлу рпны рпIатIу хIагIата щта бзи лыркъьатI. ГIап Ауес адгьылрхарджьра ъачIвагIа гIалихтI, дмеханизаторхатI. ДызквчIваз «Беларус» трактор амгIа йымата дчвагъватI, дыжвжватI, жвла аквипсатI, механизмла йадгалаз агвып дрылата рахвфачIвы йрыхIазыртI, атшыгIвра ацIагахра далан. Асквш 1938 агIан адуней йгIаквлыз ГIап Борис пщысквша рахIа йхъымцIуата йан Тина дихъыдзгIатI. Ауи лцIыхъвала йаба Качуна Абашта айсра Ду дшаладзызла чIвыуапхьа атгIачва йгIарадзатI. Йыбата йгIанхаз апщыгIвсабичва рпны Борис дхыгIвхун. Ауи апхьара тшайттI. Акыт квтанай апхьарта дангIалга ар къвырльыкъв йхатI. УацIыхъван Ярославль йхIаракIу айсра-финанс училища дыцIалын, ртшхъварала дгIалгатI. Йылахь йгIанылыз адарыкъвакт, МыкваргIа ртпхIа Хаджьат ргвышхвагIвта, цIагылагIв багъьата дизалуа йапшым ашIыпIаква рпны къвырльыкъв йхатI. Асквш 1984 агIан ГIап Борис майор чын йымата тшпсщара дчIвахтI, Черкесск дгIахъынхIвыхын, йцIыхъвахауа амшдза ауаъа дбзазатI. Ауи йкъвырльыкъвхара ахъазла 14 медалькI, хгвплацIакI йгьи ртшхъвага швъа щарда гIайквнадыргатI. Асквш 2013 агIан Борис сквш 75 днамдзаскIва адуней йхIваджьтI. Ауи йнашх аквыта зынгьи дгьуымбушызтI, йуагIахъа бзи йбун, дгIазлыцIыз аткъвым, йынбжьагIвчва гвхътIыла дрыщтаныкъвун. ЙцIыхъвала йгIанхаз йхъапщыла Хаджьат, йыпхIчва Лариса, ФатIима, йпа Роман, ауат йгIарыцIагылуа асабиква йыщта пшдза дырцитI. ГIап Рафаиль асквш 1946 агIан дйытI, хвгIвысабичва рпны дахIбапI. Йаба Данил Абашта айсра Ду алгата йцри кыт дгIахъынхIвыхнадзыкIьара йан, йахщчва, йайщчва цIагылагIв багъьата дырзалтI. Рафаиль дырзыразта йгIайгвалашвахитI йапхъахауа йарыпхьагIв, йара кIьадыгвкI йыцбзазуз, йнапIы лымата апхьарта дзырцуз ХIвран Джьансурат ХIасана йпхIа, йкласс унашвачпагIв ГIап Музали ШахIым йпа. Адырра йазгIашыкъыз, йапшым ауысква джьгарта йрылалуаз, арыпхьагIв Джьмакъвыл (КIьыча) Льильа Джьатсан йпхIа лбзирала урышв бызшви литератури бзи йбатI, Къарча-Черкес къральыгIва педагогика институт афилология факультет дыцIалтI. Рафаиль йыцта ауаъа йыцIалыз йкытлагIвчва Бежан Амарби, Эгьзакь (Джьмакъвыл) Саибат, Пщуна Лена йгьи Къарабаш Юра ркытлагIв, арыпхьагIв бергьльы Кълыч Рауф НыхIв йпа дашIамсуата дгIарылабжьун, дгIарцхърагIун. Асквш 1968 агIан аинститут бзидздзата йгIалгаз Рафаиль йцри кыт дгIахъынхIвыхын, йынхара джвыквицIатI. АрыпхьагIв шIа знапIы дгIацIцIыз арыпхьагIвчва Шармат Кьащиф ПIатIа йпа, АргIашокъва МахIмуд Асльамырза йпа, Макъвауа Самсон Мурат йпа, КIьыча Льильа Джьатсан йпхIа, Огвыз Данил Зульа йпа, Джьмакъвыл МухIамад Музакьыр йпа, Къамби ЗукIаней Пона йпа, Ажьи Азрет Кьащиф йпа, Шау ХIаджьмуса Къасей йпа датшагьи ршвапха пшдза йъачIвагIа дрыбагъьатI, ддыргвышхватI. Рафаиль йгIалихыз аъачIвагIа дамайжьауата сквш 45 райхIа йкытлагIвчва рсабиква урышв бызшвали литературали йайрыпхьатI. Йынхара хвы аквырцIауата «Отличник просвещения Российской Федерации» ЧIахIра хьзы, йапшым артшхъвагаква гIайквнадыргатI. ГIапргIа рткъвым зрыпшдзауа, ртлахц зрыбагъьауа ашIаква гIадзынгылитI. ЙгIазлыцIыз ауагIахъа рхабар пшдза хъара йдыргауа, ртлахц багъьахауа АлахI йырбзазатI.