ЗТУРЫХ БАЙАЗ АПХIВЫС

«Абазашта» газет анапаква рпны «Хъмаштылра» рубрика йацIата йгIанылитI зыгIвычIвгIвыс пасата дызчвыдзыз, гвмачIрала йырчву, угвы зырпIцIуа ргIагвалашвахра нашхыйаква. Йара ауаса йгIанылитI хIбзазара йагвыз, хIтурых йабайараз, уасаражв дута йхIзалуаз, щта пшдза хIызгIанызжьыз ахIбачва гвыбзыгъаква йырзынарху агIвыраква. Щта, абзазара ацIасква уырпшIагылта амаль гьамам. Азаджв адуней дгIаквлитI, датша заджвгьи АлахI нцIрахъвыта йгIайыйтыз даналгара дыквцIхитI. ЙмачIыгIвдзахитI айсыгIв пхIвыс чвзабаква, айсра асабиква, хIызшIацIгIуз ахIбачва гвыбзыгъаква. УахьчIва зтурых гIашвсыргвалашвахра стахъу, щарда мцIуата адуней зхIваджьыз айсыгIв чвзаба САЛЬЫКЪ (Айсан) Чача Ибрахим йпхIа йзагIамкIва азгIва атгIачва йрылнахыз лтаца квтанай Къаращащ дпсыта хIанца хIылшIашватI. Ауи «Аджьаль згIва гIалхъатагвапI»-хIва анцIра угвы йгIаналымрыгуашта, хIбара лгвапата айсра сквшква рцIыхъва механизаторта дшапхьаз, акыт йрымаз ПрирезкIа адгьылшта апны гIапсарата йылбаз, йапшым лгIагвалашвахраква джьащахъвара азхIымата хIазылрыдзыргIвтI. Ауи амщтахьла дукI дыгьнамихтI, мышпхьадзараквакIла лтаца длыщтацахтI. Аджьаназы акIвзыршуз, Дружба кыт айфанд йцхърагIагIв йгIачважвара апны Сальыкъ Чача бзита дшидыруаз, тгIачвалагьи бзазаралагьи дшшвапхаз, лхабза шпшдзаз гIаликIгIатI. Сальыкъ Чача асквш 1927 агIан Красна Восток кыт дйытI, араъа дгIадзынгылтI. АтгIачва хвгIвы йнадзун: Муса, Чача, Захар, Кьащиф, Щамсидин. – ХIара хIчкIвынчванта, Чача лакIвын аунагIва уысква зчпуз, хIан цIагылагIвта йлымаз, – йгIайгвалашвахитI Чача лащайцIба, сквш 90 йахъызцахьу Айсан Кьащиф. – Ауи хIаргьи дхIхьпшуан, хIчгIвычаква лджвджвун, айгвыгIвра хIзыгIанлыршун. Чача йбыжьбахауа акласс дапхьауата анамыцаква акыт йгIаталтI. Асквш 1943 январь мыз ауат акыт йтырцахтI. Йара ауи асквш, адзын квтаква рагIан Къзылпагвын йтаз акъарчаква зымгIва тыргатI. Йымцырахаз акыт Гвым йауата тгIачва щарда бзазара йхъаржьылтI. Ауат йрылашватI Чача лтгIачвагьи. Ауаъа йзыгIвнарцIаз, швгьи хъышвгьи зламыз ахъыб тдзыжв йкIылнахIвуз асипса рхIапчыпква йрыквнапсун. Атдзы йшырчпалакIгьи йдырчIаджьын, рбзазара джвыквырцIатI. Лабагьи лайщчвагьи «ЛенинскIа кузня» колхоз арахвырхIара, ауасархIара йырпщылан, ларгьи архъа нхараква йрылаз лан цIагылагIв багъьата дылзалтI. Абашта айсра Ду ацIыхъваква 18 сквша зхъыцIгIвацаз Сальыкъ Чача лыквлагIвчва Тауыж Баблина, Лачвыш Таибат, Меремкъвыль Разна дрыцта ПервомайскI МТС трактористта пщымызкI дапхьатI. ДангIалга трактор даквчIвата ПрирезкIа адгьыл лырхарджьтI, уацIыхъван Джьаней Цанина длыцта прицепщикта гIвысквша датанхахтI. Лара Чача йшгIалгвалашвахуазла, айсра сквшква рымщтахь анхара баргвын, фачIвыла йгьи чгIвычала йгIапсун. Атракторква кIабина гьырхъадзгыламызтI, мза гьрымамызтI, анартыхвбыгIв афатагьан йтырщуанта йадыркIуамца йынхун. ЙгIацIаргуз – гвадзызтI, нартыхвызтI цыракI йахьысырныс йгьахвитмызтI. Нартыхв хъакI ахъазла ахIапса йтадырчIвун. МышхъвлагIанцIакI асаба рхъадзгылата йынхун. Лайщчва йгIархъвшвуз акIартIоф бгIа чIахъвата йдрыдзуанта йырфун. ФачIвыли чгIвычали йшгIапсузгьи амшыркъвара рыгымхауа, йанкъвакъвуа йынхун, хачIвыта йрызгылаз йахънадырхIвун. Айсра аналга Чача згвпква йапшым артшхъвагаквала йхърыста йгIацапахыз Сальыкъ Мыхтат дйыццатI. Ауи «ЛенинскIа кузня» колхоз учетчикта дынхун, ларгьи архъа уысква дрылан. Асквш 1958 агIан йгIахъынхIвыхыз акъарчаква атдзы йызцIаз рыртхын, даргьи йъагIайхыз Красна Восток кыт апны тдзы руыхвахтI. Асквш 60-ква рагIан атгIачва акыт йтыцIхын, Невинномысск аргван млыкврхIартакI апны йынхатI. Жвасквша анцIы Черкесск йаланакIуа Комарова аурам апны хакв рхвгIан, ауаъа рбзазара джвыквырцIатI. Лхъапщыли лари гIвыкI йныбыжь акъыльаквшвара рызбжьата йацбзазатI, зхIаль-шан пшдзу, йшвапху хвгIвысабичва гIадзындыргылтI. Светлана, МухIамад, Мурадин, Алибек, Сирина дара ртгIачваква рымата, хIвапсагIвата йбзазитI. Чача атгIачва рпны лыхв дууын, зымгIвагьи лшIацIгIун, йлайкьангьашуан, айгвыгIврала дкIвдыршун. Ауи сквш 93 йахъылцахьатI уымхIвушта лакъыль цIаран, лхабарква бзи дызбуз, запыт йлызгIайуаз лгIариква рсабиква йыгьрыгылмырхузтI, дрыцымшыркъвун, квазыр дрыцасуан, рымдза хъчы ала йангIалуата, йапшым арахъва зигIваквала йылчпун. Ма, лтаца пасачвата атгIачва дъарыгхаз йгIалылхыз лгвакъвпра лынцIра ахъанарыстI. Ауи йгIалхъшахъыцIыз, лцриква, лъахIыльчва йырхъазымкIва, лтурых байа здыруаз, джькIахбаста лыцагIвызшаз анцIрала ргвы дгIатахуштI. Зтурых байаз апхIвыс йлылкъьаз амгIва пстIата адгьыл йгьаладзхуашым.